Eklizia 1 - The Holy Bible In Alur (Lur) Revised Orthography

Gin Ceke ie Nanu

¹ Lembe pa Jayerlembe, ma wod Daudi, m’ubimo i Yerusalem.

² Gin ma ie nanu mi gin ma ie nanu Jayerlembe wacu; gin ma ie nanu mi gin ma ie nanu, gin ceke en e gin ma ie nanu.

³ Dhanu bedo ku kuloka ang’o mi tic mi muli pare ceke m’emule ko the ceng’i?

⁴ Dhanum’utuk acel cidho, man dhanum’utuk mange bino; ento ng’om bedo mi nja.

⁵ Ceng’ bende wok, e ceng’ mwony, man ecidho pio i kakare ka m’eai i ie.

⁶ Yamu cidho yor ariwa ma piny, man elokre yor ariwa ma malu; elokre aloka thiri thiri ku woth pare, man yamu dwogo kendo i awirawira pare.

⁷ Kulo ma dongo ceke mol i nam, ento nam pong’ ungo: ka ma kulo ma dongo cidho i ie, gicidho keca kendo.

⁸ Gin ceke pong’ ku olo; dhanu copo yero maeni ngo: wang’ yeng’ ungo ku neno, kadi ith de pong’ ungo ku winjo.

⁹ Gin m’ubedo nuti e ma bibedo nuti; man gin m’utimbre e ma bitimbre: e gin moko mbe ma nyen the ceng’.

¹⁰ Gin moko nuti ma jucopo wacu pire kumae, Nen, maeni nyeni? egamu bedo nuti con, i nindo m’ular ubedo nuti iwa.

¹¹ Poi mi dhanum’utuk ma kwong’a mbe; kadok poi moko mi dhanum’utuk ma cen ma bibino de bibedo mbe, i kind ju ma biwok ma cen.

Gin ma Jayerlembe Neno

¹² An a Jayerlembe abedo ni ubimo wi Israel i Yerusalem.

¹³ Man aketho adundena kara asai ayeny de ku rieko pi gin ceke m’utimbre the polo: en e sendri ma dit ma Mungu mio ni wot dhanu gisendri ko.

¹⁴ Aneno tic ceke m’utimbre the ceng’; man, nen, gin ceke ie nanu man kethocwiny kum yamu.

¹⁵ Gin m’ugom dwokre atira ngo; man gin m’umbe kwandre ngo.

¹⁶ Aweco kud adundena gira, awacu kumae, Nen, agamu ira rieko ma dit ma sagu dhanu ceke m’ular ubedo nuti ira i Yerusalem; eyo, adundena mulo rieko ku ng’eyong’ec dit.

¹⁷ Man aketho adundena kara ang’ei rieko, man kara ang’ei abelu man lem ma kite mbe: aneno nia maeni bende en e kethocwiny kum yamu.

¹⁸ Kum can ma dit ni i rieko ma dit; man ng’atu ma medo ng’eyong’ec emedo can.