Daniel 3 - The Holy Bible In Alur (Lur) Revised Orthography

Both kud i Majuka M’ubogre

¹ Nebukadnezar m’ubimo timo ayi gin m’acwia mi mola ma kwar, ma kadongone bot pier abusiel, man kalacne bot abusiel: eketho ecungo i pambu mi Dura i ng’etker mi Babeli.

² Nebukadnezar m’ubimo lund uoro kwenda ucok judongo, ku jego, man jubim, ku jupoklembe, man jukur piny m’akana, ku juporthelembe, man jurieko, ku jubim ceke mi ng’etker karacelo, kara gibin ba thier mir ayi m’acwia ma Nebukadnezar m’ubimo ketho cungo.

³ Judongo, man jego, ku jubim, man jupoklembe, ku jukur piny m’akana, man juporthelembe, ku jurieko, man jubim ceke mi ng’etker, julund jucoko karacelo ba thier mir ayi gin m’acwia ma Nebukadnezar m’ubimo ketho cungo; e gicungo wang’ ayi gin m’acwia ma Nebukadnezar uketho cungo.

⁴ Jakwenda lund ukok ma tek kumae, Jung’olo iwu, E kodhidhanu, ku thek man dhok,

⁵ nia i nindo ma tek wuwinjo agwara, kud ungbalu, ku dongo, man usegu, ku nanga, kud adungu, man ke kwond ba gin ma ywak ceke, e wupodh piny man wurwo ni ayi gin m’acwia mi mola ma kwar ma Nebukadnezar m’ubimo ketho cungo;

⁶ man ng’atu ma tek upodho piny urwo de ngo i saa nica jubibole i majuka m’ubogre.

⁷ Ka kumeno i nindo maeca, ka kodhidhanu ceke giwinjo dwand agwara, kud ungbalu, ku dongo, kud usegu, ku nanga, ku ba gin ma ywak ceke, kodhidhanu ceke, ku thek ceke, man dhok ceke, gipodho piny man girwo bang’ ayi gin m’a cwia mi mola ma kwar ma Nebukadnezar m’ubimo ketho cungo.

⁸ Kum kumeno i nindo maeca Jukaldayo moko gibino ceng’ni, man gikelo i agobe kum Juyahudi.

⁹ Giloko lembe man giwacu ni Nebukadnezar m’ubimo kumae, E ubimo, bed rondo ku rondo.

¹⁰ In, E ubimo, itimo cik, nia ku ba dhanu ceke ma biwinjo dwand agwara, kud ungbalu, ku dongo, kud usegu, ku nanga, kud adungu man ba kwond gin ma ywak ceke, ebipodho piny man ebirwo ni ayi gin m’acwia mi mola ma kwar;

¹¹ man ng’atu ma tek upodho piny ungo erwo de ngo, jubibole i majuka m’ubogre.

¹² Juyahudi moko nuti m’iketho wi tic mi ng’etker mi Babeli: Cadrak, ku Mecak, man Abed-nego; dhanu maeni, E ubimo, giwori ngo: gitimo ni mungu peri ungo, kadi girwo de ngo ni ayi gin m’acwia mi mola ma kwar m’iketho cungo.

¹³ E ndhu ndhu nica Nebukadnezar i ng’ecwiny ku kwinyo pare eng’olo ya jukel Cadrak, ku Mecak, man Abed-nego. Gilund gikelo dhanu maeni i wang’ ubimo.

¹⁴ Nebukadnezar uloko lembe man ewacu igi kumae, En e aka, E Cadrak, ku Mecak, man Abed-nego, nia wutimo ngo ni mungu para, kadi wurwo ngo ni ayi gin m’acwia mi mola ma kwar m’aketho cungo?

¹⁵ Nie tek wubedo ayika ya i nindo ma tek wuwinjo dwand agwara, kud ungbalu, ku dongo, kud usegu, ku nanga, kud adungu, ku ba gin ceke ma ywak, wupodho piny man wurwo ni ayi gin m’acwia m’atimo, dre: ento tek wurwo ngo, jubibolowu i saa nica i majuka m’ubogre; man mungu maeno en e ng’a ma bibodhowu kud i cinga?

¹⁶ Cadrak, man Mecak, kud Abed-nego, giloko lembe man giwacu ni ubimo kumae, E Nebukadnezar, can loko lembe iri kum lembe maeni negowa ngo.

¹⁷ Tek ebedo kumeni, Mungu mwa ma watimo ire ecopo bodhowa kud i majuka m’ubogre; man ebibodho wa kud i cingi, E ubimo.

¹⁸ Ento tek kumeno ngo, dong’ ing’ei, E ubimo, nia wabitimo ni mungu peri ngo, kadi wabirwo de ngo ni ayi gin m’acwia m’iketho cungo.

¹⁹ Kwinyo lund upong’o Nebukadnezar, man ayi wang’e lokre kum Cadrak, ku Mecak, man Abed-nego: ka kumeno eyero, man eng’olo ya juyik majuka wang’ abiro ma sagu kurane.

²⁰ Man eng’olo nia dhanu moko ma jutego ma kind njuru asikari pare gitwi Cadrak, ku Mecak, man Abed-nego, man gibolgi i majuka m’ubogre.

²¹ Dhanu maeni julund jutwiogi ku kanzii migi, ku simisi migi, man bongu m’abola migi, ku kendi migi mange, man jubologi i majuka m’ubogre.

²² Ka kumeno kum lembang’ola p’ubimo bedo tek, majuka de lieth apila, lebmac unego dhanu maeno m’uting’o Cadrak, ku Mecak, man Abed-nego.

²³ Man dhanu adek maeni, Cadrak, ku Mecak, man Abed-nego, gipodho atwia i die majuka m’ubogre.

²⁴ I Nebukadnezar m’ubimo lund uwang’ lii, e eai malu pio: ewacu man eyero ni juporlembe pare kumae, Wabolo dhanu adek ungo i die maci? Giloko lembe giwacu ni ubimo kumae, Andha, E ubimo.

²⁵ Eloko lembe man ewacu kumae, Nen, aneno dhanu ang’wen m’agonya, m’ubewotho i die mac, e gin moko timogi ngo; man ayi ng’atu mir ang’wende e calu wod mungu.

²⁶ Nebukadnezar ulund ucoro ceng’ni dhu majuka m’ubogre: eyero man ewacu kumae, Cadrak, ku Mecak, man Abed-nego, wu jutic pa Mungu ma Malu Ngbir, wuwok woko, wubin kue. E Cadrak, ku Mecak, man Abed-nego gilund giwok woko kud i die mac.

²⁷ E judongo, ku jego, man jubim, ku juporlembe p’ubimo, ma gicokri karacelo, gineno dhanu maeni, nia mac tegone mbe i kumgi, kadi yukwigi de reure ngo, kadok kanzu migi de lokre ngo, kadi ng’wic mac de mulo kumgi ngo.

²⁸ Nebukadnezar uyero lembe man ewacu kumae, Mugisa bed ni Mungu pa Cadrak, ku Mecak, man Abed-nego, m’uoro malaika pare, man ebodho jutic pare m’ugene, man ethiro lem p’ubimo, man ewodho kumgi, kara ku gitim ni mungu mange kadok rwo ire de, ndhu ni Mungu migi ma dhe.

²⁹ Ka kumeno atimo cik, nia ku ba kodhidhanu ceke, man thek ceke, ku dhok, ma biyero lem cac moko kum Mungu pa Cadrak, ku Mecak, man Abed-nego, jubithume nziki nziki, man udi migi jubidwoko ni udhuru mi weyo; kum mungu mange robe ma copo bodho calu maeni.

³⁰ Ubimo lund udodo Cadrak, ku Mecak, man Abed-nego i ng’etker mi Babeli.