Daniel 2 - The Holy Bible In Alur (Lur) Revised Orthography

Daniel Utuco The Lek pa Nebukadnezar

¹ Man i rundi mir arionde mi camuker pa Nebukadnezar, Nebukadnezar uleko lek; e cwinye ng’abre, man nindo lal i wang’e.

² E ubimo lund ung’olo ya julwong’ weg ajoga, man juwodhtho, ku jubila, man Jukaldayo, kara giyer the lekne ni ubimo. Ka kumeno gimondo man gicungo i wang’ ubimo.

³ E ubimo wacu igi kumae, Aleko lek, man cwinya ng’abre ya ang’ei the lekne.

⁴ Jukaldayo gilund giyero ni ubimo ku dhu Cami kumae, E ubimo, bed nja: yer lekne ni jutic peri, man wabituco there.

⁵ Ubimo dwoko lembe man ewacu ni Jukaldayo kumae, Lembene rwinyo i ia: tek wuketho lekne ng’eire ngo ira ku there de, jubithumowu nziki nziki man jubidwoko udi mu ni uvuru mi weyo.

⁶ Ento tek wutuco lekne ku there de, wubinwang’u giramia i bang’a ku sukulia man yung ma dit: ka kumeno wutuc ira lekne ku there de.

⁷ Giloko lembe wang’ arionde giwacu kumae, Dong’ ubimo yer lekne ni jutic pare, e wabiyero there.

⁸ Ubimo loko lembe, man ewacu kumae, Ang’eyo andha nia wuyenyo wunwang’ nindo, kum wuneno nia lembene rwinyo i ia.

⁹ Ento tek wuketho ang’eyo lekne ngo, ndhu cik acel e ma nuti iwu; kum wuyiko lemndra ku lembe ma rac e ma wuyer i wang’a, cil ma nindo lokre ko: ka kumeno wuyer ira lekne, e abing’eyo nia wucopo ewo ira there.

¹⁰ Jukaldayo giloko lembe i wang’ ubimo, man giwacu kumae, Ng’atu moko mbe wi ng’om ma copo nyutho lembe p’ubimo, kum ubimo moko mbe, kadi rwoth, kadi jabim, ma penjo lembe ma kumeni bang’ ajoga moko kadi ba jawodhtho kadi ba Jakaldayo de.

¹¹ Man en e gin m’umbe mi ceng’ ceke ma ubimo kwayu, man ng’atu mange mbe ma copo nyutho lembene wang’ ubimo, ndhu mungu re, kabedo migi ni karacelo ku weg kum ungo.

¹² Kum lembe maeni ng’ecwiny umaku ubimo ku kwinyo ma dit apila, man eng’olo ya junyoth jurieko ceke mi Babeli.

¹³ Ka kumeno lembang’ola yik, e jubinego jurieko; man giyenyo Daniel ku juwagi kara juneggi.

¹⁴ Daniel ulund uloko lembe ku lembapora man ku ng’eyong’ec ni Ariok ma jego ma dit mi jukur kum ubimo, m’ucidho kara eneg jurieko mi Babeli;

¹⁵ eloko lembe man ewacu kumae, ni Ariok ma jego ma dit p’ubimo, Nedi lembang’ola uai bang’ ubimo aruca ruca kumeni? Ariok ulund ugonyo lembene ni Daniel.

¹⁶ E Daniel umondo, man epenjo ubimo ya eng’ol ire nindo, man ebiewo there ni ubimo.

¹⁷ Daniel ulund udok i ot pare, man egonyo lembene ni Hanania, ku Micael man Azaria, ma juwagi:

¹⁸ kara giyeny kisa ba Mungu m’i polo kum lembamung’a maeni; kara Daniel ku juwagi ku ginyothri ku jurieko wagi mi Babeli.

¹⁹ E lembamung’ane lund unyuthre ni Daniel i ginmawokiwang’ ku diewor. Daniel ulund umio mugisa ni Mungu m’i polo.

²⁰ Daniel ulund uloko lembe man ewacu kumae, Mugisa ni nying’ Mungu rondo ku rondo; kum rieko ku tego en e pare.

²¹ Man eloko nindo ku oro; ekabu ju m’ubimo, man eketho ju m’ubimo; emio rieko ni jurieko, man ng’eyong’ec ni ju ma ng’eyothelembe ni kugi;

²² enyutho gin ma thuth ku gin m’amung’a; eng’eyo gin ma ni i mudho, man der ubedo kude.

²³ Afoi, man apeki, E in i Mungu pa kwara, m’imio ira rieko ku tego, man kawono iketho ang’eyo lembe ma wakwayu i beng’i; kum iketho wang’eyo lembe p’ubimo.

²⁴ Ka kumeno Daniel umondo bang’ Ariok, ma ubimo ketho ya enyoth jurieko mi Babeli; ecidho man ewacu ire kumae: Kud inyoth jurieko mi Babeli; tera i wang’ ubimo, man abiewo there ni ubimo.

²⁵ Ariok ulund utero Daniel i wang’ ubimo pio, man ewacu ire kumae, Anwang’u ng’atu acel mi nyithindho mi ng’eca mi Yuda, ma biewo there ni ubimo.

²⁶ Ubimo loko lembe man ewacu ni Daniel, ma nyinge Beltecazar kumae, Icopo ewo lek m’aneno, ku therene de?

²⁷ Daniel uloko lembe i wang’ ubimo, man ewacu kumae, Lembamung’a m’ubimo kwayu, jurieko, kadi weg ajoga, kadi juwodhtho, kadi jueulembe de, copo ewo ngo ni ubimo;

²⁸ ento Mungu nuti i polo ma ewo lembamung’a, man eketho ubimo ma Nebukadnezar ung’ei gin ma biwok i acoka nindo. Lek peri, ku ginmawokiwang’ mi wii wi kavuto peri, gi eni:

²⁹ man piri, E ubimo, pidoic peri wok ii wi kavuto peri, pi gin ma bitimbre ma cen; man ng’atu ma nyutho lembamung’a eketho ing’ei gin ma bitimbre.

³⁰ Ento pira, lembamung’a maeni nyuthre ira ngo, kum rieko moko m’abedo ko ma sagu jumange ma kwo, ento kara there ng’eire ni ubimo, man kara ing’ei pidoic mir adundeni.

³¹ In, E ubimo, ineno, man, nen, ayi gin m’acwia ma dit. Ayi gin m’acwia maeni, ma en e dit, ma rienyne ber hai, ecungo i weng’i; man ayine en e gin ma ng’oyo ndiri.

³² Pir ayi m’acwia maeni, wie en e mi mola ma kwar ma leng’, kore man bote en e mi mola ma tar, ie man bambe en e mi mola,

³³ funde en e mi nyunyu, tiende ma nyono ng’om ke ng’ete kucel en e mi nyunyu, ng’ete kucel ke ulobo.

³⁴ Ineno maram kidi tongre ko ku cing’ ungo, m’ugoyo ayi gin m’acwiane wi tielo ma gi mi nyunyu kud ulobo, man eng’enyogi nziki nziki.

³⁵ E nyunyu, kud ulobo, ku mola, man mola ma tar, ku mola ma kwar, ulund ung’eny nziki nziki karacelo, man edoko calu cung’ ma wi lelacam mi dwij lietho; e yamu dunye ceke, ketho kakagi nwangre ngo igi: man kidi m’ugoyo ayi gin m’acwiane doko ni got ma dit, man epong’o ng’om yu.

³⁶ Maeni lekne: man wabituco there i wang’ ubimo.

³⁷ In, E ubimo, in i ubimo mi ju m’ubimo, ma Mungu m’i polo mio iri ker, ku tego, man tek, ku dwong’;

³⁸ man ka ceke ma tek nyithindho mi dhanu bedo i ie, yedi m’i thim ku winyo m’i polo emio i cingi, man eketho icamu ker i wigi ceke: in i wie mi mola ma kwar.

³⁹ Man yo ng’ei ker mange biwok ma rom kudi ngo; ku ker mange mir adege mi mola, ma bibimo wi ng’om yu.

⁴⁰ Man ker mir ang’wende ke bibedo tek calu nyunyu, kum nyunyu turo nziki nziki man eloyo gin ceke; man calu nyunyu m’ung’inyo gin maeni ceke, ebituro nziki nziki man ebing’inyo.

⁴¹ Man calu ineno tielo ma nyono ng’om ku nyiglwet tielo, kume moko ulobo pa jacwiagulu, man kume moko mi nyunyu, ebibedo ker m’upokre; ento tego mi nyunyu bibedo i ie, kum ineno nyunyu m’ujebre kud ulobo ma foth.

⁴² Man calu nyiglwet tielo kume moko nyunyu, man kume moko ulobo, kumeno ng’et ker moko bibedo tek, ng’ete moko bibedo ng’ic.

⁴³ Man calu ineno nyunyu jebre kud ulobo ma foth, gibijebri gigi ku kodhi mi dhanu; ento gibiribri karacelo ngo, cil calu nyuu nyu copo ribre ngo kud ulobo.

⁴⁴ Man i nindo mir ubimo maeno Mungu m’i polo biketho ker ma binyothre ngo rondo ku rondo, kadok camukerne de jubiweko ngo ni dhanu mi thek mange; ento ebituro nziki nziki man ebijigo ker maeni ceke, man ebicungo mi nja.

⁴⁵ Kum calu ineno ya kidi tongre kud i got ma ku cing’ ungo, man nia eturo nyunyu nziki nziki, man mola, kud ulobo, ku mola ma tar, man mola ma kwar; Mungu ma dwong’ uketho ubimo ng’ei gin ma bitimbre ma cen: man lekne en e andha, man tuco there de andha.

⁴⁶ Ubimo ma Nebukadnezar ulund upodho arieba wang’e, man erwo ni Daniel, man eng’olo nia jumi lam ire ku gin ma ng’wice ng’ar.

⁴⁷ Ubimo loko lembe ni Daniel, man ewacu kumae, Andha Mungu mu en e Mungu mi mungu, man Rwoth mi ju m’ubimo, man en e ng’atu ma nyutho lembamung’a, kum icopo nyutho lembamung’a maeni.

⁴⁸ Ubimo lund udwoko Daniel dwong’, man emio ire giramia ma dit: dupa, man eketho ya ebim ng’etker mi Babeli nzu, man ebed jabim ma dit wi jurieko ceke mi Babeli.

⁴⁹ Man Daniel ukwayu ubimo, man eketho Cadrak, ku Mecak, man Abed-nego, wi tic mi ng’etker mi Babeli: ento Daniel ubedo dhugang’ p’ubimo.