Daniel 10 - The Holy Bible In Alur (Lur) Revised Orthography

Giranena ma Daniel Uneno Dhu Kulo Hidekel

¹ I rundi mir adege pa Kuro m’ubimo mir Ajemi gin moko nyuthre ni Daniel, ma julwong’o nyinge Beltecazar; ginduni en e andha, en e ali ma dit: man eng’eyo ginduni, man eng’eyo ginmawokiwang’.

² I ceng’ maeca, an a Daniel, aywak yenga adek bo.

³ Acamu kwen ma mit ungo, kadok ring’o kadi pigulok de gimondo i dhoga ngo, kadi mo de awiro ki ngo, maram yenga adek uthum ko.

⁴ Man i ceng’ pier ario wi ang’wende mi dwi ma kwong’ane, kan ani dhu kulo ma dit, ma en e Hidekel,

⁵ Ating’o wang’a malu, man aneno, man, nen, ng’atu moko m’uronyo bongu ma nwang’, ma piere bedo atwia ku mola ma kwar ma leng’ mir Ufaz:

⁶ kume bende e calu kidi ma mar mar, man wang’e calu lukoth, man tong’ wang’e calu thala m’uliel, bote ku tiende ke calu mola m’urieny, man dwand lembe pare calu dwand udul dhanu.

⁷ Man, an a Daniel, a kenda m’aneno ginmawokiwang’ne; kum ju ma wabedo wakugi gineno ginmawokiwang’ne ngo; ento mielkum ma dit umakugi, e giringo kara gipondi.

⁸ Ka kumeno juweka adong’ a kenda, man aneno ginmawokiwang’ ma dit maeni, man tego moko mbe m’udong’ i ia; kum bero para lokre i ia ni nyoth, man tego moko mbe m’udong’ i ia.

⁹ Ento awinjo dwal mi lembe pare; e kan awinjo dwal mi lembe pare, e nindo ma pek unura, wang’a de lokre yor i ng’om.

¹⁰ Man, nen, cing’ umulo kuma, m’uketha wi conga, man wi uthen cinga.

¹¹ Man ewacu ira kumae, E Daniel, in i ng’atu ma jumaru dit, dong’ ing’ei lembe m’ayero iri, man icung atira; kum juora i beng’i kawono. Man kan eyero lembe maeni ira, acungo ma kuma bemiel.

¹² Elund ewacu ira kumae, Lworo kud unegi, Daniel; kum ugambre i ceng’ ma kwong’a m’iketho ie adundeni kara ing’ei, man kara ijwigri giri i wang’ Mungu peri, lembe peri winjre: man abino kum lembe peri.

¹³ Ento jaditmawijo mi ker mir Ajemi jai ira ceng’ pier ario wi acel; ento, nen, Mikael, ng’atu acel ma kind judongomawijo ma gi judongo, ebino kara ekonya: man adong’ keca kud ubimo mir Ajemi.

¹⁴ Kawono abino kara aketh ing’ei gin ma biwok ma cen kum juthu; kum ginmawokiwang’ne fodi en e mi nindo dupa.

¹⁵ E kan edaru yero ira calku lembe maeni, akulo wang’a i ng’om, man adoko ajuba.

¹⁶ Man, nen, ng’atu acel ma calu wod dhanu emulo dendhoga: e alund aalu dhoga, man ayero awacu ni ng’atu m’ucungo i wang’a kumae, E rwoth para, ni kum ginmawokiwang’ can para dwog i wia, man tego dong’ umbe kuda.

¹⁷ Kum jatic pa rwoth para maeni copo weco ku rwoth para maeni nenedi? kum pira, aruca ruca tego moko mbe m’udong’ i ia, kadok yuyo de mbe m’udong’ i ia.

¹⁸ Ng’atu acel ma calu ayi dhanu lund umulo kuma kendo, e emio ira tego.

¹⁹ Man ewacu kumae, E ng’atu ma jumaru dit, lworo kud unegi: kwiocwiny ubed iri, bed ku tego, eyo, bed ku tego. E kinde m’eyero ira, judwoka tek, man awacu kumae, Wek rwoth para weci, kum idwoka tek.

²⁰ Elund ewacu kumae, Ing’eyo nia abino i beng’i pir ang’o? man kawono abidok nikiedo ku jaditmawijo mir Ajemi: man kan acidho, nen, jaditmawijo mi Yunani biwok.

²¹ Ento abiyero iri maeno m’ukieure i lembagora mi lemandha: man ng’atu moko mbe m’ubedo ku tegocwiny karacelo kuda kum ju maeni ndhu Mikael ma jaditmawijo mu.