Amos 1 - The Holy Bible In Alur (Lur) Revised Orthography

Pokolembe wi Thek ma ni Ng’et Israel

¹ Lembe pa Amos, ma ni i kind jukwac mi Tekoa, m’eneno pir Israel i nindo pa Uzia m’ubimo mi Yuda, man i nindo pa Yeroboam ma wod Yoac m’ubimo mir Israel, rundi ario ma fodi digidi kuwok ungo.

² Man ewacu kumae, Yehova birundo kud i Sayuni, man ebiwodho dwal kud i Yerusalem; man kwac mi jukwac biywak, man wi Karmel biner.

³ Yehova wacu kumae: Mi gondri adek mi Dameski, eyo, mir ang’wen, abiloko masendine cen ungo; kum gifodo Gilead ku jamfodo mi nyunyu.

⁴ Ento abioro mac i ot pa Hazael, man ebiwang’u udi mi ker pa Ben-hadad.

⁵ Man abituro utwindi mi Dameski, man abikabu ng’atu m’ubedo i poga mir Aven woko, ku ng’atu m’umaku uluth mi ker kud i ot mir Aden; e dhanu mi Cami bicidho i ng’eca cil kum Kir, Yehova wacu.

⁶ Yehova wacu kumae: Mi gondri adek mi Gaza, eyo, mir ang’wen, abiloko masendine cen ungo; kum giyaku dhanu dho ni ng’eca, kara gimigi ni Edom.

⁷ Ento abioro mac wi gang’kidi mi Gaza, man ebiwang’u udi mi kerne.

⁸ Abikabu ng’atu m’ubedo i Acdod, man ng’atu m’umaku uluth mi ker kud i Ackelon; man abiloko cinga kum Ekron; man dong’ Jufilisti m’udong’ binyothre, Rwoth Yehova wacu.

⁹ Yehova wacu kumae: Mi gondri adek mi Turo, eyo, mir ang’wen, abiloko masendine cen ungo; kum gimio dhanu dho ni Edom, man gipoi ungo kum lembariba mir umego.

¹⁰ Ento abioro mac wi gang’kidi mi Turo, man ebiwang’u udi mi kerne.

¹¹ Yehova wacu kumae; Mi gondri adek mir Edom, eyo, mir ang’wen, abiloko masendine cen ungo; kum eriemo umin ku palamularu, man ebayu ngisi ceke cen, man ng’ecwiny pare yeco thiri thiri, ekanu kwinyo pare de mi nja.

¹² Ento abioro mac wi Teman, man ebiwang’u udi mi ker mi Bozra.

¹³ Yehova wacu kumae: Mi gondri adek mi nyithindho mir Amon, eyo, mir ang’wen, abiloko masendine cen ungo; kum giriedo i mon mi Gilead ma igi nuti, kara gimed kieu migi.

¹⁴ Ento abicwinyo mac wi gang’kidi mi Raba, man ebiwang’u udi mi kerne, ku kok i ceng’ mi lwiny, man wavuvu i ceng’ mi vira;

¹⁵ e ubimo migi bicidho i ng’eca, en ku judongomawijo pare karacelo, Yehova wacu.