Ai 6 - The Holy Bible In Alur (Lur) Revised Orthography

¹ Man Yehova wacu ni Musa kumae, Kawono ibineno gin m’abitimo kum Farao; kum ebiweko gicidho ni kum cing’ ma tek, man ebixiemogi woko kud i ng’om pare ni kum cing’ ma tek.

Mungu Nyuthve ni Musa Kendo

² Man Mungu yero ni Musa, man ewacu ire kumae, An a Yehova:

³ man anyuthra ni Ibrahim, ni Isak, man ni Yakobo, calu Mungu ma Jategokpo; ento ang’eira igi ngo ku nyinga ma Yehova.

⁴ Man aketho lembariba para cungo kugi, ya ami igi ng’om Kanan, ng’om mir umondo migi, ma gibedo ni umondo i ie.

⁵ Man mange ke awinjo cur mi nyithindho mir Israel, ma Junaisiri ketho gibedo i ng’eca; man apoi kum lembariba para.

⁶ Kum kumeno wac ni nyithindho mir Israel kumae, An a Yehova, man abiwodhowu woko ku the ter mi Jumisiri, man abibodhowu kud i ng’eca migi, man abiwaruwu ku bot m’arieya, man ku pokolembe ma dit:

⁷ man abigamuwu i bang’a ni dhanu, man abibedo iwu ni Mungu; e wubing’eyo nia an a Yehova Mungu mu, m’uwodhowu woko ku the ter mi Jumisiri.

⁸ Man abikelowu i ng’om m’ating’o cinga pire ya amie ni Ibrahim, ni Isak, man ni Yakobo; man abimie iwu ni aba: an a Yehova.

⁹ E Musa yero kumeni ni nyithindho mir Israel: ento giwinjo dwand Musa ngo ni kum can mi cwiny, man kum ng’eca ma tek.

¹⁰ E Yehova yero ni Musa, ewacu kumae,

¹¹ Mondi, iwac ni Farao m’ubimo mi Misiri, ya ewek nyithindho mir Israel giai i ng’om pare.

¹² E Musa yero i wang’ Yehova, ewacu kumae, Nen, nyithindho mir Israel giwinjo dwanda ngo; e ka Farao ke biwinja nenedi, an ma yaa mbe i dendhoga?

¹³ Man Yehova yero ni Musa man ni Harun, man emio igi lembang’ola ni nyithindho mir Israel, man ni Farao m’ubimo mi Misiri, ya uwodh nyithindho mir Israel kud i ng’om Misiri.

Thekwaru pa Musa giku Harun

¹⁴ Maeni wi juudi pa weggi. Wot Ruben ma kayu mir Israel gi eni: Hanok, man Palu, man Hezron, ku Karmi; maeni gi wat pa Ruben.

¹⁵ Man wot Simeon gi eni: Yemuel, man Yamin, man Ohad, man Yakin, man Zohar, man Caul ma wod dhaku ma Nyakanani; maeni gi wat pa Simeon.

¹⁶ Man maeni gi nying’ wot Lawi calku dhanum’utuk migi: Gercon, man Kohath, man Merari; man rundi mi camung’om pa Lawi en e rundi dak acel ku pier adek wi abiro.

¹⁷ Wot Gercon gi eni: Libni ku Cimei, calku wat migi.

¹⁸ Man wot Kohath gi eni: Amram, man Izhar, ku Hebron, man Uziel; man rundi mi camung’om pa Kohath en e rundi dak acel ku pier adek wi adek.

¹⁹ Man wot Merari gi eni: Mali ku Muci. Maeni gi wat mi Julawi calku dhanum’utuk migi.

²⁰ Man Amram ugamu Yokebed ma nyamin won ni dhaku; man enyolo ire Harun giku Musa: man rundi mi camung’om pa Amram en e rundi dak acel ku pier adek wi abiro.

²¹ Man wod Izhar gi eni: Kora, man Nefeg, ku Zikri.

²² Man wot Uziel gi eni: Micael, man Elzafan, ku Sithri.

²³ Man Harun ugamu Eliceba, ma nyar Aminadab, ma nyamin Nacon, ni dhaku; man enyolo ire Nadab kud Abihu, man Eleazar ku Ithamar.

²⁴ Man wot Kora gi eni: Asir, man Elkana, kud Abiasaf; maeni gi wat mi Jukorahi.

²⁵ Man Eleazar ma wod Harun ugamu ire kind nyig Putiel acel ni dhaku; man enyolo ire Finehaz. Maeni gi judongo mi Julawi ma wi juudi pa weggi calku wat migi.

²⁶ Maeni gi Harun ku Musa maeno, ma Yehova wacu igi kumae, Wuwodh nyithindho mir Israel woko kud i ng’om Misiri calkud udulgi.

²⁷ Maeni gi ju ma giyero ni Farao m’ubimo mi Misiri, ya uwodh nyithindho mir Israel kud i Misiri: maeni gi Musa ku Harun maeno.

Lembang’ola pa Yehova ba Musa giku Harun

²⁸ Maeni timbre i nindo ma Yehova yero ie lembe ni Musa i ng’om Misiri,

²⁹ nia Yehova yero ni Musa, ewacu kumae, An a Yehova: yer lembe ceke m’ayero iri ni Farao m’ubimo mi Misiri.

³⁰ Man Musa wacu kumae i wang’ Yehova, Nen, an a ng’atu ma yaa mbe i dendhoga, ka Farao ke biwinja nenedi?