Ai 38 - The Holy Bible In Alur (Lur) Revised Orthography

Karamb Timo Pemblam mi Lam M’awang’a

¹ Man etimo pemblam mi lam m’awang’a ku yendulu: kaborne bot abic, man kalacne bot abic, dhoge rom rom; man kadongone bot adek.

² Man etimo tunge wi gunde ang’wen; tunge en e mi piny acel karacelo kude: man emwone ku mola.

³ Man etimo agulu mi pemblam ceke, ajiku, ku lupau, ku tabu, ku gol mi ring’o, ku jambmac: etimo agulune ceke ku mola.

⁴ Man etimo voi mi mola kum pemblam, the dhoge m’utieke piny, utundo i diere.

⁵ Man ethiedho wende ang’wen kum gunde ang’wen mi jambgwok mac mi mola, kara ubed kaka mi yen.

⁶ Man etimo yen ku yendulu, man emwonogi ku mola.

⁷ Man eroyo yen i wende i ng’et pemblam, ma juyeye kudo; etime thwolo ku bau.

Karamb Timo Jamblogo mi Mola

⁸ Man etimo jamblogo mi mola, man there ku mola, mi kieu mi mon mi timotim ma gitimo giratima i dhugola mi hema mi cokri.

Lelagang’ mi Hema

⁹ Man etimo lelagang’: mi ng’ete ma piny yo piny gang’bongu mi lelagang’ en e mi bongu ma nwang’ ma ber m’awia, bot dak acel;

¹⁰ mbegine pier ario, man werne pier ario, mi mola; gol mi mbegi ku jambribne en e mi mola ma tar.

¹¹ Man i ng’ete ma yor ariwa ma malu bot dak acel, mbegine pier ario, man werne pier ario, mi mola; gol mi mbegi, ku jambribne, mi mola ma tar.

¹² Man mi ng’ete ma yo reto gang’bongu nuti bot pier abic, mbegine apar, man werne apar; gol mi mbegine, ku jambribne, mi mola ma tar.

¹³ Man mi ng’ete ma yo nyangu m’ulokre yo nyangu bot pier abic.

¹⁴ Gang’bongu mi ng’ete kucel mi dhugang’ en e bot apar wi abic; mbegine adek, man werne adek;

¹⁵ man mi ng’ete mucelo de kumeca; yo ku cing’ kucel man yo ku cing’ mucelo ba dhugang’ mi lelagang’ gang’bongu nuti bot apar wi abic; mbegine adek, man werne adek.

¹⁶ Gang’bongu ceke mi lelagang’ m’utieke gbur en e mi bongu ma nwang’ ma ber m’awia.

¹⁷ Man wer mi mbegi en e mi mola; gol mi mbegi, ku jambribne, mi mola ma tar; man jambum mi wie, en e mi mola ma tar; man mbegi ceke mi mola mi lelagang’ juribo ku mola ma tar.

¹⁸ Man voi mi dhugang’ mi lelagang’ en e tic pa jakwoc mi ruko, mi m’ulweku, ku m’uluga, man ma kwar ngbo, ku bongu ma nwang’ ma ber, m’awia: man kaborne bot pier ario, man kadongone i kalacne bot abic; m’erombo ku gang’bongu mi lelagang’.

¹⁹ Man mbegine ang’wen, werne de ang’wen, mi mola; golne mi mola ma tar, man jambum mi wie, ku jambribne de, mi mola ma tar.

²⁰ Man gute ceke mi hema, man mi lelagang’ utieke gbur, en e mi mola.

Mola ma Tung’ Tung’ mi Kamaleng’

²¹ Maeni en e wel jamb hema, en e hema mi lembatuca, calu jukwanugi, calku lembang’ola pa Musa, mi timotim mi Julawi, ku cing’ Ithamar, ma wod Harun ma jalam.

²² Man Bezalel ma wod Uri, ma wod Hur, mi suru pa Yuda, utimo gin ceke ma Yehova ng’olo ni Musa.

²³ Man Aholiab ma wod Ahisamak, mi suru pa Dan, ni karacelo kude m’e jang’ikpiny, man jatic ma riek, man jakwoc mi ruko i gin m’ulweku, man m’uluga, ku gin ma kwar ngbo, man mi bongu ma nwang’ ma ber.

²⁴ Mola ma kwar ceke ma jutimo ko tije i tic ceke mi kamaleng’, cil mola ma kwar ma juthiero, en e talanto pier ario wi abung’wen, man cekel dak abiro ku pier adek, calku cekel mi kamaleng’.

²⁵ Man mola ma tar mi ju ma jukwanu mir udul en e talanto dak acel, man cekel rubanga acel ku dak abiro ku pier abiro wi abic, calku cekel mi kamaleng’:

²⁶ ku ba wie ku ba beka, thelembene, ng’et cekel, calku cekel mi kamaleng’, kum ku ba dhanu ceke m’ukadhu ba ju ma jukwanugi, ugambre kum rundi pier ario ku ma sagu, mi dhanu ma co rubanga dak abusiel ku wi adek ku dak abic ku pier abic.

²⁷ Man talanto dak acel mi mola ma tar en e mi thiedho wer mi kamaleng’, ku wer mi kusikabongu; wer dak acel mi talanto dak acel, talanto acel mi wer acel.

²⁸ Man etimo gol mi mbegi ku cekel rubanga ku dak abiro ku pier abiro wi abic, man emwono wigi, man etimo jambrib igi.

²⁹ Man mola ma mir athiera talanto pier abiro, man cekel rubanga ario ku dak ang’wen.

³⁰ Man etimo kudo wer mi dhugola mi hema mi cokri, ku pemblam mi mola, ku voine mi mola, kud agulu ceke mi pemblam,

³¹ man wer mi lelagang’ m’utieke gbur, ku wer mi dhugang’ mi lelagang’, ku gute ceke mi hema, ku gute ceke mi lelagang’ m’utieke gbur.