Ai 34 - The Holy Bible In Alur (Lur) Revised Orthography

Bankidi Mir Arionde

¹ E Yehova wacu ni Musa kumae, Pai bankidi ario calu ma kwong’a: man abigoro lembe m’ukoubedo wi bankidi ma kwong’a, m’ituro.

² Man ibed ayika kugweno, man iidh malu kugweno wi got Sinai, man inyuthri giri ira keca wi usimbru got.

³ Man ng’atu moko kud uidh malu karacelo kudi; kadi ng’atu moko de kud unen kind got ceke; kadok udul rombe kadi dhok de kud ucam i wang’ got maeni.

⁴ Man epayu bankidi ario calu ma kwong’a; e Musa ai pir kugweno, man eidho malu wi got Sinai, calu Yehova ng’olo ire, man emaku bankidi ario i cinge.

⁵ E Yehova loro ku i afuru, man ecungo kude karacelo kuca, man eyero nying’ Yehova.

⁶ E Yehova kadhu i wang’e, man eyero kumae, Yehova, Yehova, Mungu ma won kisa ku bero, ng’atu ma bedo yo ni ng’ecwiny, man dit ku mer mi bero ku lemandha,

⁷ ng’atu ma gwoko mer mi bero ni dhanu rubanga rubanga, m’eweko kier ku gondri man dubo; m’ekwanu dubo ngo nia leng’ i yo moko, m’eketho kier mi wego wi nyithindho, man wi nyithindho mi nyithindho, wi dhanum’utuk mir adege man mir ang’wende.

⁸ E Musa timo pio, man ekulo wie yor i ng’om, erwo de.

⁹ Man ewacu kumae, Tek anwang’u bero i weng’i kawono, E Rwoth, akwei, wek Rwoth ucidh i kindwa; kum en e dhanu ma ng’utgi tek; man iwek kier mwa ku dubo mwa de woko, man ijolwa ni aba peri.

Jutimo Lembariba Kendo

¹⁰ Man ewacu kumae, Nen, atimo lembariba: abitimo gin ma wang’u ijo i wang’ dhanu peri ceke, wadi gin ma fok’utimbre ngo i ng’om yu, kadi i thek moko; man dhanu ceke m’ini i kindgi bineno tic pa Yehova; kum en e gin ma ng’oyo ndiri m’abitimo kudi.

¹¹ Keth cwinyi kum lembe m’ang’olo iri tin: nen, ariemo Jaamori woko i weng’i, man Jakanani, man Jahiti, ku Japerizi, man Jahivi, ku Jayebusi.

¹² Igwokri giri, kara kud itim lembariba ku dhanu m’i ng’om m’icidho i ie, emaru bedo ni uwic i kindi:

¹³ ento wutur pemblam migi, man wutur mbegi migi nziki nziki, man wutong’ mungu m’araga migi piny:

¹⁴ (kum ibirwo ni mungu mange ngo: kum Yehova, ma nyinge Nyeko, en e Mungu ma janyeko);

¹⁵ imaru timo lembariba ku dhanu m’i ng’om, man gitim asara tok mungu migi, man gilam lam ni mungu migi, man ng’atu acel umaru lwong’i man icam kum lam pare:

¹⁶ man imaru gamu nyiggi ni woti, man nyiggi maru timo asara tok mungu migi, man giketh woti gitim asara tok mungu migi.

¹⁷ Kud itim mungu m’acwia m’atwaga iri ki.

¹⁸ Kwir agba mi kwen ma thobi mbe i ie. Cam kwen ma thobi mbe i ie ceng’ abiro, calu ang’olo iri, i nindo ma juketho i dwi Abib; kum iai kud i Misiri i dwi Abib.

¹⁹ Gin ceke m’uyabu ic en e para; lim peri ceke ma coge, kayu mi dhiang’ man mi rombe.

²⁰ War kayu mi kana ku nyathi rombo: man tek iware ngo, ilund itur ng’ute. War kayu ceke mi woti. Man ng’atu moko mbe ma biwok i wang’a ma cinge nanu.

²¹ Tim tic ceng’ abusiel, ento ceng’ mir abirone iyom: yom i nindo mi fur man i palacam.

²² Man ikwir agba mi yenga, en e mi mwoka mi palacam mi nganu, man agba mi cokopiny i kakan i kajik rundi.

²³ Co peri ceke binyuthri i wang’ Rwoth Yehova, Mungu mir Israel, wang’ adek i rundi acel.

²⁴ Kum abiriemo thek woko i weng’i, man abimedo kieu peri: kadok ng’om peri de ng’atu moko mbe ma biyenye, kinde m’iidho malu kara ithieri i wang’ Yehova Mungu peri wang’ adek i rundi acel.

²⁵ Kud ithier rimo mi lam para ku kwen ma thobi ni i ie; kadok lam mir agba mi kadhukuwijo de kud wuwek mi kugweno.

²⁶ Kel landu mwoka mi ng’om peri i ot pa Yehova Mungu peri. Kud ited nyathi diel ku cag min.

²⁷ E Yehova wacu ni Musa kumae, Gor lembe maeni: kum atimo lembariba kudi man kud Israel calku lembe maeni.

²⁸ Man ebedo kuca karacelo ku Yehova ceng’ pier ang’wen man diewor pier ang’wen; ecamu kwen de ngo, kadok madhu pi de ngo. Man egoro lembe mi lembariba wi ban, en e lembang’ola apar.

Musa Loro Piny ku wi Got

²⁹ Man etimbre, kinde ma Musa loro piny ku wi got Sinai ku bankidi ario mi lembatuca i cing’ Musa, kinde m’eloro piny ku wi got, nia Musa ng’eyo ngo nia dend wang’e rieny ni kum weco kude.

³⁰ Man kinde ma Harun ku nyithindho mir Israel ceke gineno Musa, nen, dend wang’e rieny; man lworo bino i bang’e negogi.

³¹ E Musa lwong’ogi; man Harun ku judongo mir udul ceke gidwogo i bang’e: e Musa weco kugi.

³² Man yo ku ng’eye nyithindho mir Israel ceke gicoro ceng’ni: man eng’olo igi lembe ceke ma giweco ko giku Yehova wi got Sinai.

³³ E kinde ma Musa daru weco kugi, eumo wang’e ku bongu.

³⁴ Ento kinde ma Musa mondo i wang’ Yehova kara giwec kude, ekabu bongu woko, maram ewok ko woko; e ewok woko, man eyero gin ma jung’olo ire ni nyithindho mir Israel.

³⁵ E nyithindho mir Israel uneno wang’ Musa, nia dend wang’ Musa rieny; e Musa umo wang’e kendo ku bongu, maram emondo ko niweco kude.