Ai 33 - The Holy Bible In Alur (Lur) Revised Orthography

Yehova Ng’olo ya Gitug Woth

¹ Man Yehova yero ni Musa kumae, Ai, wuidh malu ku keni, in ku dhanu m’iwodho woko kud i ng’om Misiri, ba ng’om m’akwong’o ni Ibrahim, ni Isak, man ni Yakobo, m’awacu kumae, Abimie ni kodhini:

² man abioro malaika i weng’i; man abiriemo Jakanani, ku Jaamori, ku Jahiti, man Japerizi, ku Jahivi, man Jayebusi:

³ ba ng’om ma molo cak ku kic: kum abiidho malu i dieri ngo; kum in i dhanu ma ng’uti tek; amaru jigo wii i gengi.

⁴ E kinde ma dhanu winjo rwonglembe ma rac maeni, giywak: man ng’atu moko mbe m’ukendo ruko pare.

⁵ Man Yehova wacu ni Musa kumae, Wac ni nyithindho mir Israel kumae, Wu dhanu ma ng’utwu tek; tek aidho malu i kindi i kinde ma nyathigi, abijigo wii: ka kumeno kawono wodh ruko peri cen, kara ang’ei gin m’atim i beng’i.

⁶ E nyithindho mir Israel uwodho ruko migi ugambre kum got Horeb.

Hema mi Cokri

⁷ Nie en e kura Musa ya egam hema man egure i ng’ei kagonjo, cen ku kagonjo; man elwong’e kumae, Hema mi cokri. Man etimbre, nia ku ba dhanu ceke m’uyenyo lembe ba Yehova ecidho woko ba hema mi cokri, ma ni i ng’ei kagonjo.

⁸ Man etimbre, kinde ma Musa cidho woko ba Hema, nia dhanu ceke giai malu, man gicungo, ku ba dhanu ceke ng’atuman i dhugola mi hema pare, man eneno tok Musa, cil m’emondo ko i Hema.

⁹ Man etimbre, kinde ma Musa mondo i Hema, mbegi mir afuru loro piny man ecungo dhugola mi Hema: e Yehova weco ku Musa.

¹⁰ E dhanu ceke neno mbegi mir afuru cungo dhugola mi Hema: e dhanu ceke giai malu man girwo, ku ba dhanu ceke ng’atuman i dhugola mi hema pare.

¹¹ E Yehova giweco ku Musa ma ginendri ku wang’gi, calu dhanu weco ku jarimbe. Man elokre kendo i kagonjo: ento jatic pare ma Yocuwa, ma jalawobi, ma wod Nun, eai ungo kud i Hema.

Mungu Ng’olo ya Ebiwotho kugi

¹² E Musa wacu ni Yehova kumae, Nen, iwacu ira kumae, Ikel dhanu maeni malu: man fodi iketho ang’eyo ngo pi ng’atu m’ibiorowa wakude. Ento iwacu kumae, Ang’eii ku nyingi, man inwang’u bero bende i wang’a.

¹³ Ka kumeno kawono, akwei, tek anwang’u bero i weng’i, kawono nyuth ira yo peri, kara ang’eii, kara anwang’ bero i weng’i: man ipid pi thek maeni nia gi dhanu peri.

¹⁴ Man ewacu kumae, Wang’a biwotho karacelo kudi, man abimio iri yom.

¹⁵ Man ewacu ire kumae, Tek weng’i cidho karacelo kuda ngo, kud iterwa ku keni.

¹⁶ Kum jubing’eyo ni kum ang’o nia anwang’u bero i weng’i, an ku dhanu peri? en e kum wacidho karacelo kudu ngo, ketho nia wakoira, waku dhanu peri, ni dhanu ceke ma gini i wang’ ng’omi?

¹⁷ E Yehova wacu ni Musa kumae, Abitimo gin maeni bende m’iyero; kum inwang’u bero i wang’a, man ang’eii ku nyingi.

¹⁸ Man ewacu kumae, Akwei, nyuth ira dwong’ peri.

¹⁹ Man ewacu kumae, Abiketho bero para ceke kadhu i weng’i, man abiyero nying’ Yehova i weng’i; man ngisi binega kum ng’atu ma ngisi nega i kume, man abinyutho kisa ni ng’atu m’abinyutho kisa ire.

²⁰ Man ewacu kumae, Icopo neno wang’a ngo; kum dhanu binena ngo man ekwo.

²¹ Man Yehova wacu kumae, Nen, kaka nuti i ng’eta, man ibicungo wi cana:

²² man ebitimbre, kinde ma dwong’ para kadhu, nia abikethi i um cana, man abiumi ku cinga cil m’akadhu ko:

²³ e abikabu cinga, man ibineno ng’eya; ento wang’a binendre ngo.