Ai 31 - The Holy Bible In Alur (Lur) Revised Orthography

Lwong’o pa Bezalel Gikud Aholiab

¹ Man Yehova yero ni Musa, ewacu kumae,

² Nen, alwong’o Bezalel ma wod Uri, ma wod Hur, mi suru pa Yuda ku nyinge:

³ man apong’e ku Tipo Mungu, ku rieko, man ng’eyothelembe, ku ng’eyong’ec, man bodho mi tic ma kwonde tung’ tung’ ceke,

⁴ kara epar pi tic mi bodho, kara etim ku mola ma kwar, man ku mola ma tar, man ku mola,

⁵ ku mi tong’o kidi mir amwona, man i ng’iko yen, kara utim tic mi bodho ma kwonde tung’ tung’ ceke.

⁶ Man an, nen, aketho Aholiab, ma wod Ahisamak, mi suru pa Dan karacelo kude; man aketho rieko i adunde dhanu ceke m’adundegi riek, kara gitim gin ceke m’ang’olo iri:

⁷ hema mi cokri, man sanduk mi lembatuca, man kabedomikisa ma ni i wie, ku jamni ceke mi Hema,

⁸ man mesa kud agulune, man thethala ma leng’ kud agulune ceke, man pemblam mir udok ma ng’wice ng’ar,

⁹ man pemblam mi lam m’awang’a kud agulune ceke, man jamblogo ku there,

¹⁰ man kendi ma jutimo cu, man kendi ma leng’ pa Harun ma jalam, ku kendi mi wote, mi timotim i tic ma pa jalam,

¹¹ man mo m’awira, kud udok ma ng’wice ng’ar mi yath ma jwa jwa ma lim lim pi kamaleng’: gitim calu gin ceke m’ang’olo iri.

Sabatu ma Giranyutha

¹² E Yehova yero ni Musa, ewacu kumae,

¹³ Yer ni nyithindho mir Israel bende, wac kumae, Wugwok sabatu para andha: kum en e giranyutha i kindwa wakudu cil i dhanum’utuk mu ceke; kara wung’ei nia an a Yehova m’udwokowu leng’

¹⁴ Ka kumeno wukwir ceng’ sabatu; kum en e leng’ iwu: ku ba dhanu ceke m’ucide jubiketho etho andha; kum ng’atu ma tek utimo tic moko i ie, jubikabu ng’eyong’ec maeno woko ku kind juthugi.

¹⁵ Jutim tic ceng’ abusiel; ento ceng’ mir abirone en e sabatu mi yom mandha, e leng’ ni Yehova; ng’atu ma tek utimo tic moko i ceng’ sabatu, jubiketho etho andha.

¹⁶ Kum kumeno nyithindho mir Israel bikwiro ceng’ sabatu, kara giwor ceng’ sabatu i kind dhanum’utuk migi ceke, mi lembariba mi nja.

¹⁷ En e giranyutha i kindwa waku nyithindho mir Israel mi nja: kum Yehova timo polo ku ng’om i ceng’ abusiel, man i ceng’ mir abirone eyom, man edwoko cwinye.

Nyathi Dhiang’ mi Mola ma Kwar

¹⁸ Man emio ban ario mi lembatuca ni Musa, ban mi kidi, m’ubedo agora ku lwet Mungu, kinde m’edaru weco kude wi got Sinai.