Ai 30 - The Holy Bible In Alur (Lur) Revised Orthography

Pemblam mir Udok ma Ng’wice Ng’ar

¹ Man itim pemblam mi wang’u udok ma ng’wice ng’ar i wie: time ku yendulu.

² Kaborne bibedo bot acel, man kalacne bot acel; dhoge ang’wen bibedo rom rom; man kadongone bibedo bot ario: tunge bibedo mi piny acel karacelo kude.

³ Man imwone ku mola ma kwar ma leng’, wiene, man ng’ete m’utieke gbur, man tunge; man itim ruko mi mola ma kwar i kume utieke gbur.

⁴ Man itim wende ario mi mola ma kwar the rukone; wi wel ng’ete ario, itimgi wi ng’ete ario; e gibibedo kaka mi yen ma juyeye kudo.

⁵ Man itim yende ku yendulu, man imwongi ku mola ma kwar.

⁶ Man ikethe i wang’ kusikabongu ma ni ceng’ni sanduk mi lembatuca, i wang’ kabedomikisa ma ni i wi lembatuca, ka ma wabirombo ie wakudi.

⁷ Man Harun biwang’u udok ma ng’wice ng’ar mi yath ma jwa jwa ma lim lim i wie: ku ba kugweno, kinde m’eyiko thala, ebiwang’e.

⁸ Man kinde ma Harun ucwinyo thala uthieno, ebiwang’e, en e udok ma ng’wice ng’ar ma thiri thiri i wang’ Yehova i kind dhanum’utuk mu.

⁹ Kud wuthier udok ma ng’wice ng’ar ma tung’ i wie, kadi lam m’awang’a, kadi lam mi mogo; man kud wukonj lam m’amadha i wie.

¹⁰ Man Harun bitimo adunya wi tungene wang’ acel i rundi; ebitimo adunya i wie i kind dhanum’utuk mu wang’ acel i rundi acel ku rimo mi lam mi dubo mir adunya: en e leng’ m’usagu ni Yehova.

Sente mir Adunya

¹¹ Man Yehova yero ni Musa, ewacu kumae,

¹² Kinde m’igamu wel mi nyithindho mir Israel, calku welgi ma jukwanu kubang’gi kubang’gi ng’atuman bilund mio jambwar mi ng’eyong’ec pare ni Yehova, kinde m’ikwanugi; kara thong’om kud ubed nuti i kindgi, kinde m’ikwanugi.

¹³ Ku ba dhanu ceke m’ukadhu i kind ju ma jukwanugi, gibimio maeni: ng’et cekel calu cekel mi kamaleng’ (cekel en e gera pier ario), ng’et cekel ni girathiera ni Yehova.

¹⁴ Ku ba dhanu ceke m’ukadhu i kind ju ma jukwanugi, m’ugambre kum rundi pier ario ku ma sagu, bimio girathiera pa Yehova.

¹⁵ Jalonyo kud umi ma sagu, man jacan de kud umi m’uromo ngo, ndhu ng’et cekel, kinde ma gimio girathiera pa Yehova, kara utim adunya pi ng’eyong’ec mu.

¹⁶ Man igam sente mir adunya ku ba nyithindho mir Israel, man ikethe mi timotim i hema mi cokri; kara ebed ni poi ni nyithindho mir Israel i wang’ Yehova, kara utim adunya pi ng’eyong’ec mu.

Jamblogo mi Mola

¹⁷ E Yehova yero ni Musa, ewacu kumae,

¹⁸ Tim jamblogo bende mi mola, man there mi mola, ma julogo i ie. Man ikethe i dier hema mi cokri ku pemblam, man ikonj pi i ie.

¹⁹ Man Harun ku wote gibilwoko cing’gi ku tiendgi i ie:

²⁰ kinde ma gicidho i hema mi cokri, gibilogo ku pi, kara ku githo; kadi kinde ma gicoro ceng’ni pemblam kara gitim tim, giwang’ lam ma jutimo kumae ni Yehova.

²¹ Kum kumeno gibilwoko cing’gi ku tiendgi, kara ku githo: man ebibedo ni cik mi nja igi, en e ire man ni kodhine i kind dhanum’utuk migi.

Mo M’awira kud Udok ma Ng’wice Ng’ar

²² Man ke Yehova yero ni Musa, ewacu kumae,

²³ Gam iri yath ma ng’wice ng’ar ma cu: kum udok ma liu ma ng’wice ng’ar cekel dak abic, man ng’et maeno mir apoka yen ma lim lim, en e cekel dak ario ku pier abic, man kum thiang’ ma lim lim cekel dak ario ku pier abic,

²⁴ man kum apoka yen ma lim lim cekel dak abic, calku cekel mi kamaleng’, man mi moj yau i amorpi acel;

²⁵ man itime ni mo ma leng’ m’awira, gin ma ng’wice ng’ar ma jujebo ku rieko pa jabodho mi gin ma ng’wice ng’ar: ebibedo mo m’awira ma leng’.

²⁶ Man iwir hema mi cokri kudo, man sanduk mi lembatuca,

²⁷ man mesa kud agulune ceke, ku thethala kud agulune ceke, man pemblam mir udok ma ng’wice ng’ar,

²⁸ ku pemblam mi lam m’awang’a karacelo kud agulune ceke, ku jamblogo man there.

²⁹ Man idwokgi leng’, kara gibed leng’ m’usagu: gin ceke ma tek umulogi bibedo leng’.

³⁰ Man iwir Elarun ku wote, man idwokgi leng’, kara gitim tim ira i tic ma pa jalam.

³¹ Man iyer ni nyithindho mir Israel, iwac kumae, Maeni bibedo mo m’awira ma leng’ ira i kind dhanum’utuk mu ceke.

³² Jubikonje wi ring’kum mi dhanu ngo, kadok moko ma calu maeni de kud wutim, calku jambe ma ni i ie: en e leng’, man ebibedo leng’ iwu.

³³ Ng’atu ma tek ujebo moko calu maeni, kadi ng’atu ma tek ukonjo kume moko wi jawirok, jubikabe woko ku ba juthugi.

³⁴ Man Yehova wacu ni Musa kumae, Gam iri yath ma lim lim ma jwa jwa, en e udok ma ng’wice ng’ar, man apoka rec, kud udok ma ng’wice ng’ar ma tung’; yath ma lim lim ma jwa jwa karacelo kud udok ma ng’wice ng’ar ma leng’: pekne kubang’e kubang’e bibedo rom rom;

³⁵ man itim udok ma ng’wice ng’ar kude, gin ma ng’wice ng’ar calku rieko pa jabodho, mi gin ma ng’wice ng’ar, ma juketho kadu rome, ma ie leng’ man ma leng’:

³⁶ man ifod kume moko thindho thindho, man ikethe i wang’ lembatuca i hema i cokri, ka ma wabirombo ie wakudi: ebibedo iwu leng’ m’usagu.

³⁷ Man udok ma ng’wice ng’ar m’ibitimo, calku jebne kud wutim iwu giwu: ebibedo leng’ iri ni Yehova.

³⁸ Ng’atu ma tek bitimo calu maeno, kara eng’wiye, jubikabe woko ku ba juthugi.