Ai 28 - The Holy Bible In Alur (Lur) Revised Orthography

Kendi mi Julam

¹ Man igam Harun m’umeru bin ceng’ni in, man wote karacelo kude, kud i kind nyithindho mir Israel, kara etim ira i tic ma pa jalam, en e Harun, ku Nadab man Abihu, ku Eleazar man Ithamar, ma wot Harun.

² Man itim kendi ma leng’ ni Harun m’umeru, mi dwong’ man mi bero.

³ Man iyer ni dhanu ceke m’adundegi riek, m’apong’ogi ku tipo mi rieko, ya gitim kendi pa Harun kara udwoke leng’, kara etim ira i tic ma pa jalam.

⁴ Man maeni kendi ma gibitimo: jambkor, kud ugoke, ku kendi ma lot, ku kanzu mi tic ma cuku cuku, man jambtwic mi wie, ku thondhpier: man gibitimo kendi ma leng’ ni Harun m’umeru, man wote, kara etim ira i tic ma pa jalam.

⁵ Man gibigamu mola ma kwar, ku m’ulweku, ku m’uluga, man ma kwar ngbo, ku bongu ma nwang’ ma ber.

⁶ Man gibitimo ugoke ku mola ma kwar, man m’ulweku, man m’uluga, ku ma kwar ngbo, man bongu ma nwang’ ma ber m’awia, ma tic pa jabodho ma riek.

⁷ Ebibedo ku jambgok ario m’uribre kum kajikne ario, kara eribre karacelo.

⁸ Man jambtwic ma ni i wie, ma jucwio ku rieko, ma jutwie kudo, bibedo calu ticne man mi piny acel; mi mola ma kwar, mi m’ulweku, man m’uluga, man ma kwar ngbo, man bongu ma nwang’ ma ber m’awia.

⁹ Man igam kidi ario ma tek ma ju kite, man ing’ik nying’ nyithindho mir Israel i kumgi:

¹⁰ nying’gi abusiel wi kidi acel, man nying’gi abusiel m’udong’ wi kidi mucelo, calku kanyol migi.

¹¹ Ng’ik kidi ario, calu nying’ nyithindho mir Israel, calku tic pa jabodho ma kum kidi, calu ng’ik mir ayi, roigi i jambgwok mi mola ma kwar.

¹² Man iketh kidi ario wi jambgok mir ugoke, kara ubed ni kidi mi poi ni nyithindho mir Israel: man Harun biyeyo nying’gi i wang’ Yehova wi goke ario ni poi.

¹³ Man itim jambgwok mi mola ma kwar,

¹⁴ man itim nyoro ario ku mola ma kwar ma leng’; timgi calu thol mi tic m’awia: man iketh nyoro m’awia i jambgwok.

¹⁵ Man itim jambkor mi lembapoka, ma tic pa jabodho ma riek; itime calu tic mir ugoke; rime ku mola ma kwar, man m’ulweku, man m’uluga, man ma kwar ngbo, ku bongu ma nwang’ ma ber m’awia.

¹⁶ Dhoge ang’wen bibedo rom rom man wi wadi; kaborne bibedo ro ku laccing’ m’arieya, man kalacne de ro ku laccing’ m’arieya.

¹⁷ Man iketh kidi mi jambgwok i ie, wang’e ang’wen mi kidi: wang’e mi kidi ma kwar ngbo, kidi ma ie nen calu lum, man kidi ma calu lum bibedo wang’e ma ku kwong’ane;

¹⁸ man wang’e mir arionde bibedo kidi ma kwar, kidi ma tek ma ie nen uluga, man kidi ma tar ma rieny;

¹⁹ man wang’e mir adege kidi m’uluga ma fura fura, ku kidi ma tek m’athobi, man kidi ma pili pili;

²⁰ man wang’e mir ang’wende kidi ma col calu nam, man kidi ma tek ma ju kite, man kidi ma ju kite ma pii pii: jubimwonogi i mola ma kwar i jambgwokne.

²¹ Man kidine bibedo calku nying’ nyithindho mir Israel, apar wi ario, calku nying’gi; gibibedo mi sura apar wi ario, calku ng’ik mir ayi, kubang’e kubang’e calku nyinge.

²² Man itim nyoro calu thol mi jambkor, mi tic mir awia mi mola ma kwar ma leng’.

²³ Man itim gwilo ario mi mola ma kwar wi jambkor, man iketh gwilo ario i kajik ario mi jambkor.

²⁴ Man iketh nyoro ario mi mola ma kwar m’awia i gwilo ario ma ni i kajik mi jambkor.

²⁵ Man iketh kajik ario mange mi nyoro ario m’awia wi jambgwok ario, man ikethgi wi jambgok mir ugoke i ng’ete ma yor i wang’.

²⁶ Man itim gwilo ario mi mola ma kwar, man ikethgi wi kajik mi jambkor, wi dhoge, ma en e yo ng’et ugoke yor i ie.

²⁷ Man itim gwilo ario mi mola ma kwar, man ikethgi kum jambgok ario mir ugoke yo piny, yor i wang’e, ceng’ni karibne, wi jambtwic mir ugoke ma jucwio ku rieko.

²⁸ Man gibitwio jambkor ku gwilone kum gwilo mir ugoke ku thol m’uluga, kara ebed wi jambtwic mir ugoke ma jucwio ku rieko, man kara jambkor kud ugonjre ku kum ugoke.

²⁹ Man Harun biyeyo nying’ nyithindho mir Israel wi jambkor mi pokolembe wi adundene, kinde m’emondo i kamaleng’, ni jambpoi i wang’ Yehova thiri thiri.

³⁰ Man iketh Urim ku Thumim i jambkor mi pokolembe; man gibibedo wi adunde Harun, kinde m’emondo i wang’ Yehova: man Harun biyeyo pokolembe mi nyithindho mir Israel wi adundene i wang’ Yehova thiri thiri.

³¹ Man itim kanzu mir ugoke ceke m’uluga.

³² Man ebibedo ku kinde ma thwolo i diere mi wie: ebibedo ku dhoge mi tic m’acwia m’utieko kinde ma thwolo, calu kinde ma thwolo mi kanzu mir umbu, kara kud eyeci.

³³ Man itim nying ulemo m’ulweku, man m’uluga, man ma kwar ngbo, wi kendi ma yor i tielo m’utieko kume ma yor i tielo gbur; man ngara mi mola ma kwar i kindgi m’utieke gbur:

³⁴ ngara mi mola ma kwar ku nying ulemo, ngara mi mola ma kwar ku nying ulemo, kum kanzu gbur yor i tielo.

³⁵ Man ebibedo kum Harun mi timotim: man bang’e biwinjre kinde m’emondo i kamaleng’ i wang’ Yehova, man kinde m’ewok woko, kara kud etho.

³⁶ Man itim ban mi mola ma kwar ma leng’, man ing’ik i wie, calu ng’ik mir ayi kumae, LENG’ NI YEHOVA.

³⁷ Man ikethe wi thol m’ulweku, man ebibedo wi jamb wie; ebibedo wi jamb wie yor i wang’e.

³⁸ Man ebibedo wi ter nyim Harun, man Harun biyeyo kier mi gin ma leng’, ma nyithindho mir Israel bidwokogi leng’ i giramia migi ceke ma leng’; man ebibedo i ter nyime thiri thiri, kara jujolgi i wang’ Yehova.

³⁹ Man icwi kanzu i tic mi girakieda mi bongu ma nwang’ ma ber, man itim jamb wie ku bongu ma nwang’ ma ber, man itim thondhpier, tic pa jabodho mi kwoc mi ruko.

⁴⁰ Man itim kanzu ni wot Harun, man itim thondhpier igi, man itim igi jambwic, mi dwong’ man mi bero.

⁴¹ Man ikethgi i kum Harun m’umeru, man kum wote karacelo kude, man iwirgi, man ithiergi, idwokgi leng’ de, kara gitim ira i tic ma pa jalam.

⁴² Man itim igi bongu mi tielo mi bongu ma nwang’ kara uum ring’kum mi muneru migi; ugambre i pier utundo kum bamb;

⁴³ man gibibedo kum Harun, man kum wote, kinde ma gimondo i hema mi cokri, kadi kinde ma gicoro ceng’ni ba pemblam kara gitim giratima i kamaleng’; kara ku giyei kier, man githo: ebibedo ni cik mi nja ire man ni kodhine yo ng’eye.