Ai 23 - The Holy Bible In Alur (Lur) Revised Orthography

Lembang’ola ma Jutim ko Cu

¹ Kud irwei lembe mi ndra: kud iketh cingi karacelo ku judubo ma nia ibed jamulembe mir abombi.

² Kud ilub udul dhanu ma nia itim rac: kadok aweca de kud iwec i lembe moko mi lokri cen tok udul dhanu kara unyoth lembapoka ma pwe:

³ kadok ng’atu ma jacan kud imare i lembe pare.

⁴ Tek irombo ku koni dhiang’ kadi kana pa jadegi peri m’uberwinyo, dwoke kendo i bang’e andha.

⁵ Tek ineno kana pa ng’atu m’udegi podho the ter pare, man iceri ya kud ikonye, ibigonye andha karacelo kude.

⁶ Kud inyoth lembapoka ma pwe pa jacan i lembe pare.

⁷ Bed bor ku lem ndra; man ju ma lembe mbe i wigi ku ju ma pwe kud ineggi: kum abigonyo lembe ma wi judubo ngo.

⁸ Man kud igam jamblembe: kum jamblembe eoro wang’ ju ma neno piny, man enyotho lembe mi ju ma pwe.

⁹ Man kud isend umondo: kum wung’eyo adunde mir umondo, kum wun de wukowubedo umondo i ng’om Misiri.

Rundi mir Abirone ku Ceng’ mir Abirone

¹⁰ Coi ng’om peri rundi abusiel, man icok nyaine:

¹¹ ento rundi mir abirone wek eyom man evut lwe, kara jucan mi dhanu peri gicam: man gin ma giweko yedi m’i thim bicamu. Tim kumeno kum podho mir ulok peri, man kum podho mir ulam peri.

¹² Tim tic peri ceng’ abusiel, man iyom i ceng’ mir abirone; kara koni dhiang’ peri ku kana peri giyom, man wod bong’ peri, man umondo, gidwok cwinygi.

¹³ Man wuketh cwinywu kum gin ceke m’ayero iwu: man kud wuwec pi nying’ mungu mange, kadi ku juwinj maeni i dhogi.

Agba Adek ma Juketho

¹⁴ Kwir agba ira wang’ adek i rundi acel.

¹⁵ Kwir agba mi kwen ma thobi mbe i ie: cam kwen ma thobi mbe i ie ceng’ abiro, calu ang’olo iri, i nindo ma jung’olo i dwi Abib (kum iai woko kud i Misiri i ie); man ng’atu moko kud uwok i wang’a ma cinge nanu:

¹⁶ man agba mi palacam, mwoka mi tic mi muli peri, m’icoyo i podho: man agba mi coko i kakan, i kajik mi rundi, kinde m’icoko i tic mi muli peri kud i podho.

¹⁷ Ju ma co peri ceke binyuthri i wang’ Rwoth Yehova wang’ adek i rundi acel.

¹⁸ Kud ithier rimo mi lam para ku kwen ma thobi ni i ie; kadok mio mir agba para kud uvut bu cil kugweno.

¹⁹ Kel landu mwoka mi ng’om peri i ot pa Yehova Mungu peri. Kud ited nyathi diel ku cag min.

Yehova Oro Malaika Pare Nitelo wi Juisraeli

²⁰ Nen, aoro malaika i weng’i, kara ugwoki i yo, man uteri i ka m’ayiko.

²¹ Wugwokru i wang’e, man wuwinj dwande; kud wunyai ng’ecwiny i ie; kum ebiweko kier mu ngo: kum nyinga ni i ie.

²² Ento tek ibiwinjo dwande andha, man ibitimo gin ceke m’ayero; e abilund bedo jadegi mi judegini, man jasend mi jusend peri.

²³ Kum malaika para bitelo yo i weng’i, man ebiroii ba Jaamori, man Jahiti, ku Japerizi, man Jakanani, ku Jahivi, ku Jayebusi: man abikabugi cen.

²⁴ Kud irum piny ni mungu migi, kadi atima de kud itim igi, kadi kud itim calu tic migi de; ento ibing’ielogi pet, man ibituro mbegi migi nziki nziki.

²⁵ Man wutim ni Yehova Mungu mu, e ebimio mugisa kum kwen peri, man pi peri; man abikabu tho kud i kindi.

²⁶ Ng’atu moko mbe ma ie bidubre, kadi ma bibedo mugumba, i ng’om peri: abiketho wel nindo peri tundo kakare.

²⁷ Abioro ndiri para i weng’i, man abisendo dhanu ceke m’ibibino i bang’gi, man abiketho judegini ceke loko ng’eigi iri.

²⁸ Man abioro pino i weng’i, ma biriemo Jahivi woko, ku Jakanani, man Jahiti, kud i weng’i.

²⁹ Abiriemogi woko kud i weng’i ngo i rundi acel, ng’om umaru doko ni uvuru, man yedi m’i thim umedre i kumi.

³⁰ Abiriemogi woko kud i weng’i nok nok, maram ibinyai ko, man imwony ko ng’om.

³¹ Man abiketho kieu peri gambre kum Nam Makwar cil ba nam mi Jufilisti, man ku ba langa cil kum Kulo: kum abiketho dhanu m’i ng’ombe i cingi; man ibiriemogi woko kud i weng’i.

³² Kud irib lembe moko kugi, kadi ku mungu migi.

³³ Ku gibed i ng’om peri, gimaru ketho idub ira; kum tek itimo ni mungu migi, ebibedo ni uwic iri andha.