Ai 20 - The Holy Bible In Alur (Lur) Revised Orthography

Cik Apar

¹ Man Mungu yero lembe maeni ceke, ewacu kumae,

² An a Yehova Mungu peri, m’uwodhi woko kud i ng’om Misiri, kud i ot mi ng’eca.

³ Kud ibed ku mungu mange ndhu an.

⁴ Kud itim ayi m’ang’ika iri, kadi ayi gin moko ma malu i polo, kadi ma piny i ng’om, kadi ma ni i pi the ng’om:

⁵ kud irum piny i bang’gi, kadi kud itim igi; kum an a Yehova ma Mungu peri a Mungu ma janyeko, m’aketho dubo mi wego wi nyithindho, wi dhanum’utuk mir adege ku mir ang’wende mi ju m’udaga,

⁶ m’anyutho kisa ni rubanga mi ju m’umara m’uworo lembang’ola para.

⁷ Kud ilwong’ nying’ Yehova Mungu peri mananu; kum ng’atu m’ulwong’o nyinge mananu bibedo umbe dubo ngo ku ba Yehova.

⁸ Poi kum ceng’ sabatu, idwoke leng’.

⁹ Tim tic ceng’ abusiel, tim tic peri ceke;

¹⁰ ento ceng’ mir abirone en e sabatu ni Yehova Mungu peri; kud itim tic moko i ie, in, kadi wodi, kadi nyeri, kadi jamiru peri, kadi bong’ peri, kadi lim peri, kadi jawirok peri ma ni i gang’ peri:

¹¹ kum Yehova timo polo ku ng’om i ceng’ abusiel, ku nam, ku giki ceke ma ni i ie, man eyom i ceng’ mir abirone: kum kumeno Yehova mio mugisa kum ceng’ sabatu, man edwoke leng’.

¹² Yung wuru ku meru, kara nindo peri ng’ad i ng’om ma Yehova Mungu peri mio iri.

¹³ Kud ineg nek.

¹⁴ Kud idubri swa.

¹⁵ Kud ikwal kwo.

¹⁶ Kud ibal wedu.

¹⁷ Kud iketh cwinyi hai kum ot pa wedu, kud iketh cwinyi hai kum ci wedu, kadi kum jamiru pare, kadi kum bong’ pare, kadi dhiang’ pare, kadi kana pare, kadi gin moko ma wedu bedo ko.

Lworo mi Dhanu

¹⁸ Man dhanu ceke neno morpolo, ku lukoth, ku dwand agwara, man got m’uthwugo yiro: e ka dhanu neno maeni, kumgi miel, man gicungo ku bor.

¹⁹ Man giwacu ni Musa kumae, Wec i bang’wa in, e wabiwinjo; ento Mungu kud uwec i bang’wa, wamaru tho.

²⁰ E Musa wacu ni dhanu kumae, Lworo kud unegwu: kum Mungu bino mulo iwu, man kara lworo pare bed i weng’wu, kara kud wudubi.

²¹ E dhanune gicungo ku bor, man Musa eoro ceng’ni ba mudho ma bii ka ma Mungu ni i ie.

Cik mi Pemblam

²² E Yehova wacu ni Musa kumae, Ibiwacu kumae ni nyithindho mir Israel. Wun giwu wuneno nia aweco kudu kud i polo.

²³ Kud wutim mungu mange karacelo kuda; mungu mi mola ma tar, kadi mungu mi mola ma kwar, kud wutim iwu.

²⁴ Tim pemblam mi ng’om ira, man ilam lam m’awang’a peri i wie, ku lam mi kwiocwiny peri, rombe peri, ku koni dhiang’ peri: ku ba ka ceke m’aketho jupoi pi nyinga i ie abibino i beng’i man abimio mugisa iri.

²⁵ Man tek iguro pemblam ira mi kidi, kud igure ku kidi m’apaya; kum tek iting’o umbu peri i wie, nwang’u icide.

²⁶ Kadok malu ba pemblam para de kud iidh ku giraidha, kara muneru peri kud unen i wie.