Ai 18 - The Holy Bible In Alur (Lur) Revised Orthography

Yethro Liewo Musa

¹ Nie Yethro, ma jalam mi Midian ma jalkwaru Musa, winjo gin ceke ma Mungu timo ni Musa, man ni Israel ma dhanu pare, maram Yehova wodho ko Israel kud i Misiri.

² Man Yethro, ma jalkwaru Musa, ugamu Zipora, ma dhaku pa Musa, yo ng’ei m’eore ecidhi,

³ man wote ario; ma nying’ ng’atu acel en e Gercom; kum ewacu kumae, Abedo ni umondo i ng’om mi juwirok:

⁴ man nying’ mucelo en e Eliezer; kum ewacu kumae, Mungu pa vwa en e konyna, man ebodha ni palamularu pa Farao.

⁵ Man Yethro, ma jalkwaru Musa, ubino ku wote man dhaku pare de ba Musa i langa ka m’egonjo i ie, ba got pa Mungu:

⁶ man ewacu ni Musa kumae, An, a jalkwaru ma Yethro, abino i beng’i, ku dhaku peri, man wote ario karacelo kude.

⁷ E Musa wok woko kara eromb ku jalkwaru mire, man emm piny, e ecwio limbe de; man gipenjri ram gibedo ko; e gimondo i hema.

⁸ E Musa yero ni jalkwaru mire gin ceke ma Yehova timo kum Farao man kum Jumisiri pir Israel, ku masendi ceke m’uwok i kumgi i yo, man maram Yehova bodho kogi.

⁹ E anyong’a nego Yethro kum bero ma Yehova timo kum Israel, m’ebodho kogi kud i cing’ Jumisiri.

¹⁰ Man Yethro wacu kumae, Mugisa bed ni Yehova, m’ebodhowu kud i cing’ Jumisiri, man kud i cing’ Farao; m’ebodho dhanu kud i cing’ Jumisiri.

¹¹ Kawono ang’eyo nia Mungu e dit ma sagu mungu ceke; eyo, i gin ma gitimo ie ku kuhaya i kumgi.

¹² Man Yethro, ma jalkwaru Musa, ugamu lam m’awang’a ku lam ni Mungu: e Harun ubino, ku judongo ceke mir Israel, kara gicam kwen karacelo ku jalkwaru Musa i wang’ Mungu.

Jucaku Jupoklembe

¹³ Man etimbre urwone, nia Musa bedo kara epok lembe ni dhanu: e dhanune gicungo ba Musa ugambre kugweno cil uthieno.

¹⁴ E kinde ma jalkwaru Musa neno gin ceke m’etimo ni dhanu, ewacu kumae, Maeni lembang’o m’itimo ni dhanu? nedi ibedo i kendi, man dhanu ceke gicungo i vuti ugambre kugweno cil uthieno?

¹⁵ Man Musa wacu ni jalkwaru mire kumae, Kum dhanu gibino i bang’a kara gipenj lembe ba Mungu:

¹⁶ kinde ma gibedo ku lembe gibino i bang’a; man apoko lembe i kind dhanu ku jadhugola pare, man aketho ging’ei lembang’ola pa Mungu, ku cik pare.

¹⁷ Man jalkwaru Musa wacu ire kumae, Gin m’itimo e ber ungo.

¹⁸ Ibivoc andha, in, ku dhanu maeni ma gini karacelo kudi: kum ginduni e pek iri m’usagu; kum icopo time i kendi ngo.

¹⁹ Kawono winj dwanda, abimio iri lembapora man Mungu bed karacelo kudi: ibed ni dhanu yo ba Mungu, man iter lembe ba Mungu:

²⁰ man ibiponjogi ku lembang’ola ku cik, man ibinyutho igi yo ma maku giwoth i ie man tic ma maku gitim.

²¹ Man ke ibinwang’u dhanu ma cu kud i kind dhanu ceke, wadi dhanu ma julwor Mungu, dhanu mandha, m’udagu azindi; man ibiketho wadi joni i wigi, kara gibed ni jego wi rubanga, jego wi dak, jego wi pier abic, man jego mir apar:

²² man wek gipok lembe mi dhanu i nindo ceke: man ebibedo, nia ku ba lembe ceke ma dongo gibikelo i beng’i, ento ku ba lembe ceke ma thindho gibipoko gigi: kum kumeno ebibedo yot ma sagu iri giri, man gibiyeyo ter karacelo kudi.

²³ Tek ibitimo gin maeni, man Mungu beng’olo iri kumeni, e ibicopo bedo, e dhanu maeni ceke bende gibicidho kakagi ku kwiocwiny.

²⁴ Kum kumeno Musa winjo dwand jalkwaru mire, man etimo ceke m’ewacu.

²⁵ Man Musa goyo wi dhanu ma cu ku kind Israel ceke, man ekethogi ni wie wi dhanu, jego mi rubanga, jego mi dak, jego mi pier abic, man jego mir apar.

²⁶ E gipoko lembe mi dhanu i nindo ceke: lembe ma tek gikelo ba Musa, ento ku ba lembe ceke ma thindho gipoko gigi.

²⁷ E Musa weko jalkwaru mire cidhi; e ecidho i yo pare i ng’om pare ma dhe.