Ai 15 - The Holy Bible In Alur (Lur) Revised Orthography

Wer pa Musa

¹ Musa ku nyithindho mir Israel gilund giwero wer maeni ni Yehova, man giyero, giwacu kumae, Abiwero ni Yehova, kum eloyo m’usagu: Riuni ku ng’atu m’i wie ebolo i nam.

² Yehova en e tego para ku wer para, Man edoko ni both para: Maeni Mungu para, man abipake; En e Mungu pa vwa, man abiyunge.

³ Yehova en e ng’atu mir ali: Yehova en e nyinge.

⁴ Magali pa Farao man udul pare ebolo i nam; Man jego pare ma jufoyo gimwony i Nam Makwar.

⁵ Pi ma thuth uumogi: Gimwony piny i pi ma thuth calu kidi.

⁶ Cingi ma yor acwic, E Yehova, dwong’ i tego, Cingi ma yor acwic, E Yehova, ng’enyo jadegi nziki nziki.

⁷ Iredho ju m’uai i kumi ku dit mi tego peri: Ioro kwinyo peri, ewang’ugi calu soka.

⁸ Man pi tingre ni kum lietho mi odi umi, Ngongo pi cungo atira ni thiro: Pi ma thuth umoko i adunde nam.

⁹ Jadegi wacu kumae, Abiriemo, abirubo, abipoko ayeki; Yeny ma ia yenyo biromo i kumgi: Abidhuyo palamularu para, cinga binyothogi.

¹⁰ Ikoto ku yamu peri, nam uumogi: Gimwony i pi ma dit calu umbu mi nying atum.

¹¹ Ng’a ma calu in i kind mungu, E Yehova? Ng’a ma calu in, ma dwong’ i leng’ne, Ma janyai ndiri i pak, m’ibetimo musana?

¹² Irieyo cingi ma yor acwic, Ng’om umwonyogi.

¹³ Itelo wi dhanu m’iwaru ku kisa peri: Itelo wigi ku tego peri ba kabedo peri ma leng’.

¹⁴ Kodhidhanu winjo, kumgi miel: Ndiri maku jubedo mi Filistia.

¹⁵ Judongo mir Edom cwinygi lund ung’abre; Dhanu ma jukero mi Moab, mielkum umakugi: Dhanu m’ubedo i Kanan ceke giloi.

¹⁶ Ndiri ku bebe podho i wigi; Giling’ calu kidi ni kum dit mi boti; Maram dhanu peri kadhu ko, E Yehova, Maram dhanu m’ing’iewo kadhu ko.

¹⁷ Ibiroyogi, man ibipidhogi wi got mir aba peri, Ka m’itimo iri kara ibed i ie, E Yehova, Kamaleng’, E Rwoth, ma cingi ketho.

¹⁸ Yehova bicamu ker nja ku nja.

¹⁹ Kum riuni pa Farao ku magali pare ku weg riuni pare mondo i nam, man Yehova kelo pi mi nam i wigi; ento nyithindho mir Israel giwotho ku wi ng’om m’uthwo i die nam.

²⁰ Man Miriem ma jabila ma dhaku, ma nyamin Harun, umaku umbukulumbu i cinge; man mon ceke gilubo toke kud umbukulumbu ku miel.

²¹ Man Miriem uloko igi lembe kumae, Wuwer ni Yehova, kum eloyo m’usagu; Riuni ku ng’atu ma ni i wie ebolo i nam.

Pi ma Kec mi Mara

²² E Musa telo wi Israel asu ku ba Nam Makwar, man giwok i yamba mi Cur; man giwotho ceng’ adek i yamba, e ginwang’u pi ngo.

²³ Man kinde ma giwok Mara, gicopo madhu pi mi Mara ngo, kum gi kec: ka kumeno gilwong’o nyinge Mara.

²⁴ E dhanu ging’ur kum Musa, giwacu kumae, Wabimadhu ang’o?

²⁵ Man elwong’o Yehova; e Yehova nyutho ire yen, man ebole i pi, man pi doko mit. Etimo igi cik ku lembapoka keca, man emulo igi keca;

²⁶ man ewacu kumae, Tek ibiwinjo dwand Yehova Mungu peri cu, man ibitimo gin m’atira i wang’e man ibieiko ithi kum lembang’ola pare, e ibiworo cik pare de ceke, abiketho tho moko i kumi ngo m’aketho i kum Jumisiri: kum an a Yehova m’ukeyo kumi.

²⁷ E gibino Elim, ka ma kulo mi pi apar wi ario ni i ie, man thith pier abiro: e gigonjo keca dhu pi.