Ai 14 - The Holy Bible In Alur (Lur) Revised Orthography

Kadhu Nam Makwar

¹ Man Yehova yero ni Musa, ewacu a kumae,

² Wac ni nyithindho mir Israel nia gidok cen man gigonj i wang’ Pi-hahiroth, i kind Migdol ku nam, i wang’ Bal-zefon: wubigonjo yor i kume dhu nam.

³ Man Farao biwacu pi nyithindho mir Israel kumae, Ginwengri i ng’om, langa ciko bang’gi.

⁴ E abidwoko adunde Farao nwang’ man ebilubo tokgi; man abinwang’u yung ni kum Farao, man kum udul pare ceke; e Jumisiri bing’eyo nia an a Yehova. E gitimo kumeca.

⁵ Man juyero ni ubimo mi Misiri nia dhanune giringo: e adunde Farao ku mi jutic pare lokre kum dhanune, man giwacu kumae, Maeni ang’o ma watimo, ma waweko ko Israel ucidho ma nwang’u gitimo iwa?

⁶ Man eyiko magali pare, man egamu dhanu pare karacelo kude:

⁷ e egamu magali ma jukoyo dak abusiel, ku magali ceke mi Misiri, ku jego m’i wigi ceke.

⁸ E Yehova dwoko adunde Farao m’ubimo mi Misiri nwang’, man elubo tok nyithindho mir Israel: kum nyithindho mir Israel giwok woko ku cing’ ma tek.

⁹ Man Jumisiri gilubo tokgi, riuni ku magali ceke pa Farao, man weg riuni pare, ku njuru asikari pare, e girubogi ma gigonjo dhu nam, i ng’et Pi-hahiroth, i wang’ Bal-zefon.

¹⁰ Man kinde ma Farao eoro ceng’ni, nyithindho mir Israel uting’o wang’gi malu, man, nen, Jumisiri ubino i tokgi; e lworo negogi dit: man nyithindho mir Israel giywak ba Yehova.

¹¹ E giwacu ni Musa kumae, Kum liel umbe i Misiri, ketho ikabuwa woko kara watho i langa? pirang’o itimo kumeni i kumwa, m’iwodho kowa woko ku i Misiri?

¹² Maeni lembe ma wayero iri i Misiri ngo, wawacu kumae, Wekwa wa kendwa, kara watim ni Jumisiri? Kum e ber iwa y a watim ni Jumisiri, sagu ma tek watho i langa.

¹³ E Musa wacu ni dhanune kumae, Lworo kud unegwu, wucung ki, man wunen both pa Yehova, m’ebitimo iwu tin: kum Jumisiri ma wuneno tin, wubinenogi kendo nge mi nja.

¹⁴ Yehova bikiedo piwu, e wubiling’.

¹⁵ E Yehova wacu ni Musa kumae, Pirang’o ilwong’a? wac ni nyithindho mir Israel, nia gicidhi.

¹⁶ Man iting’ uluth peri, man iriei cingi wi nam, man ipoke: e nyithindho mir Israel bimondo i die nam ku wi ng’om m’uthwo.

¹⁷ Man an, nen, abidwoko adunde Jumisiri nwang’, man gibimondo i tokgi: man abinwang’u yung ni kum Farao, man ni kum udul pare ceke, man kum magali pare, man kum weg riuni pare.

¹⁸ Man Jumisiri bing’eyo nia an a Yehova, kinde ma juyunga ni kum Farao, man ni kum magali pare, man ni kum weg riuni pare.

¹⁹ Man malaika pa Mungu, m’ucidho i wang’ Israel, elokre edok yor i ng’eigi; man mbegi mir afuru ai kud i wang’gi, man ecungo i ng’eigi:

²⁰ man ebino i kind gonjo mi Misiri ku gonjo mir Israel; e afuru ku mudho nuti, ento emio der ku diewor: man acel tundo kum wadi ngo diewor soro.

²¹ E Musa rieyo cinge wi nam; man Yehova ketho nam udok cen ni kum yamu ma tek ma yo nyangu diewor soro, man edwoko nam ni ng’om m’uthwo, e pi pokre.

²² E nyithindho mir Israel umondo i die nam ku wi ng’om m’uthwo: e pi bedo ni gang’ igi yo ku cing’gi ma yor acwic, man yo ku cing’gi ma yor acam.

²³ Man Jumisiri gilubo tokgi, e gimondo i die nam i tokgi, riuni pa Farao ceke, ku magali pare, ku weg riuni pare.

²⁴ Man etimbre i kur mi kugweno, nia Yehova neno wi udul Misiri ku wi mbegi mi mac man mir afuru, man esendo udul mi Jumisiri.

²⁵ Man ewodho ukobre mi magali migi ketho wothne bedo pek; ketho nia Jumisiri giwacu kumae, Wek waringu i wang’ Israel; kum Yehova kiedo pigi kum Jumisiri.

²⁶ E Yehova wacu ni Musa kumae, Riei cingi wi nam, kara pi dwog kendo wi Jumisiri, f wi magali migi, man wi weg riuni migi.

²⁷ E Musa rieyo cinge wi nam, man nam udwogo ba tegone ma kakare kinde ma piny uru; e Jumisiri giringo i kume; man Yehova ng’ielo Jumisiri i die nam.

²⁸ E pi dwogo, man eumo magali, ku weg riuni, en e udul ceke pa Farao m’umondo i tokgi i nam; acel de mbe m’i kindgi m’udong’.

²⁹ Ento nyithindho mir Israel uwotho ku wi ng’om m’uthwo i die nam; e pi bedo ni gang’ igi yo ku cing’gi ma yor acwic, man yo ku cing’gi ma yor acam.

³⁰ E Yehova bodho Israel i ceng’ maeca kumeni kud i cing’ Jumisiri; man Israel uneno Jumisiri ni avu dhu wath.

³¹ Man Israel uneno tic ma dit ma Yehova timo kum Jumisiri, e dhanune lworo Yehova: man giyio Yehova, ku jatic pare ma Musa.