Ai 12 - The Holy Bible In Alur (Lur) Revised Orthography

Kadhukuwijo

¹ E Yehova yero ni Musa giku Harun i ng’om Misiri, ewacu kumae,

² Dwi maeni bibedo iwu ni thekri mi dwi: ebibedo dwi ma kwong’a mi rundi iwu.

³ Wuyer ni udul ceke mir Israel, wuwac kumae, I ceng’ mir apaje mi dwi maeni gibigamu nyathi rombo igi kubang’gi kubang’gi, calku udi pa kwaru migi, nyathi rombo pi juot acel:

⁴ man tek juot gi nok ni nyathi rombo, e en ku jadhugola pare ma ni ceng’ni ot pare gibigamu acel calku wel mi ng’eyong’ec; calku cemo mi dhanu kubang’gi kubang’gi wubikwanu wel mu pi nyathi rombo.

⁵ Nyathi rombo mu bibedo m’umbe mulima, nyok ma rundine acel: wubigame ku kind rombe, kadi ku kind diegi:

⁶ man wubigwoke cil i ceng’ apar wi ang’wende mi dwije; man cokri ceke mir udul mir Israel binege uthieno.

⁷ E gibigamu kum rimbe, man gibikethe kum ng’et dhugola ario man kum riu ma yo malu, wi udi ma gicame i ie.

⁸ E gibicamu ringe i diewor maeca, ma juvulo ku mac, ku kwen ma thobi mbe i ie; gibicame kud uboko ma kec.

⁹ Kud wucame ma numu, kadi m’ateda ku pi de ngo, ento avula ku mac; wie ku tiende man cindie.

¹⁰ Man wubiweko kume moko ngo udong’ kugweno; ento kume moko m’udong’ kugweno wubiwang’u ku mac.

¹¹ Man wubicame kumeni: ku pierwu m’atwia, ma wara mu ni i tiendwu, man uluth mu i cingwu; e wubicame ku ng’wec: en e kadhukuwijo pa Yehova.

¹² Kum abikadhu kud i ng’om Misiri ku diewor maeno, man abigoyo kayu ceke m’i ng’om Misiri, dhanu ku lim; man abitimo lembapoka kum mungu ceke mi Misiri: an a Yehova.

¹³ Man rimo bibedo iwu ni giranyutha wi udi ma wuni i ie: e kan aneno rimone, abikadhu kud i wiwu, man masendi moko mbe ma bibedo i wiwu ya unyothwu, kinde m’agoyo ng’om Misiri.

¹⁴ Man ceng’ maeca bibedo iwu ni poi, man wubikwire ni agba ni Yehova: cil kum dhanum’utuk mu wubikwire ni agba ku lembapoka mi nja.

¹⁵ Ceng’ abiro wubicamu kwen ma thobi mbe i ie; i ceng’ ma kwong’ane wubiketho thobi cen kud i udi mu: kum ng’atu ma tek ucamu kwen ma ie ju thobi ugambre i ceng’ ma kwong’ane cil i ceng’ mir abirone, ng’eyong’ec maeno jubikabu woko kud i bang’ Israel.

¹⁶ Man ceng’ ma kwong’ane bibedo iwu ni cokri ma leng’, man ceng’ mir abirone de mi cokri ma leng’; gibitimo tic moko ngo i ceng’ maeca, ndhu giracama kende ma dhanu bicamu kubang’gi kubang’gi, maeno kende ma wubitimo.

¹⁷ Man wubikwiro ceng agba mi kwen ma thobi mbe i ie; kum awodho udul mu woko kud i ng’om Misiri i ceng’ maeni nini: ka kumeno wubikwiro ceng’ maeni kum dhanum’utuk mu ni lembapoka mi nja.

¹⁸ I dwi ma kwong’ane, i ceng’ apar wi ang’wende mi dwije uthieno, wubicamu kwen ma thobi mbe i ie, cil kum ceng’ pier ario wi acende mi dwije uthieno.

¹⁹ Ceng’ abiro jubinwang’u thobi mbe i udi mu: kum ng’atu ma tek ucamu gin ma thobi ni i ie, jubikabu ng’eyong’ec maeno woko i kind udul mir Israel, kadok en e umondo, kadi jang’om m’anyola.

²⁰ Wubicamu gin moko ngo ma thobi ni i ie; i kabedo mu ceke wubicamu kwen ma thobi mbe i ie.

²¹ Musa lund ulwong’o judongo mir Israel ceke, man ewacu igi kumae, Wucidhi, wugam iwu nyithi rombe, calku juudi mu, man wuthum kadhukuwijo.

²² Man wubigamu jang alagi, man wubilutho i rimo ma ni i tabu, man wubikiro kum riu ma malu ku ng’et dhugola ario ku rimo ma ni i tabu; man ng’atu moko mbe m’i kindwu ma biwok woko ku i dhugola mi ot pare cil kugweno.

²³ Kum Yehova bikadhu kugoyo Jumisiri; man kan eneno rimo wi riu ma malu, man kum ng’et dhugola ario, Yehova bikadhu wi dhugolane, man ebiyio ngo nia janyoth umond i udi mu nigoyowu.

²⁴ Man wubikwiro gin maeni ni lembapoka iri man ni woti mi nja.

²⁵ Man ebitimbre, kinde ma wutundo i ng’om ma Yehova bimio iwu, calu eng’olo, nia wubiworo timotim maeni.

²⁶ Man ebitimbre, kinde ma nyithindho mu biwacu iwu kumae, Thelembe mi giratima maeni ang’o?

²⁷ Pa wubiwacu, En e lam mi kadhukuwijo pa Yehova, m’ukadhu ku wi udi mi nyithindho mir Israel i Misiri, kinde m’egoyo Jumisiri, man ebodho udi mwa. E dhanu gikulo wigi man girwo.

²⁸ E nyithindho mir Israel gicidho man gitimo kumeca; calu Yehova ng’olo ni Musa giku Harun, e gitimo kumeca.

Masendi ma Tok Cen: Tho mi Kayu

²⁹ Man etimbre i diewor ma ling’, nia Yehova goyo kayu ceke m’i ng’om Misiri, ugambre kum kayu pa Farao ma jany wi komker pare cil kum kayu pa ng’eca ma ni i ng’ei odkol; man kayu ceke mi lim.

³⁰ E Farao ai malu ku diewor, en, ku jutic pare ceke, ku Jumisiri ceke; e ywak ma dit ni i Misiri; kum ot moko mbe ma ng’atu acel utho i ie ngo.

³¹ Man elwong’o Musa giku Harun ku diewor, man ewacu kumae, Wuai, wuwodhru woko ku kind dhanu para, wuku nyithindho mir Israel bende; man wucidh, wutim ni Yehova, calu wuwacu.

³² Wugam udul rombe mu ku dhok mu, calu wuwacu, man wucidhi; man wumi mugisa ira bende.

³³ E Jumisiri gidhulo dhanu, kara giketh giai i ng’ombe pio; kum giwacu kumae, Wan ceke wan avu.

³⁴ E dhanune gigamu kwen migi ma fodi thobi mbe i ie, nwang’u jamb ng’ino cam migi bedo atwia i kendi migi wi gokgi.

³⁵ E nyithindho mir Israel gitimo calku lembe pa Musa; man gikwayu Jumisiri ku jamb mola ma tar, man jamb mola ma kwar, ku kendi:

³⁶ man Yehova mio bero ni dhanune i wang’ Jumisiri, ketho giweko gibedo ku gin ma gikwayu. E giyaku Jumisiri.

Juisraeli Uweko Ng’om mi Misiri

³⁷ E nyithindho mir Israel giwotho ugambre ba Ramases cil kum Sukoth, dhanu ma co ma ku tielo rubanga dak abusiel, karacelo ku nyithindho.

³⁸ Man udul ma tung’ tung’ bende idho malu kugi; man udul rombe ku dhok, en e lim ma dit apila.

³⁹ E gitedo kwen m’ang’ina ma thobi mbe i ie kum kwen ma giai ko i Misiri; kum fodi thobi mbe i ie, kum jucwalugi ku i Misiri, man gicopo galu ngo, kadok cemo de giyiko ngo igi gigi.

⁴⁰ Nwang’u nindo ma nyithindho mir Israel bedo i ie i Misiri en e rundi dak ang’wen ku pier adek.

⁴¹ Man etimbre ka rundi dak ang’wen ku pier adek uthum, cil ceng’ maeni nini etimbre, nia udul pa Yehova ceke ai woko kud i ng’om Misiri.

⁴² En e diewor ma juneno ie ba Yehova dit kum wodhogi woko kud i ng’om Misiri: maeni diewor maeno pa Yehova, ma nyithindho mir Israel ceke gineno ie dit cil kum dhanum’utuk migi.

Cik Mange pi Kadhukuwijo

⁴³ E Yehova wacu ni Musa giku Harun kumae, Maeni lembapoka mi kadhukuwijo: jawirok umbe ma bicamu kume moko;

⁴⁴ ento jutic mi dhanu ceke kubang’gi kubang’gi ma ging’iewo ku sente, kinde m’itimo yaa i kume, e ebicamu kume moko.

⁴⁵ Umondo ku jatic mi sukulia bicamu kume ngo.

⁴⁶ Jubicame i ot acel; ibitero ring’o moko woko ngo kud i ot; kadok cogone de wubituro ngo.

⁴⁷ Udul ceke mir Israel bikwire.

⁴⁸ Man ka jawirok bibedo ni umondo kudi, man eyenyo ekwif kadhukuwijo ni Yehova, wek jutim yaa kum jumaco pare ceke, ka juwek ebin ceng’ni man ekwire; e ebibedo calu ng’atu ma junyolo i ng’ombe: ento ng’atu moko mbe ma jutimo yaa ngo i kume ma bicamu kume moko.

⁴⁹ Cik acel bibedo ni ng’atu m’anyola, man ni jawirok m’ubedo ni umondo i kindwu.

⁵⁰ Nyithindho mir Israel ceke gitimo kumeca; calu Yehova ng’olo ni Musa giku Harun, e gitimo kumeca.

⁵¹ E etimbre i ceng’ maeni nini, nia Yehova kelo nyithindho mir Israel kud i ng’om Misiri kud udulgi.