Ai 1 - The Holy Bible In Alur (Lur) Revised Orthography

Masendi mi Juisraeli i Ng’om Misiri

¹ Nwang’u maeni gi nying wot Israel, m’ubino i Misiri (ku ba dhanu ceke ku juode gibino ku Yakobogi):

² Ruben, ku Simeon, man Lawi, ku Yuda,

³ Isakar, ku Zebulun, man Benyamin,

⁴ Dan ku Naftali, man Gad kud Acer.

⁵ Man ng’eyong’ec ceke m’uai i pier Yakobo gi ng’eyong’ec pier abiro: nwang’u dong’ Yusuf ni i Misiri.

⁶ Man Yusuf utho, ku utumin mire ceke, ku dhanum’utuk maeca ceke.

⁷ E nyithindho mir Israel ginyai, man gimedri dit, e welgi doko dupa, man tego migi doko dit hai; e ng’om upong’ kugi.

⁸ Nie ubimo ma nyen uwok wi Misiri, m’ung’eyo Yusuf ungo.

⁹ Man ewacu ni dhanu pare kumae, Nen, dhanu mi nyithindho mir Israel welgi ku tego migi sagu mwa:

¹⁰ wubin, wek watimu ku rieko i kumgi, gimaru nyai dit, man emaru timbre, nia, kinde ma ali moko wok, gin bende gimaru ci ribri ku judegi mwa, man gikied kudwa, man giai kud i ng’ombuni.

¹¹ Ka kumeno giketho juwitic i wigi kara usendgi ku ter migi. Man gigomo adhura mi kanupiny Pithom ku Ramses, ni Farao.

¹² Ento kadok gisendogi, de gimedri ma sagu man gimoiri foo. Man lembe ton i igi kum nyithindho mir Israel.

¹³ Man Jumisiri giketho nyithindho mir Israel gitim ma tek:

¹⁴ e giketho bedo migi bedo rac ku tic ma tek, mir ulobo man biriki, man ku tic ceke de ma kwonde tung’ tung’ i thim, en e tic migi ceke, ma giketho gitimo ma tek i ie.

¹⁵ Man ubimo mi Misiri yero ni jucolmon mi Juebrania, ma nying’ ng’atu acel m’i kindgi en e Cifra, man nying’ mucelo Pua:

¹⁶ man ewacu kumae, Kinde ma wubecolo mon mi Juebrania, man wuneno gibenyol; tek en e nico, e wubinege; ento tek en e nyaku, e ebibedo kwo.

¹⁷ Ento jucolmon gilworo Mungu, man gitimo calu ubimo mi Misiri ng’olo igi ngo, ento gibodho nyithindho ma co ma kwo.

¹⁸ Man ubimo mi Misiri lwong’o jucolmon, man ewacu igi kumae, Nedi wutimo gin maeni, man wubodho nyithindho ma co ma kwo?

¹⁹ Man jucolmon giwacu ni Farao kumae, Kum mon mi Juebrania gi calu mon mi Jumisiri ngo; kum gi tek, man ginyol ma fodi jucolmon kubino i bang’gi ngo.

²⁰ E Mungu timo ber ba jucolmon: man dhanu medre, e gidoko dit apila.

²¹ Man etimbre, kum jucolmon ulworo Mungu, nia eketho udi migi cungo.

²² Man Farao ng’olo ni dhanu pare ceke, ewacu kumae, Ku ba nyithindho ma co ceke ma junyolo wubibologi i kulo, man ku ba nyithindho ma nyir ceke wubiweko gibedo kwo.