2 Ubimo 4 - The Holy Bible In Alur (Lur) Revised Orthography

Mo pa Dhaku ma Cware Tho

¹ Nie dhaku m’i kind mon mi wot jubila uywak bang’ Elica, ewacu kumae, Jatic peri ma cwara tho; e ing’eyo nia jatic peri lworo Yehova: man jarabanja bino kara egam nyithindho para ire ni ng’eca.

² Man Elica wacu ire kumae, Abitimo ang’o iri? yer ira; ibedo kud ang’o i oti? Man ewacu kumae, Bong’ peri bedo ku gin moko ngo i ot, ndhu tabu mi mo.

³ Elund ewacu kumae, Cidhi, jok agulu iri ba wat peri ceke, agulu ma ie nanu; kud ijok nyanok.

⁴ E ibimondo, ibidko dhugola de i wii man wi woti, man ibikonjo i agulu maeno ceke; man ibiketho m’upong’o cen.

⁵ Kum kumeno eai i bang’e, man eciko dhugola i wie man wi wote; gikelo agulu i bang’e, e ekonjo.

⁶ Man etimbre, kinde m’agulu pong’, nia ewacu ni wode kumae, Kel agulu asu i bang’a. Man ewacu ire kumae, Agulu mange mbe. E mo jik.

⁷ Elund ebino man eyero ni dhanu pa Mungu. E ewacu ire kumae, Cidhi, ng’ieu moje, man icul banja peri, man icopri ku donge wuku woti.

Elica ku Dhaku mi Cunem

⁸ Man epodho i ceng’ acel, nia Elica kadhu i Cunem, ka ma dhaku ma dit ni i ie; e ecuke nia ecam kwen. E ebedo, nia ku ba kadhu pare ceke, emondo keca kara ecam kwen.

⁹ Man ewacu ni cware kumae, Kawono nen, ang’eyo nia ng’atu maeni en e dhanu pa Mungu ma leng’, ma bekadhu kud i bang’wa thiri thiri.

¹⁰ Akwei, wek watim nyathi kusika wi gang’kidi; man wek waketh kavuto kuca ire, ku mesa, man kom, ku thethala man ebibedo, kinde m’ebino i bang’wa, nia ebimondo keca.

¹¹ Man epodho ceng’ acel, nia ebino keca, e elokre i kusika man evuto keca.

¹² Man ewacu ni Gehazi ma jatic pare kumae, Lwong’ Nyacunami maeni. E kan elwong’e, ecungo i wang’e.

¹³ Man ewacu ire kumae, Wac ire kawono kumae, Nen, igwokowa ku gwok maeni ceke; ang’o ke ma jubidong’ timo iri? iyenyo juyer piri ni ubimo, kadi ni jego mir uduli? Man eloko lembe kumae, Abedo i kind juthuwa ma dhe.

¹⁴ Man ewacu kumae, Jubilund timo ang’o ire? E Gehazi loko lembe kumae, Andha nyathin ma nico mbe kude, man cware ti.

¹⁵ Man ewacu kumae, Lwong’e. E kan elwong’e, ecungo i dhugola.

¹⁶ Man ewacu kumae, Kar unyoni, kinde ma nindo romo, ibigwaku nyathin ma nico. Man ewacu kumae, Ungo, rwoth para, in i dhanu pa Mungu, kud icwai ndra ni bong’ peri.

¹⁷ E dhakune gamu ie, man enyolo nyathin ma nico i nindo maeca, kinde ma nindone romo, calu Elica wacu ire.

¹⁸ E kinde ma nyathinne dongo, lembe timbre i ceng’ acel, nia ecidho woko ba won ba jukaicam.

¹⁹ Man ewacu ni won kumae, Wia do, wia do. Man ewacu ni jatic pare kumae, Tere ba min.

²⁰ Man kinde m’eting’e, man etere ba min, ebedo wi bambe maram dieceng’ uwok ko, e elund etho.

²¹ E eidho malu ekethe wi kavuto pa dhanu pa Mungu, man eciko dhugola i wie, e ewok woko.

²² Man elwong’o cware, ewacu de kumae, Akwei, or jatic acel i bang’a, ku kana acel, kara aring ba dhanu pa Mungu, man adwog kendo.

²³ E ewacu kumae, Pirang’o ibicidho i bang’e tini? en e dwi m’upor ungo kadi ceng’ sabatu de ngo. E ewacu kumae, Ebibedo dre.

²⁴ Elund eketho jambwoth wi kana, man ewacu ni jatic pare kumae, Leki, man icidh i weng’i; kud igala ku woth, tek k’awacu iri ngo.

²⁵ Kum kumeno ecidho, man ebino ba dhanu pa Mungu wi got Karmel. Man etimbre, kinde ma dhanu pa Mungu nene ku bor, nia ewacu ni Gehazi ma jatic pare kumae, Nen, maca en e Nyacunami:

²⁶ akwei, ring kawono romb kude, man iwac ire kumae, Kumi leng’i? kum cweri leng’i? kum nyathin de leng’i? Man eloko lembe kumae, Ebedo dre.

²⁷ E kinde m’ewok ba dhanu pa Mungu wi ungulu got, emaku tiende. Man Gehazi coro ceng’ni kara ecwale cen; ento dhanu pa Mungu wacu kumae, Weke kumeno: kum can unego ng’eyong’ec pare yor i ie; man Yehova mung’e ira, e eyero ira ngo.

²⁸ Elund ewacu kumae, Ayenyo nyathin ma nico ba rwoth para? awacu ngo kumae, Kud ibomba?

²⁹ Elund ewacu ni Gehazi kumae, Twi pieri, man imak uluth para i cingi, e icidh i yo peri: tek irombo ku ng’atu moko, kud imothe; man tek ng’atu moko mothi, kud ilok ire kendo: man iketh uluth para i wang’ nyathinne.

³⁰ E min nyathin uwacu kumae, Calu Yehova bedo kwo, man calu ng’eyong’ec peri bedo kwo, abiweki ngo. E eai, man elubo ng’eye en e dhakune.

³¹ E Gehazi kadhu i wang’gi, man eketho uluth wi nyathin; ento kadok dwal, kadi winjo de mbe. Kum kumeno edwogo kara eromb kude, man eyero ire, ewacu kumae, Nyathin ucer ungo.

³² E kinde ma Elica mondo i ot, nen, nyathin utho, man jupiele wi kavuto pare.

³³ Ka kumeno emondo, e eciko dhugola i wigi gin ario, man erwo ni Yehova.

³⁴ E eidho malu, man eriebre wi nyathinne, e eketho dhoge ka wi dhoge, man wang’e ka wi wang’e, cinge de ka wi cinge: e eriebre gire i wie; e kum nyathin udoko mor.

³⁵ Elund edwogo, man ewotho i ot bang’ acel kun ku kun; e eidho malu, man eriebre gire i wie: e nyathinne goyo tham wang’ abiro, man nyathinne yabu wang’e.

³⁶ E elwong’o Gehazi, man ewacu kumae, Lwong’ Nyacunami maeni. Kum kumeno elwong’e. E kinde m’emondo i bang’e, ewacu kumae, Ting’ wodi.

³⁷ Elund emondo, man epodho the tiende, e erum arieba wang’e i ng’om; e eting’o wode, man ewok woko.

Elica Timo Musana ni Jubila

³⁸ E Elica dwogo kendo i Gilgal. E ndru nuti i ng’ombe; man wot jubila gibedo i wang’e; man ewacu ni jatic pare kumae, Keth agulu ma dit, man ited dek ni wot jubila.

³⁹ E ng’atu acel ucidho woko i podho kara eng’wed dek, man enwang’u tiend upoko moko m’i thim, man ecoko upokone pong’ bongu pare, man ebino ekakugi i agulu mi dek; kum ging’eyogi ngo.

⁴⁰ Kum kumeno gitoko ni dhanu ucam. Man etimbre, ka gibenang’u dege, nia gikok, giwacu kumae, E dhanu pa Mungu, tho ni i agulu. Man gicopo camu kume ngo.

⁴¹ Ento ewacu kumae, Wulund wukel mogo. E ekonje i agulune; man ewacu kumae, Wutoke ni dhanu, kara ginang’. E gin moko ma rac umbe i agulune.

⁴² E ng’atu moko ai kud i Bakalica, man ekelo kwen mi mwoka ni dhanu pa Mungu, kwen m’ang’ina mi nganu pier ario, man cam ma nyen ma wizi i usau pare. Man ewacu kumae, Mi ni dhanu, kara gicam.

⁴³ E jatic pare wacu kumae, Ha, aketh maeni i wang’ dhanu daki? Ento ewacu kumae, Mi ni dhanu, kara gicam; kum Yehova wacu kumae, Gibicamu, man gibiweko donge.

⁴⁴ Kum kumeno ekethe i wang’gi, e gicamu, man giweko donge, calku lembe pa Yehova.