2 Ubimo 22 - The Holy Bible In Alur (Lur) Revised Orthography

Yosia ku Kitabu mi Cik

¹ Yosia rundi pare abora kinde m’emaku camu ker; man ecamu ker rundi pier adek wi acel i Yerusalem: man nying’ min mire Yedida ma nyar Adaya ma Bozkath.

² E etimo gin m’ubedo atira i wang’ Yehova, man ewotho i yo pa Daudi ma kwaru mire ceke, e elokre cen i cing’ ma yor acwic kadi ma yor acam de ngo.

³ Man etimbre i rundi apar wi aborane p’ubimo ma Yosia, nia ubimo oro Cafan, ma wod Azalia ma wod Meculam, ma jagorcik, ba ot pa Yehova, ewacu kumae,

⁴ Idh malu ba Hilkia ma jalam ma dit, kara ekwan sente ma jukelo i ot pa Yehova, ma jukurdhugola gicoko ku ba dhanu;

⁵ man wek gimie i cing’ jutic ma gi juwitic mi ot pa Yehova; man wek gimie ni jutic ma gini i ot pa Yehova, kara giyik wang’ot m’umor,

⁶ ba jubodho mi bau, man ba jugom, man ba jubodho mir ulobo, man mi ng’iewo yen ku kidi m’akaka kara uyik ode.

⁷ Ento jukwanu kugi sente ngo ma jumio i cing’gi; kum gitimo mandha.

⁸ Man Hilkia ma jalam ma dit uwacu ni Cafan ma jagorcik kumae, Anwang’u kitabu mi cik i ot pa Yehova. Man Hilkia mio kitabune ba Cafan, e esome.

⁹ E Cafan ma jagorcik ubino bang’ ubimo, man ekelo lembe kendo bang’ ubimo, ewacu de kumae, Jutic peri gikonjo sente woko ma junwang’u i ot, man gimie i cing’ jutic ma gi juwitic mi ot pa Yehova.

¹⁰ E Cafan ma jagorcik uyero ni ubimo, ewacu kumae, Hilkia ma jalam umio kitabu ira. E Cafan usome i wang’ ubimo.

¹¹ Man etimbre, kinde m’ubimo winjo lembe mi kitabu mi cik, nia eyeco kendi pare.

¹² E ubimo ng’olo ni Hilkia ma jalam, man ni Ahikam ma wod Cafan, man Akbor ma wod Mikaya, man Cafan ma jagorcik, kud Asaya ma jatic p’ubimo, ewacu kumae,

¹³ Wucidhi, wupenj Yehova pira, man pi dhanu ku pi Yuda ceke, pi lembe mi kitabu maeni ma junwang’u; kum kwinyo pa Yehova e dit ma jucwinyo i kumwa, kum kwaruwa winjo lembe mi kitabu maeni ngo, kara gitim calku gin ceke m’ugore piwa.

¹⁴ Kum kumeno Hilkia ma jalam, man Ahikam, kud Akbor, man Cafan, man Asaya, gicidho ba Hulda ma jabila ma dhaku, ma dhaku pa Calum ma wed Tikva, ma wod Harhas, ma jagwok kakendi (nie ebedo i Yerusalem i ng’ete mir arionde); man giweco gikude.

¹⁵ Man ewacu igi kumae, Yehova, Mungu mir Israel, uwacu kumae, Wuwac ni ng’atu m’uorowu i bang’a kumae,

¹⁶ Yehova wacu kumae, Nen, abikelo lembe ma rac wi ka maeni, man wi ju m’ubedo i ie, en e lembe ceke mi kitabu m’ubimo mi Yuda somo.

¹⁷ Kum giweka, man giwang’u udok ma ng’wice ng’ar ni mungu mange, kara ginyai ng’ecwiny i ia ku tic ceke m’i cing’gi, ka kumeno kwinyo para biopo kum ka maeni, man jubinege ngo.

¹⁸ Ento ni ubimo mi Yuda, m’uorowu kara wupenj ba Yehova, wuwac ire kumae, Yehova, Mungu mir Israel, uwacu kumae: Pi lembe m’iwinjo,

¹⁹ kum adundeni bedo ng’ic, man ijwigri giri i wang’ Yehova, kinde m’iwinjo gin m’ayero kum ka maeni, man kum ju m’ubedo i ie de, nia gibidoko ni uvuru man kwong’, man iyeco kendi peri, iywak de i wang’a; an bende awinji, Yehova wacu.

²⁰ Ka kumeno, nen, abicoki ba kwaru peri, man jubicoki ba liel peri, ma cwinyi kwio, kadok weng’i de bineno lembe ma rac ceke m’abikelo wi ka maeni ngo. E gikelo lembe bang’ ubimo kendo.