2 Ubimo 13 - The Holy Bible In Alur (Lur) Revised Orthography

Nindo mi Camuker pa Yehoahaz

¹ I rundi pier ario wi adege pa Yoac ma wod Ahazia, m’ubimo mi Yuda, Yehoahaz ma wod Yehu maku camu ker wi Israel i Samaria, man ecamu ker rundi apar wi abiro.

² Man etimo gin m’ubedo rac i wang’ Yehova, man elubo dubo pa Yeroboam ma wod Nebat, m’eketho Israel udubo kudo; man eweke ngo.

³ E ng’ecwiny pa Yehova opo kum Israel, man emiogi i cing’ Hazael m’ubimo mi Cami, man i cing’ Ben-hadad ma wod Hazael, thiri thiri.

⁴ Man Yehoahaz ukwayu Yehova, e Yehova winjo dwande; kum eneno masendi mir Israel, maram ubimo mi Cami usendo kogi.

⁵ (E Yehova mio jalar ni Israel, ketho nia giai woko ku the cing’ Jucami; e nyithindho mir Israel gibedo i hema migi calu ma naka.

⁶ Ento giweko dubo mi ot pa Yeroboam ungo, m’eketho Israel udubo kudo, ento giwotho i ie: man mungu m’araga bende dong’ i Samaria.)

⁷ Kum eweko kind dhanu moko ngo ni Yehoahaz ndhu weg riuni pier abic kende, man magali apar, ku dhanu ma ku tielo rubanga apar; kum ubimo mi Cami nyothogi, man edwokogi calu utur mi fodocam.

⁸ Nie dong’ tic pa Yehoahaz, ku gin ceke m’etimo, man tego pare, gigore i kitabu mi lemkei mir ubimo mir Israel ungo?

⁹ E Yehoahaz unindo ku kwaru pare; man giyike i Samaria: e Yoac ma wode camu ker kakare.

Nindo mi Camuker pa Yehoac mi Israel

¹⁰ I rundi pier adek wi abirone pa Yoac m’ubimo mi Yuda, Yehoac ma wod Yehoahaz umaku camu ker wi Israel i Samaria, e ecamu ker rundi apar wi abusiel.

¹¹ Man etimo gin m’ubedo rac i wang’ Yehova; eweko dubo ceke pa Yeroboam ma wod Nebat ungo, m’eketho Israel udubo kudo; ento ewotho i ie.

¹² Nie dong’ tic pa Yoac, ku gin ceke m’etimo, ku tego pare m’ekiedo kudo kum Amazia m’ubimo mi Yuda, gigore i kitabu mi lemkei p’ubimo mir Israel ungo?

¹³ e Yoac unindo ku kwaru pare; man Yeroboam ujany wi komker pare: e juyika Yoac i Samaria kud ubimo mir Israel.

Ewolembe pa Elica mi Kajik, man Tho Pare

¹⁴ Nie kum Elica lith mi tho pare m’etho kudo: e Yoac m’ubimo mir Israel uloro piny i bang’e, man eywak i wie, ewacu kumae, Vwa, vwa, magali mir Israel ku weg riunine!

¹⁵ Man Elica wacu ire kumae, Gam atum kud athero; man egamu atum kud athero i bang’e.

¹⁶ Man ewacu ni ubimo mir Israel kumae, Keth cingi kum atum; man eketho cinge i kume. Man Elica ketho cinge wi cing ubimo.

¹⁷ E ewacu kumae, Yab wang’ot yo nyangu; e eyabe. Elica lund uwacu kumae, Kil; e ekilo. Man ewacu kumae, Athero pa Yehova mir aloci, en e athero mir aloci wi Cami; kum ibigoyo Jucami i Afek, cil m’inyotho kogi.

¹⁸ E ewacu kumae, Gam athero; e egamugi. Man ewacu ni ubimo mir Israel kumae, Goi wi ng’om; e egoyo wang’ adek, man ejik.

¹⁹ E kwinyo nego dhanu pa Mungu i kume, man ewacu kumae, Maku igoi wang’ abic kadi wang’ abusiel: tek kumeno nwang’u igoyo Cami cil m’inyothe ko; ento kawono ibigoyo Cami wang’ adek kende.

²⁰ E Elica tho, man giyike. Nie udul Jumoabi gimondo i ng’om i kawok mi rundi.

²¹ E etimbre, kinde ma gibeyiko ng’atu moko, nia, nen, gineno udul dhanu; e gibayu ng’atuno i odliel pa Elica: e kinde ma kum ng’atuca mulo cogo Elica, ecer, man ecungo wi tiende.

²² Man Hazael m’ubimo mi Cami sendo Israel i ceng’ ceke pa Yehoahaz.

²³ Ento Yehova nyutho bero igi, man ngisi nege i kumgi, man epido pigi, kum lembariba pare ma kud Ibrahim kud Isak, man Yakobo, man eyenyo ngo enyothogi, kadok abaya de fodi ebayugi kud i vute ngo.

²⁴ E Hazael m’ubimo mi Cami tho; man Ben-hadad ma wode camu ker kakare.

²⁵ Man Yehoac ma wod Yehoahaz ugamu adhura kendo m’emaku kud i cing Yehoahaz ma won kud ali kud i cing’ Ben-hadad ma wod Hazael. Yoac ugoye wang’ adek, man egamu adhura mir Israel kendo.