2 Ubimo 1 - The Holy Bible In Alur (Lur) Revised Orthography

Tho pa Ahazia

¹ Man Moab ujai ni Israel yo ng’ei tho pa Ahab.

² Man Ahazia podho piny ku wang’ot i kusika pare ma malu ma ni i Samaria, e kume make: man eoro jukwenda, e ewacu igi kumae, Cidhi, wupenj ba Bal-zebub, ma mungu mir Ekron, tek abiboth ku tho maeni.

³ Ento malaika pa Yehova wacu ni Elia ma Jaticbi kumae, Ai, idh malu kara iromb ku jukwenda p’ubimo mi Samaria, man iwac igi kumae, En e kum Mungu mbe ambea i kind Israel, m’uketho wucidho kara wupenj ba Bal-zebub, ma mungu mir Ekroni?

⁴ Ka kumeno Yehova wacu kumae, Ibiloro piny ungo ku wi kavuto m’iidho i wie, ento ibitho andha. Man Elia ai.

⁵ Man jukwenda gidwogo i bang’e, man ewacu igi kumae, Nedi wudwogo?

⁶ Man giwacu ire kumae, Ng’atu acel uidho malu kara eromb kudwa, man ewacu iwa kumae, Wucidhi, wulokru kendo bang’ ubimo m’uorowu, wuwac ire de kumae, Yehova wacu kumae, En e kum Mungu mbe ambea i kind Israel uketho ioro kwenda kara ipenj ba Bal-zebub, ma mungu mir Ekroni? ka kumeno ibiloro piny ungo ku wi kavuto m’iidho i wie, ento ibitho andha.

⁷ Man ewacu igi kumae, En e ng’atu ma nedi m’uidho malu kara eromb kudu, m’uyero lembe maeni iwu?

⁸ E giloko ire lembe kumae, En e jarayir man etwio lau. Man ewacu kumae, En e Elia ma Jaticbi.

⁹ Ubimo lund uoro jego mir asikari pier abic kud asikari pare pier abic i bang’e. Man eidho malu i bang’e: man, nen, ebedo wi ungulu got. Man eyero ire kumae, E dhanu pa Mungu, ubimo wacu kumae, Lor piny.

¹⁰ Man Elia loko lembe ewacu ni jego mir asikari pier abic kumae, Tek an a dhanu pa Mungu, wek mac uai i polo man eweng’i kud asikari peri pier abic. Man mac uai i polo ewang’e kud asikari pare de pier abic.

¹¹ Man eoro jego mange kendo i bang’e ma won asikari pier abic kud asikari pare pier abic. E eloko lembe ewacu ire kumae, E dhanu pa Mungu, ubimo wacu kumae, Lor piny pio.

¹² E Elia loko lembe man ewacu igi kumae, Tek an a dhanu pa Mungu, wek mac uai i polo, man eweng’i kud asikari pier abic peri. E mac uai i polo, man ewang’e kud asikari pier abic pare.

¹³ Man eoro jego kendo mir asikari pier abic mir adege kud asikari pier abic pare. Man jego mir adege mir asikari pier abic uidho malu, man ebino epodho wi conge i wang’ Elia, man epaku dhoge ire, man ewacu ire kumae, E dhanu pa Mungu, akwei, wek kwo para, ku kwo mir asikari pier abic maeni ma jutic peri, ubed ma pire tek i weng’i.

¹⁴ Nen, mac uai kud i polo uloro piny, man ewang’u jego ario ma kwong’a mir asikari pier abic kud asikari migi pier abic; ento kawono wek kwo para bed ma pire tek i weng’i.

¹⁵ Man malaika pa Yehova wacu ni Elia kumae, Wulor piny wukude: lworo kud unegi i kume. E eai, man giloro piny gikude bang’ ubimo.

¹⁶ Man ewacu ire kumae, Yehova wacu kumae, M’uketho ioro jukwenda kara upenj ba Bal-zebub, ma mungu mir Ekron, en e kum Mungu mbe ambea i kind Israel m’ipenj lembe i bang’e? ka kumeno ibiloro piny ungo ku wi kavuto m’iidho i wie, ento ibitho andha.

¹⁷ Kum kumeno etho calku lembe pa Yehova ma Elia yero. Man Yehoram umaku camu ker kakare i rundi mir arionde pa Yehoram ma wod Yehocafat m’ubimo pa Yuda; kum wode mbe.

¹⁸ Nie dong’ tic pa Ahazia m’etimo, gigore i kitabu mi lemkei p’ubimo mir Israel ungo?