2 Timoteo 4 - The Holy Bible In Alur (Lur) Revised Orthography

¹ Ang’olo iri i wang’ Mungu, giku Kristu Yesu, m’ebipoko lembe mi ju ma kwo ku mi ju m’utho bende, man ku kanyuth pare m’ebinyuthre ko ku ker pare bende:

² yer lembe; tim tije i nindo ma juketho, kud i nindo ma juketho ngo bende; twiny twiny, juk juk, thok thok de, ku mwonyo lembe ceke ma jumwonyo hai man ku ponji de.

³ Kum rundi biwok ma gibiciro ie ponji ma alili ngo; ento, gi ju ma ithgi woi swa kum lembe, gibicoko juponji i bang’gi gigi ma awanya ma rac migi cal cal;

⁴ man gibibayu ithgi woko kum lemandha, e gibikier tok lembuda.

⁵ Endre dong’ ibed nger kum gin ceke, muli ku can, tim tic pa jayer lembe, keth tic peri timbre kakare.

⁶ Kum an kawono jubekonja woko, man nindo mi ai para m’aai ko woko tundo.

⁷ Adaru kiedo lwiny ma ber, adaru woth para atundo kajikne, agwoko yioyic bende:

⁸ ugambre ka wono jamkermiwic mi bedopwe, judaru kanu ira, ma Rwoth, ma japoklembe ma pwe, bimio ira i ceng’ maeca; endre ira a kenda ngo, ento ni dhanu ceke bende m’umaru nyuth pare m’ebinyuthre ko.

Paolo Ng’olo Lembe ma Tung’ Tung’

⁹ Tim k’amora ya ibin fodi nyanok i bang’a:

¹⁰ kum Dema weka, m’emaru ng’om maeni ma kawono, man ecidho Tesaloniki; Kreske de cidho Galatia, Tito ke Dalmatia.

¹¹ Luka kende m’udong’ i bang’a. Cok Marko, wubin wukude; kum ebedo ni kuloka ira kum tim m’etimo.

¹² Ento Tukiko adaru oro Efeso.

¹³ Koti m’aweko Troa ba Karpo, ibin kude kan ibino, ku kitabu de, ma sagu ceke re waraga no.

¹⁴ Iskander ma jathiedh nyunyu etima rac dit: Rwoth bimio ire rom ku tic pare:

¹⁵ in bende ibed ku weng’i i kume; kum ejai dit kum lembe mwa.

¹⁶ I cungo para m’alar acungo ng’atu moko mbe ma wacungo wakude, ento dhanu ceke giweka: ayenyo ku judwok lembene i wigi.

¹⁷ Ento Rwoth re wacungo wakude, man emio ira tego; kara lembe mir anyong’a uyere dit ni kuma, kara Thekdhanumange de ceke giwinji: e aboth ku dhu umvor.

¹⁸ Man Rwoth bibodha ni tic ma rac ceke, man ebigwoka cil i ker pare m’i polo: dwong’ ubed ire rondo ku rondo. Amen.

Moth M’edaru Ko

¹⁹ Moth Priskila, gikud Akula de, ku juot pa Onesiforo.

²⁰ Erasto re dong’ i Korinto: ento Trofimo aweke i Mileto ma kume lith.

²¹ Tim k’amora ya ilar ibin ma fodi nindo mi koyo kuwok ungo. Eubulo de mothi, man Pudente, man Lino, giku Klaudia, kud umego de ceke.

²² Dong’ Rwoth ubed ku cwinyi. Dong’ bero bed i beng’wu.