2 Timoteo 2 - The Holy Bible In Alur (Lur) Revised Orthography

¹ Ka kumeno in, nyathin para, bed ku tego i bero ma ni i Kristu Yesu.

² Man gin m’iwinjo i bang’a i kind jumulembe dupa, lembene dong’ imi ni jumandha, ma gibicopo ponjo dhanu mange bende.

³ Ibed jacir can wakudi, calu asikari ma ber pa Kristu Yesu.

⁴ Asikari moko mbe ma tek eni i tic m’etwire gire ku lembe mi kwo maeni; kara enyai mutoro i ng’atu m’ugoro nyinge ya ebed asikari.

⁵ Tek ng’atu moko beponjo ya esag i piem m’abola, enwang’u jamkermiwic ungo, tek etime kacikne ngo.

⁶ Jatipodho m’etio tic ekoelar egamu kum nying yenne be.

⁷ Ii pid pi gin m’ayero; kum Rwoth bimio iri ng’eyong’ec i gin ceke.

⁸ Poi kum Yesu Kristu, m’eai ku kind ju m’utho, mi kodhi pa Daudi, calku lembanyong’a para ma juboth ko:

⁹ i lembene abesendra cil i kol, calu ng’atu ma jugonjo agonja; ento lembe pa Mungu bedo atwia ngo.

¹⁰ Kum kumeno aciro gin ceke pi ju ma jugoyo nying’gi, kara gin bende ginwang’ both ma juboth ko ma ni i Yesu Kristu karacelo ku dwong’ ma nja ku nja de.

¹¹ Maeni lemandha: Kum tek watho wakugi, wabibedo kwo bende wakugi:

¹² tek wamula ku cani, wabicamu ker wakugi: tek wabikwere, en bende ebikwerowa:

¹³ tek wan wa jumandha ngo, en re en e mandha; kum ecopo kwere gire ngo.

Tim kud Amora ma Yire ni Mungu

¹⁴ Poigi kum gin maeni, ng’ol igi i wang’ Rwoth, kara ku gipiem piem kum lembe, ma kulokane mbe, ma biketho ju ma giwinjo gikier.

¹⁵ Dong’ itim kud amora m’inyuthri ko ni Mungu, ya in i ng’atu m’efoyo, jatic ma lewic umbe i wie, m’upoko lembe mandha cu.

¹⁶ Endre dong’ ikoe woko kum wec mananu mir acidi: kum gibisagu asaga ku cidho i lembe ma ayi Mungu mbe i kume,

¹⁷ e lembe migi binyai pamir adhola: Humenayo giku Feleto de gini i kindgi;

¹⁸ gi ju ma gikier kum lemandha, ku wacu ma giwacu ko y a cer ma ju m’utho cer ko daru kadhu, man ging’ielo yioyic mi jumoko woko.

¹⁹ Ento ther ukungu lembe pa Mungu cungo ki, m’ebedo kud ayi mae, Rwoth ung’eyo ju ma gi jupare: man, dong’ dhanu ceke kubang’gi kubang’gi ma gilwong’o nying Rwoth giwek tic ma en e tic mi bedopwe ngo.

²⁰ Anie i ot ma dit tabu ku bedo tabu mi mola ma kwar kadi mi mola ma tar kende ngo, ento mi yen ku mir ulobo bende; moko bedo mi yung, moko ke m’umbe yung.

²¹ Ka kumeno tek ng’atu moko lwokre gire kum giki maeni, ebibedo tabu mi jambyung, m’udwokre leng’, m’uromo ku tic pa Rwoth, m’ubedo ayika ni tic ceke ma ber.

²² Ento dong’ iring awanya ma rac mir ayada, man ilub tok tic ma ber, ku yioyic, ku mer, ku kwiocwiny, karacelo ku ju m’ulwong’o Rwoth ku i adundegi ma leng’.

²³ Ento kwer penji ma kite mbe, ku ma sang’na bende, m’ing’eyo ko nia ginyayu dhau.

²⁴ Man ke jamiru pa Rwoth maku kud edhau, ento ebed yo ni dhanu ceke, ku ng’eyo rieko mi ponji, ku reyo lembe de i tielo,

²⁵ ku ponjo ju ma piwu nge kugi ku molcwiny; kuno nyo Mungu bimio igi lokocwiny cil ku ng’eyong’ec mi lemandha,

²⁶ kara giai gigi kud i uwic pa wonabali, m’edaru makugi ni ayeki ni yeny ma ie yenyo.