2 Samwil 23 - The Holy Bible In Alur (Lur) Revised Orthography

Lembe ma Cen pa Daudi

¹ Nie maeni en e lembe ma cen pa Daudi. Daudi ma wod Yese wacu kumae, Man ng’atu ma judode malu wacu kumae, Ng’atu ma juwiro pa Mungu pa Yakobo, Man jawer ma mit mir Israel:

² Tipo Yehova weco kuda, Man lembe pare ni wi leba.

³ Mungu mir Israel uwacu kumae, Cana mir Israel uweco i bang’a: Ng’atu m’ubimo wi dhanu pwe, M’ubimo ku lworo pa Mungu,

⁴ Ebibedo calu der mi nyangu, kinde ma ceng’ uwok, Nyangu m’umbe afuru, Kinde ma lum ma yom uloth kud i ng’om, Ni kum rienyne ma yo ng’ei koth.

⁵ Andha ot para bedo kumeno ngo ku Mungu; Ento etimo kuda lembariba mi nja, Ayika i lembe ceke, man andha: Kum en e both para ceke, man yeny ceke ma ia yenyo, Kadok eketho edongo ngo,

⁶ Ento ju ma ayi Mungu mbe i kumgi kagi ceke gibibedo calu ukudho ma jubayu cen, Kum jucopo makugi ku cing’ ungo;

⁷ Ento ng’atu m’umulogi Maku ebed kud umbu i cinge man ku yendtong’: Man jubiwang’ugi kot ku mac ku i kakagi.

Jurukara pa Daudi

⁸ Maeni gi nying’ dhanu ma tek ma Daudi bedo ko: Yoceb-bascebeth ma Jatakemoni, ma jadit mi jego; en e Adino ma Jaezni, kum dak abora ma junego i nindo acel.

⁹ Man yo ng’eye Eleazar ma wod Dodai ma wod Jaahohi, en e ng’atu acel ma kind dhanu adek ma tek ma ni ku Daudi, kinde ma gicayu Jufilisti ma gicokri karacelo keca ni lwiny, man dhanu mir Israel ucidho kamange.

¹⁰ Eai, man egoyo Jufilisti maram cinge ol ko, man cinge moko kum palamularu; e Yehova timo aloci ma dit ceng’ maeca; man dhanu gidok yo ng’eye nigamu ayeki kende.

¹¹ Man yo ng’eye Cama ma wod Age ma Jaharari. E Jufilisti gicokri karacelo ni udul, ka ma ng’et ng’om upong’ i ie ku nyamunguk; e dhanu ringo ni Jufilisti.

¹² Ento ecungo i die ng’et ng’omne, man egwoke, e enego Jufilisti; man Yehova timo aloci ma dit.

¹³ Man kind dhanu ma dongo pier adek giloro piny, man gibino ba Daudi i nindo mi mwoka ba odng’om mir Adulam; man udul mi Jufilisti gigonjo i poga mi Refaim.

¹⁴ Man i kinde maeni Daudi ni i ka ma tek; man ot mir ali mi Jufilisti ni i Beth-lehem i nindo maeca.

¹⁵ Man ava pi nego Daudi, man ewacu kumae, A tek ng’atu moko mio ira pi m’amadhi kud i pi m’atong’a mi Beth-lehem, ma ni dhugang’!

¹⁶ E dhanu adek ma jurukara ging’enyo kind udul mi Jufilisti, man gitwomo pi kud i pi m’atong’a mi Beth-lehem, ma ni dhugang’, e gigame, man gikele ba Daudi: ento ekwero madhu kume moko, ento ekonje woko ni Yehova.

¹⁷ Man ewacu kumae, Dong’ ebed bor ira, E Yehova, ma nia atim maeni: abimadhu rimb ju m’ucidho m’ukuno kwo migi akuna? ka kumeno eyio ngo emadhi. Dhanu ma jurukara adek gitimo gin maeni.

¹⁸ Man Abicai, m’umin Yoab, ma wod Zeruia, en e jadit mi juadekne. Man eting’o tong’ pare kum dhanu dak adek man enegogi, man ebedo ku nyinge i kind juadek maeno.

¹⁹ Ebedo ku yung ma sagu ngo i kind juadeki? ka kumeno jukethe ni jego migi: ento etundo ngo kum juadek ma kwong’a.

²⁰ Man Benaya ma wod Yehoiada, ma wod ng’atu ma jakero mi Kabzel, m’etimo tic ma wang’u ijo, enego wot Ariel ario ma Moab; eloro piny bende enego umvor de i vur i nindo mi pei.

²¹ E enego Jamisiri, ma ng’atu ma tek: e Jamisirine bedo ku tong’ i cinge; ento eloro piny i bang’e kud uluth, man emayu tong’ kud i cing’ Jamisirine, e enege jeu tong’ pare gire.

²² Benaya ma wod Yehoiada timo gin maeni, man ebedo ku nying’ kind dhanu ma jurukara adek.

²³ Ebedo ku yung ma sagu dhanu pier adek, ento etundo ngo kum juadek ma kwong’a. E Daudi kethe wi juporlembe pare.

²⁴ Asahel m’umin Yoab en e ng’atu acel ma kind dhanu pier adek: Elhanan ma wod Dodo ma Beth-lehem,

²⁵ man Cama ma Jaharodi, ku Elika ma Jaharodi,

²⁶ man Helez ma Japalti, man Ira ma wod Ikec ma Jatekoi,

²⁷ man Abiezer ma Jaanathothi, man Mebunai ma Jahucathi,

²⁸ man Zalmon ma Jaahohi, man Maharai ma Janetofathi,

²⁹ man Heleb ma wod Bana ma Janetofathi, Itai ma wod Ribai ma Gibeya mi nyithindho pa Benyamin,

³⁰ man Benaya ma Japirathoni, man Hidai mi kulo mi Gac,

³¹ man Abi-albon man Jaarbathi, man Azmaveth ma Jabarhumi

³² man Eliaba ma Jacalboni, ma wot Yacen, Yonathan,

³³ man Cama ma Jaharari, man Ahiam ma wod Carar ma Jaharari,

³⁴ man Elifelet ma wod Ahasbai, ma wod Jamakasi, man Eliam ma wod Ahithofel ma Jagiloni,

³⁵ man Hezro ma Jakarmeli, man Parai ma Jaarbi,

³⁶ man Igal ma wod Nathan ma Zoba, man Bani ma Jagadi,

³⁷ man Zelek ma Jaamoni, man Naharai ma Jaberothi, gi juyei jamtho pa Yoab ma wod Zeruia,

³⁸ man Ira ma Jaithri, man Gareb ma Jaithri,

³⁹ man Uria ma Jahiti: kagi ceke gi pier adek wi abiro.