2 Samwil 19 - The Holy Bible In Alur (Lur) Revised Orthography

¹ Man juyero ni Yoab, nen, ubimo beywak man can unege pi Absalom.

² Man aloci m’i ceng’ maeca ulokre ni can ni dhanu ceke; kum dhanu winjo i ceng’ maeca kumae, Can unego ubimo kum wode.

³ Man dhanune gicidho ling’ ling’ i ceng’ maeca i adhura, calu dhanu ma lewic unego gi kinde ma gilui ku dhu lwiny.

⁴ E ubimo umo wang’e, man ubimo ywak ku dwande ma tek kumae, E woda Absalom, E Absalom, woda, woda!

⁵ Man Yoab umondo i ot bang’ ubimo, e ewacu kumae, Inyayu lewic tin i wang’ jutic peri ceke, ma gibodho kwo peri tin, ku kwo mi woti ku mi nyigi, man kwo mi mon peri, man kwo mi mon peri m’araga,

⁶ kum imaru ju m’udegi, man idagu ju m’umeri. Kum tin inyutho, nia judongomawijo ku jutic gi gin moko ngo iri: kum tin ang’eyo nia tek Absalom ubedo kwo, man wan ceke watho tin, kuno di ebedo ber i weng’i.

⁷ Ka kumeno kawono ai, wok woko, man iyer lemjuk ni jutic peri; kum akwong’o ku Yehova, tek iwok woko ngo, ng’atu moko mbe ma bidong’ i beng’i i diewor maeni: e maeni bibedo rac iri ma sagu lembe ma rac ceke m’uwok i kumi ugambre kum aradu peri cil ku kawono.

⁸ Ubimo lund uai malu, man ebedo i dhugang’. Man giyero ni dhanu ceke, giwacu kumae, Nen, ubimo bedo dhugang’: e dhanu ceke gibino i wang’ ubimo. Nwang’u Israel uringo ku ba dhanu ceke ng’atuman ba hema pare.

Daudi Dwogo i Yerusalem

⁹ Man piem ni i kind dhanu ceke mi suru ceke mir Israel ngung’, giwacu kumae, Ubimo bodhowa kud i cing’ judegi mwa, man ebodhowa kud i cing’ Jufilisti; man kawono eringo kud i ng’om ni kum Absalom.

¹⁰ Man Absalom, ma wawiro i wiwa, etho i lwiny. Ka kumeno kawono nedi wukwero yero lembe mi gamu ubimo kendo?

¹¹ Man ubimo oro kwenda ba Zadok man bang’ Abiathar ma gi julam, ewacu kumae, Wuyer ni judongo mi Yuda, wuwac kumae, Nedi wubedo cen kum dwoko ubimo i ot pare? kum wec mir Israel ceke bino bang’ ubimo, mi dwoke i ot pare.

¹² Wun wu utumira, wun wu cogona man ring’kuma: ka kumeno nedi wubedo cen kum dwoko ubimo?

¹³ Man wuwac ni Amasa kumae, In i cogona ku ring’kuma ngo? Mungu tim kumeno i kuma, man mange bende, tek ibedo jego mir udul ungo i wang’a thiri thiri i ka Yoab.

¹⁴ Man eketho adunde mi dhanu ceke mi Yuda urum, cil calu adunde ng’atu acel; ketho nia gioro kwenda bang’ ubimo, giwacu kumae, Dwogi, ku jutic peri ceke.

¹⁵ Kum kumeno ubimo dwogo, man ebino Yordan. Man Yuda bino Gilgal, kara gicigiromb kud ubimo, kara gikadh ubimo ku wi Yordan.

¹⁶ Man Cimei ma wod Gera, ma Jabenyamini, dhanu ma Bahurim, etimo pio man eloro piny ku dhanu pa Yuda kara eromb kud ubimo ma Daudi.

¹⁷ Man dhanu rubanga acel pa Benyamin gini kude, ku Ziba ma jatic mi ot pa Saul, ku wote apar wi abic man jutic pare pier ario karacelo kude; e gikadhu kud i Yordan i vut ubimo.

¹⁸ Man yei ukadhu lokaca kara ugam juot p’ubimo, man utim gin m’ubedo ber i wang’e. Man Cimei ma wod Gera podho piny i wang’ ubimo, kinde m’eai loka Yordan.

¹⁹ Man ewacu ni ubimo kumae, Rwoth para kud ukwan kier ira, kadi kud ipoi kum gin ma jatic peri timo ku co i ceng’ ma rwoth para m’ubimo uwok i ie kud i Yerusalem ma nia ubimo keth lembene i adundene.

²⁰ Kum jatic peri ng’eyo nia adubo: ka kumeno, nen, abino tinuni m’atelo yo i wang’ juot pa Yusuf ceke kara alor piny aromb ku rwoth para m’ubimo.

²¹ Ento Abicai ma wod Zeruia loko lembe man ewacu kumae, Jubinego Cimei ngo pi maeni, kum elamu ng’atu ma Yehova wiro?

²² E Daudi wacu kumae, Wabedo ku lembang’o wakudu, wu wot Zeruia, ma nia wubed judegina tini? jubiketho ng’atu moko tho tin i kind Israeli? kum ang’eyo ngo tin nia an a ubimo wi Israeli?

²³ Man ubimo wacu ni Cimei kumae, Ibitho ngo. Man ubimo kwong’o ire.

²⁴ Man Mefiboceth ma wod Saul uloro piny kara eromb kud ubimo; man eronyo tiende ngo, kadi enyaru tike de ngo, kadi kendi de elwoko ngo, ugambre i ceng’ m’ubimo ai i ie cil i ceng’ m’edwogo ie pacu ma cwinye kwio.

²⁵ Man etimbre, kinde m’ebino Yerusalem kara eromb kud ubimo, nia ubimo wacu ire kumae, Nedi wacidho wakudi ngo Mefiboceth?

²⁶ Man eloko lembe kumae, Rwoth para, e ubimo, jatic para bomba: kum jatic peri wacu kumae, Abiyiko jamb woth ira wi kana, kara awoth i wie, man wacidh kud ubimo; kum jatic peri en e won abala.

²⁷ Man edoto jatic peri ba rwoth para m’ubimo; ento rwoth para m’ubimo en e calu malaika pa Mungu: ka kumeno tim gin ma ber i weng’i.

²⁸ Kum juot pa vwa ceke gi calu avu i wang’ rwoth para m’ubimo; ento iketho jatic peri kind ju ma camu dhu mesa peri ma dhe. Ka kumeno ng’ol ma nedi m’abedo ko ma nia aywak asu kendo bang’ ubimo?

²⁹ E ubimo wacu ire kumae, Nedi iyero pi lembe peri kendo? Awacu kumae, Wupok ng’om wuku Ziba.

³⁰ Man Mefiboceth uwacu ni ubimo kumae, Eyo wek egam ceke kum rwoth para m’ubimo dwogo ma cwinye kwio i ot pare ma dhe.

³¹ Man Barzilai ma Jagileadi uloro piny kud i Rogelim; man ekadhu loka Yordan gikud ubimo, kara ekadhe ku wi Yordan.

³² Nwang’u Barzilaine en e ng’atu m’uti dit, rundi pare doko pier abora: man eketho cemo wok ni ubimo kinde m’ebedo i Mahanaim; kum en e ng’atu ma dwong’ apila.

³³ Man ubimo wacu ni Barzilai kumae, Kadh i bang’a lokani, man abigwoki i bang’a i Yerusalem.

³⁴ Man Barzilai uwacu ni ubimo kumae, Ceng’ mi rundi mi bedo para en e adi, ma nia aidh malu kud ubimo i Yerusalemi?

³⁵ Tin rundi para doko pier abora: acopo ng’io gin ma ber ku gin ma raci? jatic peri copo bilo gin m’acamu kadi gin ma madhu? acopo winjo kendo dwand co m’uwer man dwand mon m’uweri? ka kumeno nedi jatic peri bed ni ter asu ni rwoth para m’ubimo?

³⁶ Jatic peri bikadhu loka Yordan kende kud ubimo: man nedi ubimo cule ira ku wagi sukulia ma kumeni?

³⁷ Akwei, wek jatic peri dok kendo, kara atho i adhura para ma dhe, i ng’et liel pa vwa ku pa ma. Ento nen, jatic peri ma Kimham; wek ekadh lokaca ku rwoth para m’ubimo; man itim gin ma bibedo ber iri i bang’e.

³⁸ Man ubimo loko lembe kumae, Kimham bikadhu lokaca karacelo kuda, man abitimo gin ma bibedo ber iri i bang’e: man gin ma tek ibilwong’o i bang’a, abitimo maeno iri.

³⁹ Man dhanu ceke gikadhu loka Yordan, man ubimo kadhu lokaca: e ubimo cwio limb Barzilai, man emio mugisa ire; e edwogo i kakare ma dhe.

⁴⁰ Kum kumeno ubimo kadhu lokaca ba Gilgal, man Kimham ukadhu kude: man dhanu mi Yuda ceke gikadhu kud ubimo, ku ng’et dhanu mir Israel bende.

⁴¹ Man, nen, dhanu ceke mir Israel gibino bang’ ubimo, man giwacu ni ubimo kumae, Nedi utumegwa ma dhanu pa Yuda gikweli, man gidwoko ubimo, ku Juode, loka Yordan, ku dhanu pa Daudi ceke gikugi?

⁴² E dhanu pa Yuda ceke giloko lembe ni dhanu mir Israel kumae, Kum ubimo en e wat mwa ma ceng’ni: ka kumeno ng’ecwiny unegowu kum lembe maeni nedi? wacamu gin moko ma p’ubimo? kadi emio iwa giramia moko?

⁴³ Man dhanu mir Israel giloko lembe ni dhanu pa Yuda, man giwacu kumae, Wabedo ku ng’et piny apar bang’ ubimo, man wabedo ku ng’ol bende ba Daudi ma sagu wun: ka kumeno wucayuwa nedi, ma nia ku walar wapor lembe mi dwoko ubimo mwa? Man lembe mi dhanu pa Yuda kwiny ma sagu lembe mi dhanu mir Israel.