2 Samwil 17 - The Holy Bible In Alur (Lur) Revised Orthography

Hucai Uroco Wec pa Ahithofel

¹ Man ke Ahithofel uwacu ni Absalom kumae, Kawono wek agoi wi dhanu rubanga apar wi ario, man abiai abilubo tok Daudi i diewror maeni:

² man abibino i wie kinde m’eol man kinde ma cinge ng’ic, e abinyayu lworo i ie; man dhanu ceke ma ni kude gibiringo; e abigoyo ubimo kende.

³ Man abidwoko dhanu ceke i beng’i: ng’atu m’iyenye en e calu tek gidwogo ceke: kum kumeno dhanu ceke bibedo ma ewinygi kwio.

⁴ Man lembawaca maeni nyayu mutoro dit i Absalom, man i judongo mir Israel ceke.

⁵ Absalom ulund uwacu kumae, Kawono wulwong’ Hucai ma Jaarki bende, man wek wawinj lembe ma en bende ewacu.

⁶ Man kinde ma Hucai bino bang’ Absalom, Absalom uyero ire, ewacu kumae, Ahithofel uyero kuman kuman: wabitimo calu m’ewacu? tek ungo, waci.

⁷ Man Hucai uwacu ni Absalom kumae, Lembapora ma Ahithofel umio i nindo maeni e ber ungo.

⁸ Hucai wacu mange kumae, Ing’eyo wuru ku dhanu pare, nia gi dhanu ma tek, man ali ni i pidoigi, calu wai ma jukwalu nyithindhe i thim; man wuru en e dhanu mir ali, e ebigonjo ku dhanu ngo.

⁹ Nen, epondo kawono i vur moko, kadi i kamoko mange: man ebitimbre, kinde ma jumoko m’i kindgi gilar gipodho, nia ng’atu ma tek uwinjo maeni biwacu kumae, Nek ni i kind dhanu ma gilubo Absalom.

¹⁰ Man cil ng’atu ma en e jarukara, ma adundene calu adunde umvor, ndiri bing’oi i ie ceke; kum Israel ceke ng’eyo nia wuru en e ng’atu ma tek, man ju ma gini kude gi dhanu ma jurukara.

¹¹ Ento aporo lembe nia Israel ceke jucok karacelo i beng’i, ugambre Dan cil kum Ber-ceba, calu kwio ma dhu nam ni udul; man nia icidh in ku kiti i lwiny.

¹² Kum kumeno wabibino i wie ku kamoko ma junwang’e i ie, man wabicora i wie calu thoi core wi ng’om; man wabiweko dhanu pare acel de ngo ku mi dhanu ceke ma gini kude de.

¹³ Mange ke, tek jugame i adhura, Israel ceke bilund kelo uno bang’ adhura nica, man wabiywaye i kulo, maram jubinwang’u ko kidi acel ma nok de ngo kuca.

¹⁴ E Absalom ku dhanu mir Israel ceke giwacu kumae, Lembapora pa Hucai ma Jaarki e ber ma sagu lembapora pa Ahithofel. Kum Yehova ketho ya junyoth lembapora ma ber pa Ahithofel, kara Yehova kel lem ma rac kum Absalom.

¹⁵ Hucai ulund uwacu ni Zadok man ni Abiathar ma gi julam kumae, Ahithofel uporo lembe kuman kuman giku judongo mir Israel ni Absalom; man aporo lembe kuman kuman.

¹⁶ Ka kumeno kawono or kwenda pio, man wuyer ni Daudi, wuwac kumae, Kud wugonj ku diewor maeni i kakadhu mi langa, ento ikadh lokaca dhara; ubimo maru mwony, ku dhanu ceke ma ni kude.

¹⁷ Nie Yonathan ku Ahimaz gibedo ng’et En-rogel; man bong’ moko cikucidho yero igi; e gicidho giyero ni Daudi m’ubimo: kum ecopre ngo nia junen gimondo i adhurane.

¹⁸ Ento nyathi nico nenogi, man eyero ni Absalom: man gicidho gin ario pio pio, e gibino ba ot mi dhanu i Bahurim, m’ubedo ku pi m’atong’a i lela pare; e giloro piny kuca.

¹⁹ E dhakune gamu jambum man epedhe wi dhu pi m’atong’a, e emoyo cam m’aoda i wie; e jung’eyo gin moko ngo.

²⁰ Man jutic pa Absalom gibino ba dhaku i ot; man giwacu kumae, Ahimaz ku Y onathan gini kani? E dhakune wacu igi kumae, Gikadhu loka kulo mi pi. E ka giyenyo man gicopo nwang’ugi ngo, gidwogo Yerusalem.

²¹ Man etimbre, yo ng’ei ai ma giai ko, nia giidho malu kud i pi m’atong’a, man gicidho giyero de ni ubimo ma Daudi; e giwacu ni Daudi kumae, Wuai, man wukadh pio loka pi; kum Ahithofel uporo lembe kumeni i kumi.

²² Daudi lund uai, ku dhanu ceke ma ni kude, man gikadhu loka Yordan: ka piny uru ng’atu acel de mbe m’i kindgi ma fokukadhu ngo loka Yordan.

²³ Man kinde ma Ahithofel uneno nia jutimo lembapora pare ngo, eketho jamb woth wi kana pare, man eai, edok thugi, bang’ adhura pare, e eyiko ot pare, man edeire gire; e etho, man juyike i odliel pa won.

Daudi i Mahanaim

²⁴ Daudi lund ubino Mahanaim. Man Absalom ukadhu loka Yordan, en ku dhanu mir Israel ceke gikugi.

²⁵ Man Absalom uketho Amasa wi udul i kaka Yoab. Nwang’u Amasane en e wod ng’atu moko ma nyinge Ithra ma Jaisraeli, m’umondo wi Abigal ma nya Nahac, ma nyamin Zeruia, ma min Yoab.

²⁶ Man Israel kud Absalom gigonjo i ng’om Gilead.

²⁷ Man etimbre, kinde ma Daudi bino Mahanaim, nia Cobi ma wod Nahac pa Raba mi nyithindho mir Amon, ku Makir ma wod Amiel pa Lo-debar, man Barzilai ma Jagileadi pa Rogelim,

²⁸ gikelo kavuto, man tabu, kud agulu mir ulobo, ku nganu, man nganu ma tung’, ku mogo, ku cam m’acela, ku ng’or, ku nyamunguk, man amul m’acela,

²⁹ man kic, ku mo dhiang’, ku rombe, ku cam ma jutimo ku cak mi dhok, ni Daudi, man ni dhanu ma gini kude, kara gicam: kum giwacu kumae, Kec unego dhanune, man giol, rieu pi de negogi, i langa.