2 Samwil 15 - The Holy Bible In Alur (Lur) Revised Orthography

Absalom Ujai ni Daudi

¹ Man etimbre yo ng’ei maeni, nia Absalom uyiko ire magali ku riuni, ku dhanu pier abic m’uring i wang’e.

² Man Absalom uai pir kugweno, man ecungo ng’et yo mi dhugang’: man ebedo, nia, kinde ma ng’atu moko bedo ku lem titi ma maku ubin bang’ ubimo upok lembene, e Absalom lwong’e, man ewacu kumae, Iai i adhura ma kani? Man ewacu kumae, Jatic peri ai i adhura moko mi suru mir Israel.

³ E Absalom uwacu ire kumae, Nen, lembe peri ber man atira; ento ng’atu moko mbe m’ubimo ketho nia uwinji.

⁴ Absalom uwacu kendo kumae, A dok ande juketho abed japoklembe i ng’om, kara dhanu ceke kubang’gi kubang’gi m’ubedo ku lem titi kadi lembe moko gicopo bino i bang’a, man kuno di apoko lembe migi pwe!

⁵ Man ebedo, nia, kinde ma ng’atu moko bino ceng’ni kara erwo i bang’e, erieyo cinge, man eting’e, e ecwio limbe.

⁶ Man Absalom utimo kumeni bang’ Israel ceke m’ubino bang’ ubimo pi pokolembe: kum kumeno Absalom ukwalu adunde dhanu mir Israel.

⁷ Man etimbre ka rundi pier ang’wen uthum, nia Absalom uwacu ni ubimo kumae, Akwei, wek acidh atim lembang’ola para, m’ang’olo ni Yehova, i Hebron.

⁸ Kum jatic peri ng’olo lembang’ola kinde m’ebedo i Gecur i Cami, awacu kumae, Tek Yehova bidwoka kendo i Yerusalem andha, abilund timo ni Yehova.

⁹ E ubimo wacu ire kumae, Cidh ma cwinyi kwio. Kum kumeno eai, man ecidho Hebron.

¹⁰ Ento Absalom uoro julib i suru mir Israel ceke mba mba, ewacu kumae, Tek wuwinjo badwal mir agwara, wubilund wacu kumae, Absalom en e ubimo i Hebron.

¹¹ Man dhanu dak ario gicidho gikud Absalomgi kud i Yerusalem, ma julwong’ogi, man gicidho ma gibedo sang’na; man ging’eyo gin moko ngo.

¹² E Absalom ulwong’o Ahithofel ma Jagiloni, ma japor thelembe pa Daudi, ku i adhura pare, en e i Gilo, kinde m’ebethiero lam. Man ropne bedo tek; kum dhanu gimedri thiri thiri kum Absalomne.

¹³ E jakwenda wok ba Daudi, uwacu kumae, Adunde mi dhanu mir Israel ni i tok Absalom.

¹⁴ Man Daudi wacu ni jutic pare ceke ma gini karacelo kude i Yerusalem kumae, Wuai wek waringu; kum tek kumeno ngo ng’atu moko mbe m’i kindwa ma biboth ni Absalom: wutim pio kara waeyu, emaru rubowa pio, man emaru kelo lem ma rac i kumwa, man emaru goyo adhura ku lak palamularu.

¹⁵ Man jutic p’ubimo giwacu ni ubimo kumae, Nen, jutic peri gibedo ayika mi timo gin ceke ma rwoth para m’ubimo bifoyo.

¹⁶ E ubimo wok woko, ku juode ceke i toke. Man ubimo weko mon apar, ma gi mon m’araga, kara gigwok ot.

¹⁷ E ubimo wok woko, man dhanu ceke gilubo toke; e gigonjo i Bethmerhak.

¹⁸ E jutic pare ceke gikadhu i wang’e; ku Jukerethi ceke, man Jupelethi ceke, ku Jugiti ceke, gi dhanu dak abusiel m’ulubo toke kud i Gath, gikadhu i wang’ ubimo.

¹⁹ Ubimo lund uwacu ni Itai ma Jagiti kumae, Nedi in de wabino wakudu? doki, man ibed karacelo kud ubimo: kum in i jawirok, man in i dhanu ma ng’eca; dok i kakeri ma dhe.

²⁰ Kum ibino nyaworo kende, emaku tinuni wating’i wi woth ma yo malu ku ma yo pinyi wakudu karacelo, kum nwang’u acidho ka ma copo? doki, man wudok ku utumeru; kisa ku lemandha bed kudi.

²¹ Man Itai uloko lembe bang’ ubimo, ewacu de kumae, Calu Yehova bedo kwo, man calu rwoth para m’ubimo bedo kwo, andha i ka ma tek Rwoth para m’ubimo bibedo i ie, tek mi tho kadi mi kwo, e jatic peri bende bibedo keca.

²² Man Daudi wacu ni Itai kumae, Cidhi man ikadh lokaca. E Itai ma Jagiti kadhu lokaca, ku dhanu pare ceke, ku nyithindho ceke ma gini kude.

²³ E ng’om ceke ywak ku dwal ma tek, man dhanu ceke kadhu lokaca: ubimone bende kadhu kulo Kibron, man dhanu ceke gikadhu lokaca, yor i langa.

²⁴ Man, nen, Zadok bende bino, ku Julawi ceke gikugi, ma gibeyeyo sanduk mi lembariba pa Mungu; e giketho sanduk pa Mungu piny; man Abiathar uidho malu, maram dhanu ceke gikadhu ko ku i adhura.

²⁵ Man ubimo wacu ni Zadok kumae, Dwok sanduk pa Mungu kendo i adhurane: tek anwang’u bero i wang’ Yehova, ebidwoka kendo, man ebinyuthe ira, ku kabedo pare:

²⁶ ento tek ewacu kumae, Mutoro nega ngo i kumi; nen, aeni, wek etim i kuma calu m’ubedo ber ire.

²⁷ Ubimo wacu bende ni Zadok ma jalam kumae, In i jaeulembe ngo? dok i adhura ma cwinyi kwio, wuku woti ario, Ahimaz ma wodi, man Yonathan ma wod Abiathar.

²⁸ Nen, abikorio tundu i dhu kakadhu m’i langa, maram lembe m’uai i beng’wu bidwoka ko tek.

²⁹ Ka kumeno Zadok gikud Abiathar giyeyo sanduk pa Mungu gidwoko i Yerusalem: e girio keca.

³⁰ Man Daudi idho malu ku yo kum ka m’aidha mi got Zeituni, man ewotho ku ywak; man wie bedo auma, man ewotho ma wara mbe: e dhanu ceke ma gini karacelo kude giumo wigi kubang’gi kubang’gi, man giidho malu, e giwotho ku ywak.

³¹ E ng’atu acel uyero ni Daudi, ewacu kumae, Ahithofel ni i kind ju m’uribo lembe kud Absalom. Man Daudi wacu kumae, E Yehova, akwei, lok lembapora pa Ahithofel ni lemkasegu.

³² Man etimbre, nia, kinde ma Daudi wok i ka m’aidha ka ma jurwo ie ni Mungu, nen, Hucai ma Jaarki bino rombo kude ku kanzu pare m’uyec, ku ng’om de i wie.

³³ Man Daudi wacu ire kumae, Tek wakadhu wakudi, ibilund bedo ni ter ira:

³⁴ ento tek idok i adhura, man iwac ni Absalom kumae, Abibedo jatic peri, E ubimo; calu abedo jatic pa wuru i nindo m’ukadhu, e kumeno abibedo jatic peri kawono; e ibilund nyotho lembapora pa Ahithofel ira.

³⁵ Man wubedo wuku Zadok kud Abiathar ma julamgi kuca ngo? ka kumeno ebibedo, nia gin ma tek ibiwinjo i ot p’ubimo, ibiyere ni Zadok man Abiathar ma gi julam.

³⁶ Nen, gibedo ku wotgi ario gikugi kuca, Ahimaz, ma wod Zadok, ku Yonathan, ma wod Abiathar; wubiciko lembe ceke ma wuwinjo i dhu joni ira.

³⁷ Kum kumeno Hucai, ma jarimb Daudi, ubino i adhura; man Absalom ubino i Yerusalem.