2 Lemkei 4 - The Holy Bible In Alur (Lur) Revised Orthography

¹ Mange ke etimo pemblam mi mola, kaborne bot pier ario, man kalacne bot pier ario, man kadongone bot apar.

² Etimo nam m’athiedha bende bot apar ugambre i dhoge utundo kum dhoge, m’ebedo ngulungulu i porne; man kadongone bot abic; man wang’e mi bot pier adek utieke gbur.

³ Man ayi koni dhiang’ ni i there, m’utieke gbur, mi bot apar, m’utieko nam gbur. Koni dhiange bedo i wang’e ario, ma juthiedhogi kinde ma juthiedhe,

⁴ Ecungo wi koni dhiang’ apar wi ario, adek ubeneno yor ariwa ma malu, man adek ubeneno yo reto, man adek ubeneno yor ariwa ma piny man adek ubeneno yo nyangu: e juketho nam i kumgi yo malu, man thegi ceke bedo yor i ie.

⁵ Man pek mi dhoge kalaccing’; man jutimo dhoge calu dhu kikombe, calu thiu kura: etero pi ma romo ajiku rubanga adek.

⁶ Etimo jamblogo bende apar, man eketho abic yo ku cinge ma yor acwic, man abic yor acam, kara julog i igi; julwok wagi gin mi lam m’awang’a i igi; ento nam en e ni julam ma gijom i ie.

⁷ Man etimo thethala apar mi mola ma kwar calku lembapoka ma pigi; man ekethogi i hekalu, abic yo ku cinge ma yor acwic, man abic yor acam.

⁸ Etimo mesa apar bende, man ekethogi i hekalu, abic i ng’ete ma yor acwic, man abic yor acam. Man etimo tabu dak acel mi mola ma kwar.

⁹ Mange ke etimo lelagang’ mi julam, man lelagang’ ma dit, ku dhugola mi lelagang’, man emwono dhugolanegi ku mola.

¹⁰ Man eketho nam i ng’et ode ma yor acwic yo nyangu, yor ariwa ma piny.

¹¹ Man Huram utimo agulu, kud upalkwer, man ajiku. Kum kumeno Huram udaru tim mi tic m’etimo ni ubimo ma Suleman i ot pa Mungu:

¹² mbegi ario, kud ajiku, man ruko ario ma gini wi mbegi, man tic mi voi ario kara uum tabu ario mi ruko ma ni wi mbegi,

¹³ man nyingulemo dak ang’wen mi tic mi voi ario; wang’e ario mi nyingulemo mi tic mi voi kubang’e kubang’e, kara uum tabu ario mi ruko ma ni wi mbegi.

¹⁴ Etimo there bende, man etimo jamblogo wi therene;

¹⁵ nam acel, man koni dhiang’ apar wi ario i there.

¹⁶ Agulu bende, man upalkwer, man gol mi ring’o, kud agulune ceke, Huram ma won mire timo ni ubimo ma Suleman, pi ot pa Yehova, ku mola ma rieny.

¹⁷ Ubimo thiedhogi i pambu mi Yordan, i ng’ombulobo i kind Sukoth man Zereda.

¹⁸ Suleman utimo agulu maeni ceke kumeni dit apila: kum wel pek mi mola jucopo nwang’u ngo.

¹⁹ Man Suleman utimo agulu ceke ma ni i ot pa Mungu, pemblam mi mola ma kwar bende, man mesa ma kwen m’anyutha ni i wie;

²⁰ man thethala ku thalane de, kara uliel calu lembapoka i wang’ kayerlembe, ku mola ma kwar ma leng’;

²¹ man thiuboko, ku thala, man ramak, mi mola ma kwar, man maeno mola ma kwar ma cu;

²² man makasi, kud ajiku, man lupau, kud atangla mi mac, mi mola ma kwar ma leng’. Man mi kamondo mi ot, dhugola ma yor i ie mi kamaleng’ m’usagu, ku dhugola mi ode, en e, mi hekalu, gi mi mola ma kwar.