2 Lemkei 3 - The Holy Bible In Alur (Lur) Revised Orthography

Suleman Ugomo Ot pa Yehova

¹ Suleman ulund utheko gomo ot pa Yehova i Yerusalem wi got Moria, ka ma Yehova nyuthre ie ni Daudi ma won, m’eyiko i ka ma Daudi ketho, wi lelacam pa Oman ma Jayebusi.

² Man etheko gomo i ceng’ mir arionde mi dwi mir arionde, i rundi mir ang’wende mi camuker pare.

³ Nie maeni gi the ot ma Suleman uketho mi gomo ot pa Mungu. Kaborne ku bot calu kapor ma kwong’ane en e bot pier abusiel, man kalacne bot pier ario.

⁴ Man pondot ma ni i wang’ode, kaborne, calku kalac mi ode, en e bot pier ario, man kadongone dak acel ku pier ario; man emwone yor i ie ku mola ma kwar ma leng’.

⁵ Man ot m’usagu eumo wie ma yor i ie ku yendsipre, m’emwono ku mola ma kwar ma leng’, man etimo thith ku nyoro i wie.

⁶ Man eruko ot ku kidi ma pire tek mi ruko: man mola ma kwarne en e mola ma kwar mi Parvaim.

⁷ Man emwono ot bende, ku riu, man kamondo, ku kore, ku dhugolane, ku mola ma kwar; man eng’iko kerubi i kor ode.

⁸ Man etimo ot ma leng’ m’usagu: kaborne, calu kalac mi ode, en e bot pier ario, man kalacne bot pier ario; man, emwone ku mola ma kwar ma leng’, ma romo talanto dak abusiel.

⁹ Man wel pek mi musumali en e cekel pier abic mi mola ma kwar. Man emwono kusika ma malu ku mola ma kwar.

¹⁰ Man i ot ma leng’ m’usagu etimo kerubi ario mi tic mir ayi m’acwia; man jumwonogi ku mola ma kwar.

¹¹ Man bomb kerubi kaborne bot pier ario: bomb kerubi acel bot abic, ma tundo kum kor ode; man bomb mucelo bende bot abic, utundo kum bomb kerubi mucelo.

¹² Man bomb kerubi mucelo bot abic, m’utundo kor ode; man bombe mucelo de bot abic, m’eribre ku bomb kerubi mucelo.

¹³ Bomb kerubi maeni girieiri gigi bot pier ario: man gicungo wi tiendgi, man wang’gi lokre yo kum ot.

¹⁴ Man etimo kusikabongu mi gin m’ulweku, ku gin m’uluga, man gin ma kwar ngbo, man bongu ma nwang’ ma ber, man etimo kerubi i wie.

Tic pa Huram i Ot pa Yehova

¹⁵ Etimo mbegi bende ario ma kadongone bot pier adek wi abic i wang’ode, man ruko ma ni i wigi kubang’gi kubang’gi en e bot abic,

¹⁶ Man etimo nyoro i kayerlembe, man ekethogi i wi mbegine; e etimo nyingulemo dak acel, man ekethogi wi nyoro.

¹⁷ Man eketho mbegine cungo i wang’ hekalu, acel yo ku cinge ma yor acwic, mucelo ke yor acam; man elwong’o nying’ ma ni yo ku cing’ ma yor acwic Yakin, man nying’ maeno ma ni yor acam Boaz.