2 Lemkei 1 - The Holy Bible In Alur (Lur) Revised Orthography

Suleman Ukwayu Rieko

¹ Man Suleman ma wod Daudi doko tek i ker pare, man Yehova Mungu pare bedo kude, man edode apila.

² E Suleman uyero ni Israel ceke, ni jego mi rubanga ma mi dak, man ni jupoklembe, man ni judongomawijo ceke i Israel kubang’gi kubang’gi, man ni wi udi pa wego.

³ Kum kumeno Suleman, ku cokri ceke gikugi, gicidho ba ka ma malu ma ni i Gibeon; kum hema mi cokri pa Mungu ni kuca, ma Musa ma jatic pa Yehova timo i langa.

⁴ Ento Daudi kelo sanduk pa Mungu malu kud i Kiriath-yearim i ka ma Daudi yiko pire; kum eguro hema pire i Yerusalem.

⁵ Man ke pemblam mi mola, ma Bezalel ma wod Uri, ma wod Hur, utimo, ni kuca i wang’ hema pa Yehova: man Suleman ku cokri gicidho i bang’e.

⁶ E Suleman uidho malu kuca ba pemblam mi molane i wang’ Yehova, m’eni i vut hema mi cokri, man ethiero lam m’awang’a rubanga i wie.

⁷ I diewor nica Mungu nyuthre ni Suleman, man ewacu ire kumae, Kwai gin m’abin ami iri.

⁸ E Suleman uwacu ni Mungu kumae, Inyutho mer mi bero dit ni Daudi ma vwa, man iketha ni ubimo kakare.

⁹ Kawono, E Yehova Mungu, wek lembang’ola peri ma ni Daudi ma vwa cungi; kum iketha ni ubimo wi dhanu ma calu utur mi ng’om ni udulgi.

¹⁰ Kawono mi ira rieko ku ng’eyong’ec, kara awok woko amond de i wang’ dhanu maeni; kum ng’a ma copo poko lembe ni dhanu peri maeni, ma en e dit kumeni?

¹¹ Man Mungu wacu ni Suleman kumae, Kum maeni ni i adundeni, man ipenjo lonyo ngo, kadi piny, kadi yung, kadi kwo mi ju m’udegi, kadok bedohai de fodi ipenjo ngo; ento ipenjo rieko ku ng’eyong’ec iri giri, kara ipok lembe mi dhanu para, m’akethi ni ubimo i wigi:

¹² rieko ku ng’eyong’ec umire iri; man abimio iri lonyo, ku piny, man yung, wadi m’ubimo moko mbe m’ular uwok i weng’i bedo ko; kadok moko ma bibedo ku ma kumeno yo ng’ei de mbe.

¹³ Kum kumeno Suleman uai kud i ka ma malu ma ni i Gibeon, kud i wang’ hema mi cokri, i Yerusalem; man ecamu ker wi Israel.

Riuni ku Magali ma gi Jambkuloka pa Suleman

¹⁴ Man Suleman ucoko magali ku weg riuni: man magali pare rubanga acel ku dak ang’wen, weg riuni ke rubanga apar wi ario, m’eketho i adhura mi magali, man karacelo kud ubimo i Y er usalem.

¹⁵ Man ubimo ketho mola ma tar ku mola ma kwar ubed calu kidi i Yerusalem, man musonge eketho ubed calu yenduduk ma ni i poga, ni ditne.

¹⁶ Man riuni ma Suleman ubedo ko jukelo ku i Misiri; weg katali p’ubimo jologi ni udul, udul kubang’e kubang’e mi welpiny.

¹⁷ Man gikelo magali malu kud i ng’om Misiri mi cekel mi mola ma tar dak abusiel, man riuni mi cekel dak acel ku pier abic: man kumeni mir ubimo ceke mi Juhiti, man ubimo mi Cami, giwodhogi ku cing’gi.