2 Jukorinto 4 - The Holy Bible In Alur (Lur) Revised Orthography

Piny M’akana i Agulu mir Ulobo

¹ Ka kumeno kum wabedo ku tim maeni, calu wanwang’u kisa, e wavoc ungo:

² ento wadaru kwero giramung’a mi lewic, ma wabewotho ko ku rieko mir awondi ngo, kadi ma wabetimo lembe pa Mungu ku ndra de ngo; ento ku nyuthonyuth mi lemandha ma wabefoira ko ni pidocwiny mi dhanu kubang’gi kubang’gi i wang’ Mungu.

³ Man tek lembanyong’a mwa ma juboth ko uumbre ku bongu, meca eumbre ni ju ma girwinyo:

⁴ i joca mungu mi ng’om maeni yutho wang’ pidoic mi ju ma juyic ungo, kara der mi lembanyong’a ma juboth ko mi dwong’ pa Kristu, ma en e ayi Mungu kud uler igi.

⁵ Kum wayero piwa giwa ngo, ento Kristu Yesu re ya Rwoth, man wan nini ya jumiru mu ni kum Yesu.

⁶ Kum en e Mungu m’uwacu kumae, Der birieny kud i mudho, m’edaru rieny i adundewa, kara emi der mi ng’eyong’ec mi dwong’ pa Mungu i wang’ Yesu Kristu.

⁷ Ento wabedo ku piny m’akana maeni i agulu mir ulobo, kara dwong’ m’apila mi tego maeni ubed pa Mungu, man m’uai i bang’wa giwa re ngo;

⁸ judiowa yo kun ku kun ceke, ento rititi re ngo; cwinywa ng’abre, endre cwinywa kuai ungo;

⁹ juriemowa, ento jukukunowa de ngo; juredhowa piny, ento jukunyothowa de ngo;

¹⁰ wabeyeyo nek pa Yesu thiri thiri i kum, kara kwo pa Yesu bende nyuthre i kumwa.

¹¹ Kum wan ma wakwp nini juting’owa thiri thiri wang’ tho pi Yesu, kara kwo pa Yesu bende unyuthre i kumwa ma tho.

¹² Ka kumeno tho betimbre i iwa, ento kwo re i iwu.

¹³ Ento ma wabedo ku tipo mi yioyic ma calacel, calku maeni m’ugore kumae, Ayio, e kumeno bende ayero; wan bende wayio, e kumeno bende wayero;

¹⁴ ma wang’eyo ko nia ng’atu m’uketho Rwoth Yesu cer ebiketho wacer bende karacelo ku Yesu, man ebiketho wa i wang’e wakudu.

¹⁵ Kum gin ceke en e piwu, kara bero maeni, m’ucikumedre ni kum dhanu dupa, uketh foyofoc usagre ni dwong’ pa Mungu.

Bedo ni Kum Yioyic

¹⁶ Kum kumeno wavoc ungo; ento kadok ng’atu mwa ma yo woko betop, ento ng’atu mwa ma yor i iwa doko nyen ku ba rupiny ku ba rupiny.

¹⁷ Kum can mwa ma yot, ma nyagwil, etimo iwa ter mi dwong’ ma nja ku nja ma sagu dit apila;

¹⁸ nwang’u fodi wabeneno ngo ba gin ma nen, ento ba gin ma nen ungo re: kum gin ma nen kadhu akadha; ento gin ma nen ungo re bedo rondo ku rondo.