2 Jukorinto 1 - The Holy Bible In Alur (Lur) Revised Orthography

Moth

¹ Paolo, jakwenda pa Yesu Kristu ni yeny ma Mungu yenyo, man Timoteo m’umegwa, ni kanisa pa Mungu ma ni i Korinto, ku jumaleng’ ceke ma ni i Akaya yu:

² Bero iwu man kwiocwiny m’uai ba Mungu ma Wegwa man Rwoth Yesu Kristu.

Foyofoc pa Paolo Yo Ng’ei Masendi

³ Mugisa ni Mungu man Won Rwoth mwa Yesu Kristu, ma Wego mi kisa man Mungu mi jukojuk ceke;

⁴ m’ejukowa i can mwa ceke, kara wacopo juko ju ma gini i can moko, ni kum jukojuk ma Mungu juko ko wan giwa.

⁵ Kum calu sendri pa Kristu sagre iwa, e kumeno jukojuk mwa bende sagre ni kum Kristu.

⁶ Ento kadok wasendra, en e pi jukojuk mu man both mu; kadi kadok wabedo ajuka, en e pi jukojuk mu, m’ubetimbre i ciro can ma calacel ku maeno ma wan bende wasendra kudo ku twiocwiny:

⁷ man genogen mwa piwu cungo tek; ma wang’eyo ko nia, calu wun wugamu kum sendrine, kumeno bende wu jugam jukne.

⁸ Kum wayenyo ngo, umego, ya wubed cobo kum lembe mi can ma wanwang’u i Asia, ya junurowa piny apila, ma sagu tego mwa, ketho cwinywa ai cil kum kwo:

⁹ eyo, wan giwa wabedo ku lembang’ola mi tho yor i iwa giwa, kara ku wagendra giwa, ento i Mungu re ma ting’o ju m’utho:

¹⁰ m’elaruwa kud i tho ma dit kumeni, man ebilaru: e waketho genogen mwa i ie ya ebilaruwa asu bende;

¹¹ ma wubekonyo karacelo bende piwa ku kwac ma wukwayu; kara, kum giramia ma jumio iwa ni kum dhanu dupa, foyofoc umire ku dhanu dupa ni kumwa.

Paolo Galu Kuliewo Korinto

¹² Kum kulula mwa e eni, lembatuca mi pidocwiny mwa, nia i leng’cwiny man cwiny ma abombi mbe i ie pa Mungu, i rieko mi kum de ngo endre i bero pa Mungu, watimbra giwa i ng’om, ma sagu dit yor i beng’wu.

¹³ Kum wagoro iwu giki mange ngo, ndhu ma wusomo kadi ma wutuco, man ageno de ya wubituco cil i kajikne:

¹⁴ calu jumoko m’i kindwu bende gituco piwa, ya wan wa kulula mu, cil calu wun bende wu mwa, i ceng’ pa Rwoth mwa Yesu.

¹⁵ E i genogen maeni nwang’u ia pido ya alar abin i beng’wu, kara wunwang’ kuloka mir arionde;

¹⁶ man abikadhu kud i beng’wu m’acidho ko i Makedoni, man kendo kud i Makedoni abibino i beng’wu, e wun e ma wubicika i woth para m’acidho ko i Yahudi.

¹⁷ E kinde ma ia pido kumeno, anyutho lok ma pidoia lokre ko swa? kadi gin m’akeco ya abitimo, akeco calku kum, ya eyo eyo kud ungo ungo ubed nuti i bang’a?

¹⁸ Ento calu Mungu en e mandha, lembe mwa ma yor i beng’wu de en e eyo kud ungo de ngo.

¹⁹ Kum Wod Mungu, Yesu Kristu, en nini ma pire yere i kindwu ni kuma, ndhu ni kuma waku Siluano man Timoteo, en e eyo kud ungo de ngo, ento i ie re en e eyo.

²⁰ Kum kadok lembang’ola pa Mungu gi dupa, e eyo ni i ie: kum kumeno amen bende ni i kume, ni dwong’ pa Mungu ni kumwa.

²¹ Nie ng’atu m’uketho wanyang’ wakudu i Kristu, en m’ewirowa de, en e Mungu;

²² en bende m’eketho ayi i kumwa, man emio mukwatu mi Tipo i adundewa.

²³ Ento alwong’o Mungu ni jamulembe mi pidoic para, kum ngisi nega i kumwu ketho akwero bino Korinto.

²⁴ En e kum wan wa rwodhi mi yioyic mu ngo, endre wa jukony mi mutoro mu: kum i yioyic wucungo ki.