1 Yohana 1 - The Holy Bible In Alur (Lur) Revised Orthography

Lembe mi Kwo

¹ Maeno ma nuti ugambre ku kwong’a, maeno ma wawinjo, maeno ma waneno ku wang’wa, maeno ma waneno tel, ma cingwa de mulo, pi Lembe mi kwo

² (kwone de nyuthre, e wadaru neno, wanyutho lembe de, wayero iwu de pi kwo, kwo ma rondo ku rondo, m’ubedo ku Wego, man enyuthre iwa de);

³ maeno ma waneno ma wawinjo de wayero iwu bende, kara wun bende wubed ku ripocwiny wakudu; eyo, man ripocwiny mwa ni karacelo ku Wego, man ku Wode Yesu Kristu;

⁴ e wagoro gin maeni kara anyong’a mwa pong’.

Mungu En e Der

⁵ Maeni en e rwonglembe ma wawinjo i bang’e man wayero iwu de, nia Mungu en e der, man mudho tak de mbe i ie.

⁶ Tek wawacu nia wabedo ku ripocwiny wakude enke wawotho i mudho, nwang’u waewayu ndra, watimo lemandha de ngo:

⁷ ento tek wawotho i der, calu en eni i der, nwang’u wabedo ku ripocwiny ma man ku wadi man ku wadi, man rimb Yesu ma Wode ubelonyowa ni dubo ceke.

⁸ Tek wawacu nia dubo mbe kudwa, nwang’u wawondra giwa, lemandha de mbe i iwa.

⁹ Tek watuco dubo mwa, en e mandha man pwe mi weko dubo mwa, mi lonyowa de ni gondri ceke.

¹⁰ Tek wawacu nia wadubo ngo, nwang’u wadwoke ni jandra, lem pare de mbe i iwa.