1 Ubimo 3 - The Holy Bible In Alur (Lur) Revised Orthography

Suleman Ugamu Nya Farao

¹ Suleman utimo lembariba ku Farao m’ubimo mi Misiri, man egamu nya Farao, e ekele i adhura pa Daudi, cil m’edaru gomo ot pare ma dhe, man ot pa Yehova, ku gang’kidi mi Yerusalem m’utieke gbur.

² Ento dhanu gilamu lam i ka ma malu, kum ot moko mbe ma jugomo ku nying’ Yehova cil i ceng’ maeca.

Suleman Ukwayu Rieko

³ Man Suleman umaru Yehova, m’ebewotho ku cik pa Daudi ma won: ento elamu lam man ewang’u udok ma ng’wice ng’ar i ka ma malu.

⁴ E ubimo cidho Gibeon kara elam lam kuca; kum ka ma malu ma dit ni kuca: Suleman uthiero lam m’awang’a rubanga acel wi pemblam maeno.

⁵ Mungu nyuthre ni Suleman ku wang’ lek ku diewor: e Mungu wacu kumae, Penj gin m’abimio iri.

⁶ Man Suleman uwacu kumae, Inyutho kisa ma dit ni jatic peri ma Daudi ma vwa, calu ewotho i weng’i i lemandha, man i bedopwe, man kud adunde m’atira kudi; man ikanu ire kisa maeni ma dit, nia imio ire nyathin ma nico ujany wi komker pare, calu ebedo i ceng’ ma tin.

⁷ Man kawono, E Yehova Mungu para, iketho jatic peri ni ubimo kaka Daudi ma vwa: e fodi a nyathin ma nok; ang’eyo ngo maram acidh ko woko kadi mondo de.

⁸ Man jatic peri ni i kind dhanu peri m’igoyo wigi, dhanu ma dit, ma welgi copo kwandre ngo kadok ang’eya de ni udulgi.

⁹ Ka kumeno mi adunde mi ng’eyong’ec ni jatic peri m’epok ko lembe wi dhanu peri, kara ang’i kind gin ma ber ku gin ma rac; kum ng’a ma copo poko lembe mi dhanu peri maeni ma diti?

¹⁰ Man wec maeni nyayu mutoro i Rwoth, nia Suleman upenjo gin maeni.

¹¹ E Mungu wacu ire kumae, Kum ipenjo gin maeni, man ipenjo kwo ma hai iri ngo, kadok lonyo de ipenjo ngo iri giri, kadok kwo mi judegini de ipenjo ngo, ento ipenjo ng’eyong’ec iri giri kara ing’i pokolembe ma pwe;

¹² nen, atimo calku lembe peri: nen, amio iri adunde mi ng’eyong’ec mi rieko; kum kumeno ng’atu moko mbe ma fodi uwok ma calu in, kadok yo ng’ei de ng’atu moko mbe ma biwok ma calu in.

¹³ Man amio iri gin m’ipenjo ngo bende, lonyo ku yung bende, ketho nia ng’atu moko mbe ma bibedo i kind ubimo ma calu in, i nindo peri ceke.

¹⁴ Man tek ibiwotho i yo para, kara iwor cik para ku lembang’ola para, calu Daudi ma wuru wotho, abilund medo nindo peri.

¹⁵ E Suleman uceu; man, nen, en e lek: man ebino Yerusalem, e ecungo i wang’ sanduk mi lembariba pa Yehova, man ethiero lam m’wang’a, man ethiero lam mi kwiocwiny, man etimo agba ni jutic pare ceke.

Lembapoka ma pwe pa Suleman

¹⁶ Mon ario ma weg asara gilund gibino bang’ ubimo, man gicungo i wang’e.

¹⁷ E dhaku acel uwacu ire kumae, A, rwoth para, waku dhaku maeni wabedo i ot acel; man anyolo nyathin i vute i ot.

¹⁸ Man etimbre i ceng’ adek yo ng’ei nyol para, nia dhaku maeni bende nyol; man wani karacelo; jawirok moko mbe i bang’wa i ot, ndhu wan ario i ot.

¹⁹ E nyathin pa dhaku maeni tho ku diewor, kum evuto i wie.

²⁰ Man eai ku diewor ma ling’, e eting’o woda kud i ng’eta, kinde ma bong’ peri nindo, man ekethe i kore, eketho avuj nyathin pare de i kora.

²¹ E kan aai kugweno kara aketh nyathin para dhothi, nen, en e avu; ento kan anene kugweno, nen, en e woda ngo, m’anyolo.

²² Man dhaku mucelo wacu kumae, Ungo; ento ma kwo en e woda, man m’utho en e wodi. Man maeni wacu kumae, Ungo; ento m’utho en e wodi, man ma kwo en e woda. Giweco kumeni i wang’ ubimo.

²³ Ubimo lund uwacu kumae, Ng’atu acel uwacu kumae, Maeni woda m’ubedo kwo, man wodi e m’utho: man mucelo wacu kumae, Ungo; ento wodi e m’utho, man woda e m’ubedo kwo.

²⁴ E ubimo wacu kumae, Wukel palamularu i bang’a. Man gikelo palamularu i wang’ ubimo.

²⁵ E ubimo wacu kumae, Wupok nyathin ma kwo udok ario, man wumi ng’ete kucel ni ng’atu acel, ng’ete kucel ke ni ng’atu mucelo.

²⁶ E dhaku ma nyathin ma kwo en e pare lund uwacu ni ubimo, kum cwinye bemiel kum wode, man ewacu kumae, A, rwoth para, mi nyathin ma kwo ire, man kud inege ki. Ento mucelo wacu kumae, Ebibedo para kadi peri de ngo; wupok ie.

²⁷ Ubimo lund uloko lembe man ewacu kumae, Wumi nyathin ma kwo ire, man kud wunege ki: en e min mire.

²⁸ E Israel ceke winjo pi lembapoka m’ubimo poko; e gilworo ubimo: kum gineno nia rieko pa Mungu ni i ie, kara utim lembapoka ma pwe.