1 Timoteo 5 - The Holy Bible In Alur (Lur) Revised Orthography

¹ Kud irwodh arwodha wi jadit, ento dong’ ijuke calu en e wego; awobi ke calu utumego:

² mon ma dongo ke calu mego; mon ma nyir ke calu nyimego, ku leng’cwiny ceke.

³ Yung mon ma coggi tho ma gi mon ma coggi tho andha.

⁴ Ento tek dhaku moko ma cware tho etie ku nyithindhe kadi nyikwaye de, wek gilar giponj ng’eyo nyutho bero migi kum juot migi gigi, ma gidwok kudo wang’ gwok ma junyodo migi gwoko kogi: kum maeni yire i wang’ Mungu.

⁵ Nie ng’atu ma dhaku ma cware tho andha, man ebedo e kende, e genogen pare ni ba Mungu, man ebedo kokro ku kwayukwac ku rwo diewor ku dieceng’ de.

⁶ Ento ng’atu m’uketho wang’e gire kum mutoro meca en e avu ma fodi en ke e kwo.

⁷ Ng’ol gin maeni bende, kara lembacaya bed umbe i kumgi.

⁸ Ento tek ng’atu moko gwoko dhanu pare gire ngo, e ka juode ma dhe de k’egwokogi ngo, meca ekwero yioyic, man edoko rac ma sagu ng’atu ma jayic ungo.

⁹ Kujugor nying dhaku ma cware tho ma fodi oro pare ku tundo pier abusiel ungo, ma k’ebedo kor nico acel kende ngo,

¹⁰ ma rwong tic ma ber pare ku yik ungo; tek etungo nyithindho, tek egwoko welo, tek elwoko tiend jumaleng’ de, tek ekonyo jucan de, tek elubo tic ma ber ceke kubang’gi kud amora, a dong’ jugor nyinge.

¹¹ Ento mon ma thindho re ma coggi tho kwergi: kum ka gibijai kum Kristu kum ava gin m’utimogi, e gibiyenyo gigambri;

¹² meca gitie ku lembe i wigi, kum gidaru kwero yioyic migi ma kwong’a.

¹³ Ku sagri ma gisagri ko nini ging’io ku bedo ma swa swa, ma giwotho ko ku ba udi ku ba udi; ma gi juswa kende ngo, endre gi jurwei lembe arweya bende man gi juthub athube, gibegiyero lembe ma maku ku giyer.

¹⁴ Ka kumeno ayenyo mon ma thindho ma coggi tho jugamgi, ginyol nyithindho, gibim wi udigi, ku giketh lembe moko wok ma jadegiwa bicayu kume cac:

¹⁵ kum ju moko dard kier ngi gilubo tok Jok.

¹⁶ Tek dhaku moko ma jayic tic ku mon ma coggi tho, wek egwokgi, lembene kud unur kanisa; kara egwok pare mon ma coggi tho mandha.

¹⁷ Maku judongo m’ubimo bim cu dong’ jukwan ya giromo ku yung ma juyungo kojo wang’ ario, ma dhene re ju ma gimuli ku tic mi lembe ku mi ponji de.

¹⁸ Kura lembagora pa Mungu wacu kumae, Kud wutwi dhu koni dhiang’ kan ebeyoko anyogi. Man ke, Ng’atu m’umule ku tic uromo ku sukulia pare.

¹⁹ Lembe ma jucuko kum jadit kud iyi, tek jumulembene kubedo ario kadi adek ungo.

²⁰ Ju ma gidubo lembe jukgi i wang’ dhanu ceke, kara ju m’udong’ bende gilwor.

²¹ Ang’olo iri i wang’ Mungu, ku Kristu Yesu, ku malaika ma jugoyo nying’gi, ya iwor gin maeni ma fodi ikung’olo pire ngo, ma k’itimo gin moko ngo ni kum mer m’imaru ko jumoko.

²² Kud iketh cingi vur vur kum ng’atu moko, kadi kud iribri i dubo mi jumange: igwokri giri leng’.

²³ Kud ibed jamadh pi kendo, ento imadh pigulok nyanok ni cino ii man ni tho peri ma betimi bende.

²⁴ Dubo mi dhanu moko nyuthre ngbeng’, gilar gicidho i poko lembe; mi jumoko bende lubo ng’eigi.

²⁵ Ka kumeno tic ma ber moko ginyuthri ngbeng’: m’ubedo tung’ bende copo mungre ngo.