1 Timoteo 3 - The Holy Bible In Alur (Lur) Revised Orthography

¹ Maeni lembe mandha, Tek ng’atu moko beyenyo tic pa jalieu, nwang’u ebeyenyo tic ma ber.

² Ka kumeno jalieu ukoubed ma adote mbe i kume be, cwar dhaku acel, ng’atu ma dhiro wi ava gin ceke, ma pidoie nger, ng’atu ma ketho tic cungo cu, ng’atu ma gwoko welo ber, ng’atu m’ung’eyo rieko mi ponji;

³ ng’atu ma jakwakwa ngo wi pigulok, ma goyo jo de ngo; ento ng’atu ma mol, ma japiem ungo, ng’atu ma jamar sente hai ngo;

⁴ ng’atu ma bimo wi juode cu, ma nyithindhe de giwore umbe lele;

⁵ (ento tek ng’atu m’ung’eyo bimo wi juode gire ngo, ebing’ei gwoko kanisa pa Mungu nenedi?)

⁶ ng’atu ma foduyio kawono re ngo, kum marmoko ebitingre ebipodho i lembapoka pa Jok.

⁷ Man ke ekoebed ng’atu ma ju ma woko de gibegiwaeu ya pire ber be; kara kud epodh i agobe kud uwic pa wonabali bende.

Gin M’uketho Jukony Uromo pi Tic Migi

⁸ Jukony bende kumeno gikogibed be umbe lele, ma dhoggi ario de ngo, ma madhu pigulok hai ngo, ma ava kuloka ma rac timogi hai ngo;

⁹ m’egwoko giramung’a mi yioyic ku pidocwiny ma leng’.

¹⁰ Maku joni bende jular juponjgi; tek gibedo umbe adote, wuwek gibed jukony.

¹¹ Mon bende kumeca gikogibed be umbe lele, ma gibalu abali ngo, ma gidhiro wi ava gin ceke, ma gi mandha kum gin ceke.

¹² Dong’ jukony gibed cog mon acel acel, ma gibimo wi nyithindhgi ku udigi bende ber.

¹³ Kum ju ma gitimo tic mi jukony adre ginwang’u kacungo migi gigi ma gicungo ko ber, ku tegocwiny ma dit i yioyic ma ni i Kristu Yesu.

Giramung’a mi Yioyic Mwa

¹⁴ Lembe maeni agoro iri, m’ageno ko ya abibino i beng’i fodi nyanok;

¹⁵ ento tek agalu hai, kara ing’ei maram maku jutim i ot pa Mungu, ma en e kanisa pa Mungu ma kwo, mbegi ku tiend ot mi lemandha.

¹⁶ Ebedo mi piem ungo nia giramung’a mi bedo ma ayi Mungu ni kume e dit; Ng’atu m’unyuthre ku kum, Tipo nwang’u lembe pare ber, Malaika de gineno, Juyero pire de i kind thek, Juyic de i ng’om, Jujole de malu i dwong’.