1 Timoteo 2 - The Holy Bible In Alur (Lur) Revised Orthography

¹ Ka kumeno aponjowu, nia ka fodi wukularwukwayu kum gin mange ngo, wutim penji, ku rwo, ku kwayukwac, ku foyofoc, ni Mungu kum dhanu ceke;

² kum ju m’ubimo man ju ma ni wi jo ceke; kara wanwang’ bedo mi kwiocwiny man yo ma ayi Mungu ni i kumwa ku pidoic ma cu de.

³ Maeni e ber eyire de i wang’ Mungu ma Jalar mwa;

⁴ m’e yenyo dhanu ceke bothi, ku bino ba ng’eyong’ec mi lemandha.

⁵ Kum Mungu en e acel, jakind Mungu ku dhanu de acel, en de e dhanu, ma Kristu Yesu,

⁶ m’emire gire ni jamgony ni dhanu ceke; nyuthonyuth maeni binyuthre nwang’u kakare tundo;

⁷ kum eni juketha ni jayerlembe ku jakwenda de (ayero lemandha, acwayu ndra ngo), an a japonji mi Thekdhanumange i yioyic ku lemandha.

⁸ Ka kumeno ayenyo jumaco rwo ku kaka ma gini i ie ceke, giting’ ko cing’gi malu ma gi leng’, ma kwinyo ku lem piem de mbe.

⁹ Jumamon bende kumeca, gikend kendi m’uromo kakendi, karacelo ku lworo ku bedo nger de; ku yukwigi m’akieda ngo, ku mola ma kwar kadi kidi ma i upal de ngo, kadi kendi de ma ng’ieune tek;

¹⁰ endre (m’umaku mon m’utuco ya ayi Mungu ni i kumgi) ni kum tic ma ber.

¹¹ Dong’ dhaku ponj ng’eyo lembe yo ku woro m’ewor ko.

¹² Ento ayio ngo ya dhaku ponj ponji, kadi ebim wi co, endre ebed pare yo.

¹³ Kum jular jucwio Adamu, ka judong’ jucwio Eva;

¹⁴ man ke jukuwondo Adamu ngo,

¹⁵ ento juwondo dhaku e m’upodho i dubo: ento ebiboth ku nyolo nyodo, tek gibedo asu ku yioyic ku mer ku dwokrileng’ ku bedonger bende.