1 Samwil 6 - The Holy Bible In Alur (Lur) Revised Orthography

Jufilisti Dwoko Sanduk pa Mungu

¹ E Sanduk pa Yehova bedo i ng’om mi Jufilisti dwi abiro.

² E Jufilisti lwong’o julam ku jubila, giwacu kumae, Wabitimo ang’o ku sanduk pa Yehova? wunyuth iwa maram wabiore ko i kakare.

³ Man giwacu kumae, Tek wudwoko sanduk pa Mungu mir Israel, kud wudwoke mananu; ento wudwok ire girathiera mi kier andhandha: e kumwu bilund kei, man wubing’eyo nia cinge ai ungo kud i kumwu nedi.

⁴ Gilund giwacu kumae, Girathiera mi kier bibedo ang’o ma wabidwoko ire? E giwacu kumae, Vur mi mola ma kwar abic, man uyo m’i lum mi mola ma kwar abic, calku wel mi judongo mi Jufilisti; kum thong’om acel ni i wiwu ceke, man wi judongo mu.

⁵ Kum kumeno wubitimo ayi vur mu, man ayi uyo m’i lum mu m’unyotho ng’om; man wubimio dwong’ ni Mungu mir Israel: kuno nyo ebidwoko cinge yot kud i kumwu, man kud i kum mungu mu, man kud i kum ng’om mu.

⁶ Kum kumeno wudwoko adundewu nwang’ nedi, calu Jumisiri ku Farao gidwoko adundegi nwang’i? Kinde m’etimo gin ma wang’uic i kindgi, giweko dhanu cidho, man giai ungo?

⁷ Ka kumeno kawono wugam man wuyik magali ma nyen, ku dhiang’ ario ma weg cak, ma mberembere moko fokuwok i kumgi ngo; man wutwi dhiang’ne kum magali, man wudwok nyithi dhiang’ne pacu kud i bang’gi;

⁸ man wuting’ sanduk pa Yehova man wukethe wi magali; e wuketh ruko mi mola ma kwar ma wudwoko i bang’e ni girathiera mi kier, i katoko i ng’ete; man wuore, kara ecidhi.

⁹ Man wunen; tek eidho malu ku yo mi kieu pare gire ba Beth-cemec, e nwang’u etimo gin ma rac apila maeni en i kumwa: ento tek ungo, wabilund ng’eyo nia en e cinge ngo m’ugoyowa; nwang’u en e thotok m’uwok i kumwa.

¹⁰ E dhanune gitimo kumeca, man gigamu dhiang’ ario ma weg cak, e gitwiogi kum magali, man giciko ba nyithindhgi i pacu;

¹¹ e giketho sanduk pa Yehova wi magaline, man katoko kud uyo mi lum mi mola ma kwar i ie kud ayi vur migi.

¹² E dhiang’ne gikwanyu yo m’atira ba yo ma cidho Beth-cemec; gicidho ku ba gengi, ma gibewotho ku ywak, e gilokri i ng’ete ma yor acwic kadi ma yor acam de ngo; man rwodhi mi Jufilisti gilubo tokgi ba kieu mi Beth-cemec.

¹³ Man ju m’i Beth-cemec gibenyaru nganu migi i poga; e giting’o wang’gi malu, e gineno sanduk, man anyong’a negogi ka ginene.

¹⁴ Man magali bino i podho pa Yocuwa ma Jabeth-cemi, e ecungo keca, ka ma kidi ma dit ni i ie: e gitong’o yen mi magaline, man githiero dhiange ni girathiera m’awang’a ni Yehova.

¹⁵ Man Julawi giting’o sanduk pa Yehova piny, ku katoko ma ni karacelo kude, ma ruko, mi mola ma kwar ni i ie, e gikethogi wi kidi ma dit: man dhanu m’i Beth-cemec githiero lam m’awang’a man gilamu lam i ceng’ maeno ni Yehova.

¹⁶ E kinde ma rwodhi abic mi Jufilisti gineno maeni, gidok i Ekron i ceng’ maeno.

¹⁷ Man maeni gi vur mi mola ma kwar ma Jufilisti gidwoko ni girathiera mi kier ba Yehova: mi Acdod acel, mi Gaza acel, mi Ackelon acel, mi Gath acel, mi Ekron acel;

¹⁸ man uyo m’i lum mi mola ma kwar, calku wel mir adhura ceke mi Jufilisti ma mi rwodhi abic, mir adhura ma tek man mi pacu m’i thim, cil kum kidi ma dit, ma giketho sanduk pa Yehova i wie, ma kidine dong’ cil i ceng’ maeni i podho pa Yocuwa ma Jabeth-cemi.

¹⁹ Man egoyo kind dhanu m’i Beth-cemec, kum gineno i sanduk pa Yehova, e egoyo kind dhanune pier abiro, man dhanu rubanga pier abic; e dhanune giywak, kum Yehova goyo dhanune ku nek ma dit.

²⁰ Man dhanu m’i Beth-cemec giwacu kumae, Ng’a ma copo cungo wang’ Yehova, Mungu maeni ma leng’i? man ebiidho malu ba ng’a kud i bang’wa?

²¹ Man gioro jukwenda ba ju m’ubedo i Kiriath-yearim, giwacu kumae, Jufilisti gidwoko sanduk pa Yehova; wulor piny, man wutere i beng’wu malu.