1 Samwil 27 - The Holy Bible In Alur (Lur) Revised Orthography

Daudi Bedo i kind Jufilisti

¹ E Daudi wacu yo i adundene kumae, Ceng’ moko abirwinyo ku cing’ Saul: gin moko mbe ma ber ira ma sagu ringo i ng’om mi Jufilisti; e cwiny Saul biai i kuma, kara kud eyenya kendo i kieu ceke mir Israel: kum kumeno abiboth kud i cinge.

² Man Daudi ai, ekadhu lokaca de, en ku dhanu dak abusiel ma gini karacelo kude, bang’ Akic ma wod Maok, m’ubimo mi Gath.

³ Man Daudi bedo karacelo kud Akic i Gath, en ku dhanu pare, ku ba dhanu ceke ku juudi, en e Daudi ku mon pare ario Ahinoam ma nya Yezreli, kud Abigail ma nya Karmeli ma naka dhaku pa Nabal, e Man juyero ni Saul nia Daudi ringo i Gath: man eyenye kendo ngo.

⁵ Man Daudi wacu ni Akic kumae, Tek kawono anwang’u bero i weng’i, wek jumi ira kamoko i adhura acel m’i ng’ombe, kara abed keca: kum nedi jatic peri bedo karacelo kudi i adhura mir ubimo?

⁶ Akic ulund umio Ziklag ire ceng’ maeca: kum kumeno Ziklag en e piny mir ubimo mi Yuda cil i ceng’ maeni.

⁷ Man wel ceng’ ma Daudi bedo ie i ng’om mi Jufilisti en e rundi acel yul ku dwi ang’wen.

⁸ E Daudi ku dhanu pare giidho malu, githero lwiny kum Jugecuri, man Jugirzi, ku Juamaleki; kum thek maeno gi ju m’ubedo i ng’ombe, ma ginuti con, kan icidho i Cur, cil ba ng’om Misiri.

⁹ E Daudi goyo ng’ombe, man ebodho nico kadi dhaku de ngo ma kwo, eyaku rombe de, ku koni dhiang’, ku kana, man ngamia, ku kendi de; man edwogo, ebino de bang’ Akic.

¹⁰ Man Akic uwacu kumae, Wuthero lwiny ba ng’a tinuni? Man Daudi wacu kumae, Kum ng’et Yuda ma yo piny man kum ng’et Juyeramel ma yo piny, man kum Jukeni ma yo piny.

¹¹ Man Daudi bodho nico kadi dhaku de ngo ma kwo, kara ekelgi i Gath, ewacu kumae, Gimaru tuco wiwa, giwac kumae, Daudi timo kumeni, man kura pare bedo kumeno i nindo ceke m’ebedo i ie i ng’om mi Jufilisti.

¹² Man Akic uyio Daudi, ewacu kumae, Eketho juthugi ma Israel udage hai; ka kumeno ebibedo jatic para mi nja.