1 Samwil 10 - The Holy Bible In Alur (Lur) Revised Orthography

¹ Samwil ulund uting’o cupa mi mo, man ekonje i wie, ecwio limbe de, man ewacu kumae, En e kum Yehova wiri ngo nia ibed jatelwic mir aba pare?

² Kinde m’iai i bang’a tin, ibilund nwang’u dhanu ario ba liel pa Rahel, i kieu pa Benyamin i Zelza; e gibiwacu iri kumae, Kana m’icidho niyenyo junwang’ugi; man, nen, wuru weko pido pi kananegi, man cwinye beringo piri, ewacu kumae, Abitimo ang’o pi woda?

³ Ibilund cidho ku keca, man ibitundo ba bongu mi Tabor; man dhanu adek gibirombo kudi keca ma gibecidho malu ba Mungu i Beth-el, acel m’uyeyo nyithi diegi adek, man wadi m’uyeyo lungu kwen adek, man mucelo ke m’uyeyo cupa mi pigulok:

⁴ e gibimothi, e gibimio lungu kwen ario iri, m’ibijolo kud i cing’gi.

⁵ Yo ku ng’ei maeno ibitundo ba got pa Mungu, ka ma ot ma tek mi Jufilisti ni ie: man ebitimbre, kinde m’iwok kuca i adhura, nia ibirombo kud udul jubila m’uloro piny ku ka ma malu kud adungu, kud umbukulumbu, man ungbalu man nzenze, i wang’gi; e gibibeewo giraewa:

⁶ man Tipo pa Yehova bibino i wi ku tego, man ibiewo lembe karacelo kugi, man ibilokri ni ng’atu mange.

⁷ Man wek ebed, kinde ma giranyutha maeni bibino i beng’i, nia itim calu cingi binwang’u; kum Mungu ni karacelo kudi.

⁸ Man ibiloro piny i wang’a ba Gilgal; man, nen, abiloro piny i beng’i, kara athier lam m’awang’a, man kara alam lam mi girathiera mi kwiocwiny: ceng’ abiro ibidong’, maram abino ko i beng’i, man anyuth iri gin m’ibitimo.

⁹ Man ebedo kumeno, nia, kinde m’eloko ng’eye m’eai ko ba Samwil, Mungu mio ire adunde mange: man giranyutha maeno ceke gitimbri i ceng’ maeca.

¹⁰ E kinde ma gitundo kuca bang’ ungulu got, nen, udul jubila rombo kude; man Tipo pa Mungu bino i wie ku tego, e eewo i kindgi.

¹¹ Man etimbre, nia kinde ma dhanu ceke ma naka ging’eye gineno nia, nen, eewo karacelo ku jubila, e dhanune giwecri gigi kumae, Maeni ang’o m’uwok kum wod Kici? Saul bende ni i kind jubila?

¹² Man ng’atu acel ma kakeca loko lembe man ewacu kumae, Man weggi ng’a? Ka kumeno edoko ni lem koi kumae, Saul bende ni i kind jubila?

¹³ Man kinde m’edaru ewo lembe, ebino ba ka ma malu.

¹⁴ Man neru Saul uwacu ire man ni jatic pare kumae, Wucidho kani? E ewacu kumae, Niyenyo kana; man ka waneno nia ginwangri ngo, wabino ba Samwil.

¹⁵ Man neru Saul uwacu kumae, Yer ira, akwei, gin ma Samwil uwacu iri.

¹⁶ Man Saul uwacu ni neru mire kumae, Eyero iwa kele nia junwang’u kananegi. Ento pi lembe mi ker, ma Samwil uyero pire, eyero ire ngo.

¹⁷ Man Samwil ulwong’o dhanu karacelo ba Yehova i Mizpa;

¹⁸ man ewacu ni nyithindho mir Israel kumae, Yehova, Mungu mir Israel, uwacu kumae, Awodho Israel kud i Misiri, man agonyowu kud i cing’ Jumisiri, man kud i cing’ thek ceke m’usendowu:

¹⁹ ento tinuni wukwero Mungu mu, ma en gire ebodhowu kud i ruvwa mu ceke ku can mu ceke; man wuwacu ire kumae, Ungo, ento keth ubimo i wiwa. Ka kumeno wuthieru giwu i wang’ Yehova ku ba suru mu, man ku ba rubanga mu.

²⁰ Kum kumeno Samwil ukelo suru ceke mir Israel ceng’ni, man jugamu suru pa Benyamin.

²¹ Man ekelo suru pa Benyamin ceng’ni ku juudi migi; man jugamu juot mi Jumatri; man jugamu Saul ma wod Kic: ento kinde ma giyenye, enwangre ngo.

²² Ka kumeno gipenjo Yehova kendo kumae, Ng’atu moko nuti ma fodubino keni ungo? E Yehova loko lembe kumae, Nen, epondo kind jamni.

²³ E giringo man gigame ku kuca; e kan ecungo i kind dhanu, esagu dhanu ceke ku dongone ugambre kum goke man yo malu.

²⁴ E Samwil uwacu ni dhanu ceke kumae, Wuneno ng’atu ma Yehova goyo wie, nia ng’atu moko mbe ma calu en i kind dhanu ceke? E dhanu ceke gigoyo muzira, man giwacu kumae, Dong’ ubimo ubed hai.

²⁵ Samwil ulund uyero ni dhanune maram ker ubedo ko, man egore i kitabu, e ekane i wang’ Yehova. Man Samwil ulalu dhanune ceke, ng’atuman ba ot pare man ba ot pare.

²⁶ Man Saul bende ucidho ba ot pare i Gibeya; man dhanu ma ratego gicidho gikugi, ma Mungu mulo adundegi.

²⁷ Ento dhanu moko ma kitgi mbe giwacu kumae, Ng’atu maeni bibodhowa nenedi? E gicaye, man gikelo ire moth moko de ngo. Ento eoyo lembene aoya.