1 Samwil 1 - The Holy Bible In Alur (Lur) Revised Orthography

Nyol pa Samwil

¹ Nwang’u ng’atu moko nuti m’i Ramathaim-zofim, m’i ng’om gudi pa Efraim, man nyinge Elkana, ma wod Yeroham, ma wod Elihu, ma wod Tohu, ma wod Zuf, ma Jaefraimi:

² man mon pare ario; nying’ ng’atu acel Hana, man nying’ mucelo Penina: man Penina nyithindhe nuti, ento Hana nyithindhe mbe.

³ Man ng’atu maeni idho malu ku i adhura pare ku ba rundi ku ba rundi kara erwo emi lam de ni Yehova mir udul i Cilo. Man wot ario pa Eli, Hofni ku Finehaz, ma julam pa Yehova, gini keca.

⁴ Man ka ceng’ uwok ma Elkana lamu lam i ie, emio makapiny ni Penina ma cege, man ni wote ceke ku nyige ceke:

⁵ ento ni Hana emio makapiny wang’ ario; kum emaru Hana, ento Yehova twio ie.

⁶ Man nyeke timo nyeko i kume, kara esendre, kum Yehova twio ie.

⁷ E kan etimo kumeni ku ba rundi ku ba rundi, kinde m’eidho malu ba ot pa Yehova, etimo nyeko i kume kumeca; ka kumeno eywak, man ecamu ngo.

⁸ Man Elkana ma cware wacu ire kumae, Hana, iywak nedi? man icamu ngo nedi? man cwinyi dieng’ nedi? abedo ber iri ngo ma sagu nyithindho ma co apari?

⁹ Kum kumeno Hana ai malu yo ng’ei ma gicamu i Cilo, man yo ng’ei ma gimadhu. Nie Eli ma jalam ubedo wi kom pare vut mbegi mi dhugola mi hekalu pa Yehova.

¹⁰ Man ng’eyong’ec pare ni i can ma kec, man erwo ni Yehova, man eywak ku can.

¹¹ Man eng’olo lembang’ola, man ewacu kumae, E Yehova mir udul, tek ibineno wi can pa bong’ peri andha, man ipoi pira, man wi biwil kum bong’ peri ngo, ento ibimio nyathin ma nico ni bong’ peri, e abilund mie ni Yehova i nindo ceke mi bedo pare, man riedi moko bimulo kum wie ngo.

¹² Man etimbre, kan eberwo i wang’ Yehova, nia Eli neno dhoge.

¹³ Nwang’u Hana, ebeweco ku yor i adundene; e dendhoge kende m’ubewotho, ento dwande winjre ngo: ka kumeno Eli wacu nyo emer amera.

¹⁴ E Eli wacu ire kumae, Ibimer rokani? keth pigulok peri cen kud i beng’i.

¹⁵ Man Hana loko lembe ewacu de kumae, Ungo, rwoth para, an a dhaku mi cwiny mi can: amadhu ngo kadok pigulok kadi giramadha ma lake tek, ento akonjo ng’eyong’ec para woko i wang’ Yehova.

¹⁶ Kud ikwan bong’ peri ni dhaku ma jadubo; kum kud i dit mi ywak para ku cac para ayero cil kawono.

¹⁷ E Eli lund uloko lembe man ewacu kumae, Cidh ku kwiocwiny; man Mungu mir Israel umi penji peri m’ikwayu i bang’e.

¹⁸ E ewacu kumae, Dong’ bong’ peri unwang’ bero i weng’i. Kum kumeno dhakune cidho i yo pare, man ecamu; man can umbe i wang’e kendo.

¹⁹ E giai malu pir kugweno, man girwo i wang’ Yehova, e gidok, man gibino ba ot migi i Rama. Man Elkana ng’eyo Hana ma cege; e Yehova poi pire;

²⁰ man etimbre, kinde ma nindo tundo, nia Hana gamu ie, man enyolo nyathin ma nico; man elwong’o nyinge Samwil, ewacu kumae, Kum apenje ba Yehova.

²¹ Man ng’atu ma Elkana, ku ot pare ceke, giidho malu kara githier lam ma ku ba rundi ku ba rundi ni Yehova, man lembang’ola pare.

²² Ento Hana idho malu ngo; kum ewacu ni cware kumae, Abiidho malu ngo maram nyathin ukwir ko cak; i nindo maeni abikele, kara enyuthre i wang’ Yehova, man ebed keca mi nja.

²³ E Elkana ma cware wacu ire kumae, Tim gin m’ubedo ber iri; idong’ maram ekwir ko cak; ento Yehova keth lembe pare cungi. Kum kumeno dhakune dong’ man eketho wode dhoth, maram eketho ekwiro ko cak.

²⁴ E kinde m’eketho ekwiro cak, etere malu karacelo kude, ku thwoni dhiang’ adek, man mukero mi mogo acel, ku cupa mi pigulok, e ekele ba ot pa Yehova i Cilo: e nyathin fodi e nyanok.

²⁵ E ginego thwoni dhiang’ne, man gikelo nyathin ba Eli.

²⁶ Man ewacu kumae, A, rwoth para, calu ng’eyong’ec peri bedo kwo, rwoth para, an a dhaku m’ucungo keni i vuti, m’arwo ni Yehova.

²⁷ Arwo pi nyathin maeni; man Yehova mio ira penji m’akwayu i bang’e:

²⁸ ka kumeno bende amie ni Yehova; amie ni Yehova cil m’ebedo ko kwo. Man erwo ni Yehova keca.