1 Petro 2 - The Holy Bible In Alur (Lur) Revised Orthography

¹ Ka kumeno ka wubeketho akece ceke, kud abombi ceke, kud ambili, ku kumira, ku yeronying’ de ceke cen,

² calu mukere ma junyolo kawono, dong’ ava cak mi tipo ma awondi mbe i ie unegwu, kara wudong kude ni both;

³ tek wubilo nia Rwoth e ber;

⁴ ma wubino i bang’e, en e kidi ma kwo, ma dhanu kwere andha, ento ku ba Mungu en e ng’atu ma jugoyo wie, ma pire tek de,

⁵ wun bende, calu kidi ma kwo, wugombru wi ot mi tipo, kara wubed ni lamulam ma leng’, ma wuthiero ko lam mi tipo, ma yire ni Mungu ni kum Yesu Kristu.

⁶ Kum maeni ni i lembagora pa Mungu kumae, Nen, aketho i Sayuni kidi ma dit ma wi gui, ma jugoyo wie, ma pire tek: E ng’atu m’uyio ire jubiketho lewic nege ngo.

⁷ Ka kumeno pire ma tekne en e iwu wu ju m’uyio: ento ni wagi ju m’uyio ngo re kumae, Kidi ma jugomot gikwero, Eni juketho ni wi gui;

⁸ man, Kidi ma redho jo, ku cana mi kier; kum gikier kum lembe, ma gi juco ko; ma yang’ jukethogi kum maeno bende.

⁹ Ento wun wu thekdhanu ma jugoyo nyingwu, lamulam mi ker, thek ma leng’, dhanu mi piny ma dhe pa Mungu, kara wunyuth bero pare m’elwong’owu kud i mudko i der pare ma wang’uic:

¹⁰ wun ma naka wu dhanu ngo, ento kawono wu dhanu pa Mungu: wun ma naka fodi wunwang’u kisa ngo, ento kawono wudaru nwang’u kisa.

Bed Calu Jumiru pa Mungu

¹¹ Jumer, akwayuwu calu jubedo man juwoth, ya wuceru ni awanya ma rac mi kum, ma kiedo kum ng’eyong’ec;

¹² ma wubedo ko ku piwu ma ber i kind Thekdhanumange; kara, i lembe ma giyero ie nyingwu calu wu judubo, giyung Mungu i ceng’ mi lieu, ni kum tic ma ber mu ma gineno.

¹³ Wubed wor ni lembang’ola ceke ma dhanu ketho ni kum Rwoth: kadok ni ubimo, calu ng’atu m’usagu;

¹⁴ kadi ni jubim, calu m’eoro pi culokwor kum judubo man ni pak ni ju m’utimo dre.

¹⁵ Kum yeny ma Mungu yenyo bedo kumeno, nia ku timober wuketh dhanu ma cobo ma jukusegu de uling’:

¹⁶ calu wubedo agonya, man kud wuketh gony mu ni jambum mir akece, endre calu jumiru pa Mungu.

¹⁷ Wuyung dhanu ceke. Wumar umego. Wulwor Mungu. Wuyung ubimo.

Kristu Weko Por Iwa mi Sendri

¹⁸ Jutic, wubed wor ni judongo m’i wiwu ku lworo ceke; ni jubero ku ju ma bedo yo de kendgi ngo, ento ni ju ma kwiny bende.

¹⁹ Kum maeni e yire, tek ng’atu moko ciro can, esendre de ma there mbe, kum pidocwiny ma yo ba Mungu.

²⁰ Kum tek wudubo, man judhongowu, wun de wutwio cwinywu i kume, e pak ma nedi ma wunwang’u pire? ento tek, ka wutimo dre, wusendru pire de, wutwio cwinywu de i kume, maeni yire ni Mungu.

²¹ Kum julwong’owu kum lembe nini: kum Kristu bende sendre piwu, m’eweko ko por iwu, kara wulub ba tiende:

²² m’etimo dubo ngo, kadok abombi de junwang’u ngo i dhoge:

²³ ma, ka jucaye edwoko wang’ cac de ngo; kan esendre, ecimo cim ungo; ento emire gire ni ng’atu m’upoko lembe pwe:

²⁴ ma en gire eyeyo dubo mwa i kume wi yen, kara wan, ma watho ni dubo, wabed kwo ni bedopwe; ku goc pare wun wucangu.

²⁵ Kum nwang’u wubekiewo calu rombe; ento kawono wudwogo ba Jakwac ku Jalieu mi ng’eyong’ec mu.