1 Jukorinto 14 - The Holy Bible In Alur (Lur) Revised Orthography

Dhok ma Tung’ Tung’ ku Ewolembe

¹ Lub tok mer; ento iyeny k’amora giramia mi tipo, ento ma sagu kara wueu.

² Kum ng’atu m’ubeyero ku dhok ma tung’ eyero ni dhanu ngo, endre ni Mungu; kum ng’atu moko mbe m’ung’eyo there; ento kud i cwinye ebeyero giramung’a.

³ Ento ng’atu m’ubeewo meca eyero ni dhanu gin ma teng’o jo, man ponji, man juk.

⁴ Ng’atu m’uyero ku dhok ma tung’ eteng’o cwinye gire; ento ng’atu m’uewo eteng’o kanisa.

⁵ Nie ayenyo kewu ceke wuwec ku leb ma tung’, ento ma sagu re ya wueu: man ng’atu m’uewo esagu ng’atu m’uyero ku dhok ma tung’, tek eloko dhokne ngo, kara kanisa teng’ni.

⁶ Ento kawono, umego, tek abino i beng’wu m’abeweco ku dhok ma tung’, abiloko girang’o iwu, tek ayero iwu ku giranyutha de ngo, kadi ku girang’eya de ngo, kadi ku ewo lembila de ngo, kadi mi ponjo ponji de ngo?

⁷ Cil gin ma kwo mbe kugi, m’ubewodho dwal, kadok usegu kadi thum, tek giwodho dwal ma tung’ tung’ ungo, jubing’eyo gin ma jubekudho kadi ma jubegoyo de nenedi?

⁸ Kum tek agwara kuywak ku dwande ma cu ngo, ng’a ma biyikre gire mir ali?

⁹ Wun bende kumeno, tek wuweco wec ku dhok ma winjre yot yot ungo, jubing’eyo gin ma juyero nenedi? kum nwang’u wubibeweco i lietho.

¹⁰ Andha nyo dwal ma tung’ nuti dupa i ng’om, moko mbe de m’unyutho gin moko ngo.

¹¹ Ka kumeno tek ang’eyo thelembe m’i dwalne ngo, abibedo calu dhanu ma sai ni ng’atu m’ubeyero, ng’atu m’ubeyero nica de bibedo calu ng’atu ma sai ira bende.

¹² Kumeno wun bende, kum nwang’u ava giramia mi tipo negowu dit, dong’ wuyeny kara wusagi ma wuketh ko kanisa teng’ni.

¹³ Kum kumeno wek ng’atu m’uyero ku dhok ma tung’ ukwai Mungu kara elok dhokne.

¹⁴ Kum tek arwo ku dhok ma tung’, meca cwinya berwo en, ento ng’eyong’ec para cego nyinge ngo.

¹⁵ Ka nenedi ke? Abirwo ku cwinya, man abirwo ku ng’eyong’ec bende: man abiwero wer ku cwinya, abiwero wer de ku ng’eyong’ec bende.

¹⁶ Tek e kumeno ngo tek ibemio mugisa ku cwiny, ng’atu ma sang’na bidong’ wacu Amen nenedi kum foc m’ibefoyo, m’eng’eyo gin m’ibeweco ngo e?

¹⁷ Kum andha ibemio foyofoc dre, ento ng’atu mange re teng’ni ngo.

¹⁸ Afoyo Mungu, ayero ku dhok ma tung’ ma sagu wun ceke:

¹⁹ ento i kanisa ayenyo ayer lembe abic ku ng’eyong’ec para, kara aponj jumange bende, sagu ma tek ayero lembe rubanga apar ku dhok ma tung’.

²⁰ Umego, kud wubed nyithindho i pidoic: endre wubed mukere i lembakece, i pidoiwu re wubed dhanu.

²¹ I cik egore kumae, Rwoth uwacu kumae ku dhanu mi dhok ma tung’ man ke ku dendhok mi welo abiyero ni dhanu maeni: ento kadok atim kumeni de gibiwinja ngo.

²² Kum kumeno dhok ma tung’ en e pi giranyutha, ni juyic ungo, ento ni ju ma gi juyic ungo re: ento ewo en e giranyutha, ni ju ma gi juyic ungo ngo, endre ni ju ma gi juyic.

²³ Ka kumeno tek kanisa ceke cokri karacelo ma kagi ceke giweco ku dhok ma tung’ e dhanu ma gibedo sang’na kadi ma gi juyic ungo gimondo, gibiwacu ya wun abelu ngo?

²⁴ Ento tek ceke giewo, man ng’atu ma jayic ungo kadi ng’atu m’ubedo sang’na de mondo, e epoi kum pire ma rac ni kumgi ceke, lembapoka de podho i wie ni kumgi ceke;

²⁵ lembamung’a mi cwinye de wok ka ma leng’; kum kumeno ebipodho piny i wang’e man ebirwo ni Mungu, m’ebiwacu ya Mungu ni i kindwu andha.

Jutim Gin Ceke Cu, Kakare Bende

²⁶ Ka ke ang’o, umego? Ka wucokru karacelo, kubeng’wu kubeng’wu ng’atuman ubedo ku zaburi, ubedo ku lem ponji, ubedo ku lembanyutha, ubedo ku dhok ma tung’, ubedo ku lok ma juloko ko dhokne. Dong’ jutim gin ceke mi teng’oteng’.

²⁷ Tek ng’atu moko yero ku dhok ma tung’, wek juario kadi juadek ku giyer mange, man gilau alawa; man wek ng’atu acel ulok dhokne;

²⁸ ento tek jaloko mbe, wek ebed ling’ i kanisa; man wek eyer ire gire, man ni Mungu.

²⁹ Man wek jubila ario kadi adek giyer, man wek juwagi ging’i ie.

³⁰ Ento tek lembanyutha unyuthre ni wadi m’ubedo i vute, wek ng’atu ma kwong’a bed ling’.

³¹ Kum kewu ceke wucopo ewo acel acel, kara ceke uponj ng’eyo, man ceke de nwang’ juk;

³² man cwiny mi jubila gibedo wor ni jubila;

³³ kum Mungu en e Mungu mi yakni ngo, endre mi kwiocwiny. Calu kanisa ceke mi jumaleng’,

³⁴ wek mon gibed ling’ i kanisa: kum juyio igi ngo ya giyer; ento wek gibed wor, calu cik bende yero.

³⁵ Man tek giyenyo giponj ng’eyo gin moko, wek gipenj coggi gigi ku thugi: kum en e lewic ni mon tek giyero i kanisa.

³⁶ Ang’o? lembe pa Mungu ai i beng’wu? kadi ebino i beng’wu wu kendwu?

³⁷ Tek ng’atu moko ie pido ya e jabila, kadi e won tipo, dong’ emak ng’eyo pi gin m’agoro iwu, ya gi lembang’ola pa Rwoth.

³⁸ Ento tek ng’atu moko bedo cobo, wek ebed cobo.

³⁹ Kum kumeno, juwada, wuyeny k’amora ya wueu, man kud wukwer ya juyer ku dhok ma tung’.

⁴⁰ Ento wek jutim gin ceke cu kakare bende.