1 Jukorinto 1 - The Holy Bible In Alur (Lur) Revised Orthography

Moth

¹ Paolo, ma julwong’e ya ebed jakwenda pa Yesu Kristu ni kum yeny ma Mungu yenyo re, man Sosthene m’umegwa,

² ni kanisa pa Mungu ma ni i Korinto, cil ju ma judwoko gi leng’ ni kum Kristu Yesu, ma julwong’ogi ya gibed jumaleng’ ku dhanu ceke ma gilwong’o nying Rwoth mwa Yesu Kristu ku kaka ma gini i ie ceke, Rwoth migi ku mwa bende:

³ Bero iwu ku kwiocwiny m’uai ba Mungu Wegwa man Rwoth Yesu Kristu.

Foyofoc pi Giramia ma i Kristu

⁴ Afoyo Mungu para i kumwu thiri thiri, kum bero Mungu m’umire iwu ni kum Kristu Yesu;

⁵ kum judwoko wu julonyo i gin ceke ni kume, i wec ceke man i ng’eyong’ec ceke;

⁶ cil calu lembatuca pa Kristu nyang’ ko i iwu:

⁷ ketho wubedo cen ungo kum giramia moko; ma wubekuro ko kanyuth pa Rwoth mwa Yesu Kristu;

⁸ m’ebiketho wunyang’ bende cil i kajikne, kara lembe bed umbe i wiwu i ceng’ pa Rwoth mwa Yesu Kristu.

⁹ Mungu en e mandha, ma julwong’owu ni kume i ripocwiny pa Wode ma Yesu Kristu Rwoth mwa.

Pokri i kind Kanisa

¹⁰ Nie abekwayuwu ma tek, umego, ku nying Rwoth mwa Yesu Kristu, ya kewu ceke wuwec lembe ma calacel, man ke pokri kud ubed i kindwu; endre wubed ma wuribru karacelo ku pidoic ma calacel man ku lembapoka ma calacel.

¹¹ Kum jugolo beng’wu ira, juwada, ku yo ba juot pa Kloe, ya piem ni i kindwu.

¹² Nie lembe nini e ende, ya wun kubeng’wu kubeng’wu man wacu kumae, An a pa Paolo; man, An a pa Apolo; man, An a pa Kefa; man, An a pa Kristu.

¹³ Kristu pokre? juguro Paolo iwu? kadi jumio iwu baputisi ku nying Paolo?

¹⁴ Afoyo Mungu kum amio baputisi ngo ni ng’atu moko m’i kindwu, ndhu ni Krispo giku Gayo re;

¹⁵ jumaru wacu ya jumio baputisi iwu ku nyinga.

¹⁶ Man ke amio baputisi ni juot pa Stefano bende: mange re, ang’eyo ngo tek amio baputisi ni ng’atu moko mange.

¹⁷ Kum Kristu ora ngo ya ami baputisi, ento kara ayer lembanyong’a ma juboth ko: ku rieko mi lembe ngo, yen m’athara pa Kristu maru doko mananu.

Kristu, Tego ku Rieko pa Mungu

¹⁸ Kum lembe mi yen m’athara bedo calu lemkasegu ni ju ma girwinyo; ento iwa wa ju ma waboth re en e tego pa Mungu.

¹⁹ Kum egore kumae, Abiroco rieko mi ju ma riek, Man ke abidwoko riu mi ju m’ung’eyo lembe doko mananu.

²⁰ Jarieko ni kani? jagorcik ni kani? japiem mi rundi maeni ni kani? Mungu dwoko rieko m’i ng’om udoko ni lemkasegu ngo?

²¹ Kum ni rieko pa Mungu ng’om ku rieko pare ng’eyo Mungu ngo, ebedo ber ni Mungu ya ebodh ju m’uyio ku kasegu mi lembayera.

²² Kum Juyahudi gipenjo giranyutha, Juyunani ke gibeyenyo migi rieko:

²³ ento wayero mwa Kristu ma jugure, ni Juyahudi lembene bedo ni gin ma redho jo, ni Thekdhanumange ke ebedo ni lemkasegu;

²⁴ ento ni ju ma julwong’ogi re, Juyahudi giku Juyunani de, en e Kristu ma ego pa Mungu, ku rieko pa Mungu de.

²⁵ Kum lemkasegu pa Mungu e riek ma sagu dhanu; man ke ng’ic pa Mungu e tek ma sagu dhanu.

²⁶ Dong’ wunen lwong’o mu, umego, ya ju ma gi riek ku kum gi dupa ngo, ju ma jutego de gi dupa ngo, ju ma gi judwong’ de gi dupa ngo, ma julwong’ogi:

²⁷ ento Mungu foyo gin ma kitgi mbe i ng’om, kara eketh lewic umak ju ma gi riek; man Mungu foyo gin ma ng’ic m’i ng’om, kara eketh lewic umak weg tego;

²⁸ man ke gin ma rac m’i ng’om, ku gin ma jucayugi de, e ma Mungu foyo, ku gin ma gimbe de, kara eketh gin ma ginuti gidok mananu:

²⁹ kara kum moko kud uyungre i wang’ Mungu.

³⁰ Ento wun re wuai i bang’e i Kristu Yesu, ma judwoke iwa ni rieko m’uai ba Mungu, man bedopwe ku dwokrileng’, man war:

³¹ kara, calu egore kumae, Ng’atu m’ulule, dong’ elule i Rwoth.