Genesis 9 - Hiyay Habi nin Dioh boy Genesis boy Ruth

Hiyay Kahundoan nan Apo Namalyadi kanan Noe

¹ In-inged na yan Apo Namalyadi ye Noe boy hilay aanak na. Hinabi na, “Magpakalabong kawo boy patepean yoy babe-luta.

² Kalimowan la kawon kaganaan a aayop, hilay angkumodang, andumakap, anlumpad boy kaganaan a mamalanghit ha dagat. Ipabaala ko hilan kaganaan kanyo.

³ Hilay kaganaan a angkabi-ay boy angkumodang, an-ibyay ko hila kanyo a kena yo. Hatew, in-ibyay ko kanyo ye malambot a tatanaman a kanen yo. Noba haanin, an-ibyay ko hilayna kanyo ye kaganaan a kena yo.

⁴ Noba adi yo kena ye ayop a ahe napalwah ye daya na, ulita hiyay daya ye bi-ay.

⁵ Ket hiyay tungkol ha daya nin tao, makibat ya kangko ye ayaman a tao a mamatey nin kapadiho nan tao. Wanabay met ha ayop a makapatey nin tao, makibat ya kangko ye agya hinyaman a mamatey nin tao.”

⁶ “Ayaman a mamatey nin kapadiho nan tao, ket pateyen ya met nin kapadiho nan tao, ta pinalhowa nan Apo Namalyadi ye tao a katuwad na.

⁷ Noba Noe, magpakalabong kawo boy patepean yoy babe-luta.”

⁸ Hinabi nan Apo Namalyadi kanan Noe boy kanlan aanak na,

⁹ “Yati ye kahundoan ko kanyo boy kanlan lalahi yo,

¹⁰ boy kanlan kaganaan a angkabi-ay a ayop a kalamo yon nilumwah ha daong a hilay mamanokmanok boy aayop, maamo man o mahilib.

¹¹ Yati ye kahundoan ko kanyo. An-ipangako ko a adi koyna tanepen uman ye kaganaan a angkabi-ay ha babe-luta boy adi koyna tanepen ye babe-luta ta-omen damaen.”

¹² Hinabi na po Apo Namalyadi, “Yati ye pagkakitan nin homain anggaan a kahundoan ko kanyo boy ha kaganaan a angkabi-ay a aayop a kalamo yo.

¹³ Mangipakit akon buwakaw ha owep. Ket yatin buwakaw ye pagkakitan nin kahundoan ko ha kaganaan a angkabi-ay ha babe-luta.

¹⁴ Tepe diyagen ko yan maowep ye luwang boy makit ye buwakaw ha owep,

¹⁵ maihipan koy kahundoan ko kanyo boy ha kaganaan a aayop a agkoynan tanepen uman ye babe-luta ta-omen damaen ye kaganaan a angkabi-ay.

¹⁶ Tepe makit ye buwakaw ha owep, ket maihipan koy homain anggaan a kahundoan ko ha kaganaan a angkabi-ay ha babe-luta.”

¹⁷ Kaya-bay hinabi nan Apo Namalyadi kanan Noe, “Hiyay buwakaw ye pagkakitan nin kahundoan ko ha kaganaan a angkabi-ay ha babe-luta.”

Hilay aanak nan Noe

¹⁸ Hilayati ye aanak nan Noe a kalamo na ha daong, hiyay Shem, Ham boy Jafet. (Hiyay Ham ye bapa nan Canaan.)

¹⁹ Hilayatin tatlon lalakin aanak nan Noe ye nangibatan nin kaganaan a tatao a nangaitayak ihti ha babe-luta.

²⁰ Hiyay Noe ket māgtalon ya boy hiyabay ye unan nananem nin obah.

²¹ Ha maghay mangaamot, hiyay Noe ket ninom yan alak ubah ket nalahing ya. Nipakatuloy yan loh-ok ha loob nin hongab na.

²² Haanin, hiyay Ham a bapa nan Canaan ket nilumoob ya ha hongab, ket nakit na yan loh-ok ye bapa na. Nilumwah ya ha hongab, ket hinabi na kanlan luway katongno na ye nakit na.

²³ Kaya-bay hiyay Shem boy Jafet, nangwa hilan oweh a ingkonin la ha bantaw la haka hila nayngidlan a lumoob a patalingkukol ha hongab. Inowehan la yay laman nan bapa la. Ahe la pinalingayan ta ahe la labay makit a loh-ok yay bapa la.

²⁴ Ha naimahmahan yaynay Noe boy ha natandaan na ye dinyag nan anak na a bonho,

²⁵ hinabi na, “An-ihumpa kata Canaan. Mag-ilyadi kan ipoh lan kakatongno mo.”

²⁶ Boy hinabi na po, “Galangen yay Apo Dioh, a Namalyadi nan Shem. Mag-ilyadi ya dayin ipoh nan Shem ye Canaan.

²⁷ Pawayen naya dayin Apo Namalyadi ye lugal nan Jafet boy mag-ilyadi ya dayin manged ye paylamo nin lalahi na kanlan lalahi nan Shem. Boy mag-ilyadi ya met dayin ipoh nan Jafet ye Canaan.”

²⁸ Pangayadi nin tanep, nabi-ay ya po ye Noe nin 350 a taon.

²⁹ Inumabot ya ha 950 a taon bayo yan natey.