Genesis 7 - Hiyay Habi nin Dioh boy Genesis boy Ruth

Hiyay Tanep

¹ Hinabi nan Apo Dioh kanan Noe, “Lumoob kawoynan mitapamilya ha daong, ta ha kaganaan a tatao kananyatin panaon, ket hikan bengat ye nakit kon ampagbi-ay a matoynong.

² Mangilamo ka nin pitoy padih nin balang kalahi nin ayop a naibilang a malinih, boy maghay padih met nin naibilang a madinat.

³ Mangilamo ka met nin pitoy padih nin balang kalahi nin mamanokmanok. Diyagen mo yati ta-omen magpahulong ye lahi la.

⁴ Pangalabah nin pitoy mangaamot, udanen koyna ye babe-luta ha loob nin apatapo a mangaamot boy madeglem. Ket hipeten ko ye kaganaan a pinalhowa ko ha babe-luta.”

⁵ Ket dinyag nan Noe ye kaganaan a imbilin nan Apo Dioh kana.

⁶ Hiyay Noe ket 600 anay taon na ha nandogin matanep ye babe-luta.

⁷ Ket nilumoob ya ha daong a lamo na yay ahawa na, hilay aanak na a laki dayon mamanuyang na ta-omen hila maligtah ha tanep.

⁸ Ket balang kalahi nin aayop, naibilang man a malinih o ahe, boy balang kalahi nin mamanokmanok boy aayop a andumakap ha luta,

⁹ ket nakew hilan mipapadih kanan Noe ha loob nin daong a omen ha imbilin nan Apo Namalyadi kana.

¹⁰ Pangalabah nin pitoy mangaamot, ket dogiyan naynan tanepen ye babe-luta.

¹¹ Hiyay Noe ket 600 anay taon na hatew. Ha ika-17 mangaamot nin ikalwan bowan, hinumopwak ye kaganaan a hubol ha lale luta. Ket paibat ha langit, ampibohboh ye lanom ha babe-luta.

¹² Ket pangudan-udan nayna ha babe-luta ha loob nin 40 a mangaamot boy madeglem.

¹³ Ket kananyatew met ateed a mangaamot a mangudan, nilumoob hilayna ha daong ye miahawan Noe, lamo la hilay tatlon aanak na a laki, hiyay Shem boy Ham boy Jafet dayon ahawa nin balang magha kanla.

¹⁴ Kalamo la ye kaganaan kalahin aayop, mahilib man o maamo, angkumodang man o andumakap, boy balang kalahi nin mamanokmanok.

¹⁵ Maghay padih ha balang angkabi-ay ye nakew kanan Noe ha daong,

¹⁶ a omen ha imbilin nan Apo Namalyadi. Ha nakaloob hilaynan kaganaan, hiyay Apo Dioh, inleneb nayna ye ilwangan nin daong.

¹⁷ 40 a mangaamot a pangudan-udan na ha babe-luta. Inumalale ye lanom ket nilumpaw yayna met ye daong.

¹⁸ Lalo a inumalale ye lanom boy pahulong met ye panlumpaw nin daong ha tanep.

¹⁹ Pahulong yan an-umalale ye lanom angga ha nalipoh hilaynay mangatagay a matundol.

²⁰ Pahulong yan an-umalale ket inumigit ya po ye lanom nin manga pitoy mitodo ha babe nin pinakamatagay a matundol.

²¹ Nahipet ye kaganaan angkabi-ay ha babe-luta, hilay mamanokmanok, aayop a maamo man o mahilib, kaganaan a andumakap boy kaganaan a tatao.

²² Nangamatey ye kaganaan angkabi-ay ha luta.

²³ Ket nahipet hilay kaganaan a tatao, aayop, aayop a andumakap boy mamanokmanok ha luwang. Hiyay Noe boy hilay kalamo nan bengat ha loob nin daong ye napatla.

²⁴ Ket ha loob nin 150 a mangaamot, maalale ya po ateed ye lanom.