Genesis 5 - Hiyay Habi nin Dioh boy Genesis boy Ruth

Hilay lalahi nan Adan

¹ Yati ye nakahulat a panongtongen nin lalahi nan Adan. Ha pinalhowa nan Apo Namalyadi ye tao, dinyag na yan katuwad na.

² Laki boy babayi ye pinalhowa na. Ket in-inged na hila boy hinabtan na hilan tao.

³ Hiyay Adan ket 130 anay taon na ha nagkaanak yan katuwad na. Ket pinangalanan na yan Set.

⁴ Ha naianak yaynay Set, nabi-ay ya po ye Adan nin 800 a taon boy nagkaanak ya po nin kanayon a aanak a laki boy babayi.

⁵ 930 a taon nayna ha matey ya.

⁶ Hiyay Set ket 105 anay taon na ha nagkamain yan anak a hiyay Enosh.

⁷ Ha naianak yaynay Enosh, nabi-ay ya po ye Set nin 807 a taon boy nagkamain ya po nin kanayon a aanak a laki boy babayi.

⁸ 912 a taon nayna ha matey ya.

⁹ Hiyay Enosh ket 90 anay taon na ha nagkamain yan anak a hiyay Kenan.

¹⁰ Ha naianak yaynay Kenan, nabi-ay ya po ye Enosh nin 815 a taon boy nagkamain ya po nin kanayon a aanak a laki boy babayi.

¹¹ 905 a taon nayna ha matey ya.

¹² Hiyay Kenan ket 70 anay taon ha nagkamain yan anak a hiyay Mahalalel.

¹³ Ha naianak yaynay Mahalalel, nabi-ay ya po ye Kenan nin 840 a taon boy nagkamain ya po nin kanayon a aanak a laki boy babayi.

¹⁴ 910 a taon nayna ha matey ya.

¹⁵ Hiyay Mahalalel ket 65 anay taon na ha nagkamain yan anak a hiyay Jared.

¹⁶ Ha naianak yaynay Jared, nabi-ay ya po ye Mahalalel nin 830 a taon boy nagkamain ya po nin kanayon a aanak a laki boy babayi.

¹⁷ 895 a taon nayna ha matey ya.

¹⁸ Hiyay Jared ket 162 anay taon na ha nagkamain yan anak a hiyay Enoc.

¹⁹ Ha naianak yaynay Enoc, nabi-ay ya po ye Jared nin 800 a taon ket nagkamain ya po nin kanayon a aanak a laki boy babayi.

²⁰ 962 a taon nayna ha matey ya.

²¹ Hiyay Enoc 65 anay taon na ha nagkamain yan anak a hiyay Matusela.

²² Ha naianak yaynay Matusela, nabi-ay ya po ye Enoc nin 300 a taon a kalamo na yay Apo Namalyadi, ket nagkamain ya po nin kanayon a aanak a laki boy babayi.

²³ Naabot na po ye 365 a taon.

²⁴ Hiyay Enoc ket nagbi-ay yan mapatayaan kanan Apo Namalyadi. Pangayadi ket naplak ya, ulita kingwa na yan Apo Namalyadi.

²⁵ Hiyay Matusela ket 187 anay taon na ha nagkamain yan anak a hiyay Lamec.

²⁶ Ha naianak yaynay Lamec, nabi-ay ya po ye Matusela nin 782 a taon boy nagkamain ya po nin kanayon a aanak a laki boy babayi.

²⁷ 969 a taon nayna ha matey ya.

²⁸ Hiyay Lamec ket 182 anay taon na ha nagkamain yan anak a laki.

²⁹ Hinabi na, “Yatin anak ko ye mamaimonaw kantawon ibat ha kaidapan, uli ha pangihumpa nan Apo Dioh ha luta.” Kaya-bay pinangalanan na yan Noe ye anak na.

³⁰ Ha naianak yaynay Noe, nabi-ay ya po ye Lamec nin 595 a taon boy nagkamain ya po nin kanayon a aanak a laki boy babayi.

³¹ 777 a taon nayna ha matey ya.

³² Hiyay Noe ket 500 a taon nayna ha nagkamain yan aanak a hiyay Shem, Ham, boy Jafet.