Matteu 9 - 4 Evangiles en Corse

Ghjesù guarisce un paraliticu è hà u putere di perdunà i peccati

¹ Ghjesù s'imbarcò, fece dinò a traversata è vultò in a so cità.

² Ed eccu ch'elli li portanu un omu paralizatu stracquatu nantu à un catalettu. Videndu a fede ch'elli avianu, Ghjesù dice à u paraliticu: «Curagiu, u mo figliolu, i to peccati sò perdunati.»

³ Tandu unepochi di maestri di a Lege dicenu da sè à sè: «Questu quì insulta à Diu.»

⁴ È Ghjesù videndu ciò ch'elli pensavanu, li dice: «Perchè chì ci sò isse idee gattive in i vostri cori?

⁵ Serà più faciule à dì “i to peccati sò perdunati” o à dì “arrizza ti è cammina!”?

⁶ Sappiate chì u Figliolu di l'Omu hà u putere di perdunà i peccati nantu à sta terra», tandu dice à u paraliticu: «Arrizza ti, piglia u to catalettu è volta ti ne in casa toia.»

⁷ Quellu piglia, s'arrizza è si ne volta in casa soia.

⁸ Videndu isse cose a ghjente fù pigliata di timore è ludavanu à Diu d'avè datu un putere simule à l'omi.

Ghjesù chjama à Matteu

⁹ Surtendu da a cità, Ghjesù vede à unu, un certu Matteu, chì pusava à u scagnu di e tasse. Li dice: «Veni cù mè.» Matteu si pesa è và cun ellu.

¹⁰ Ghjesù pusava in casa, à tavulinu, unepochi di percettori è di peccatori ghjunghjenu è s'attavulineghjanu cù Ghjesù è i so discepuli.

¹¹ I Farusei i vedenu è dicenu à i discepuli: «Cumu hè chì u vostru maestru manghja cù i percettori è cù i peccatori?»

¹² Ghjesù sente è risponde: «À chì hè in salute, di medicu ùn ne hà bisognu, i malati sì.

¹³ Andate puru è amparate ciò ch'ellu vole dì: Vogliu a misericordia è micca u sacrifiziu; chì eu, ùn sò micca ghjuntu à chjamà i ghjusti, ma i peccatori.»

A quistione di u dighjunu

¹⁴ Tandu ghjunghjenu i discepuli di Ghjuvanni è li dumandanu: «Cumu hè chì noi è i Farusei femu à spessu u dighjunu, invece chì i to discepuli ùn lu facenu micca?»

¹⁵ È Ghjesù li dice: «L'amichi di u sposu puderianu fà u dolu in lu mentre ch'ellu hè cun elli u sposu? Veneranu i ghjorni chì u sposu li serà toltu, è tandu u feranu u dighjunu

¹⁶ Nimu mette una pezza di stofa nova nantu à un mantellu vechju, chì osinnò a stofa nova stinza a vechja, è a stracciatura hè ancu peghju.

¹⁷ Nè si mette vinu novu ind'è l'otre vechje, chì osinnò l'otre crepanu, u vinu si perde è sò arruinate l'otre; si mette invece u vinu novu ind'è l'otre nove, è cusì, tutu ferma in estice.»

Ghjesù rinvivisce a figliola di Ghjairu è guarisce una donna malata dapoi dodeci anni

¹⁸ Mentre ch'ellu parlava cusì ghjunghje unu, un capisinagoga, chì si rinchjina è li dice: «Hè morta a mo figliola pocu fà: aiò, veni è stendi li a manu sopra chì cusì camperà.»

¹⁹ Ghjesù si pesa è u seguita cù i so discepuli.

²⁰ Or s'avvicina per daretu una donna chì eranu dodici anni ch'ella pirdia sangue. Li tocca l'orlu di u mantellu.

²¹ Ella avia pensatu: «S'è a li facciu à tuccà solu u so mantellu, sò salva.»

²² Ghjesù si volta è videndu la li dice: «Curagiu, a mo figliola, a to fede t'hà salvu. È da tandu, a donna fù salva.»

²³ Ghjuntu in casa di u capisinagoga è videndu i sunatori cù i so strumenti è a folla in sussurru,

²⁴ Ghjesù dice: «Andate vi ne chì a zitella ùn hè morta, ma dorme.» È quelli si ridenu d'ellu.

²⁵ Quandu quella folla hè mandata fora, entre, piglia a zitella pè a manu, è quella s'arrizza.

²⁶ In lu circondu sanu, a vuciata sparse a so nomina.

Ghjesù guarisce dui cechi

²⁷ Ghjesù si n'andete è vensenu cun ellu dui cechi chì gridavanu: «Abbia cumpassione, o figliolu di Davide!»

²⁸ Ghjunti in casa s'avvicinanu è Ghjesù li dumanda: «Cridite ch'è possi fà una cosa simule?» Ed elli: «Iè, o Signore!»

²⁹ Tandu ellu li tocca l'ochji è dice: «Ch'ellu vi sia fattu secondu a vostra fede.»

³⁰ È i so ochji messenu à vede. È Ghjesù s'arricumanda, dicendu: «Chì nimu a sappii!»

³¹ Ma quelli sparsenu a so nomina in lu circondu sanu.

Ghjesù guarisce un indemuniatu

³² À u parte, eccu ch'omu li porta un omu mutu è indemuniatu.

³³ Mandatu via u spiritu, u mutu parla. A folla smaravigliata dicia: «Cose simule ùn si n'hè ancu vistu in Israele.»

³⁴ Ma i Farusei dicianu: «I demonii i manda via per mezu di u capidemoniu.»

A cumpassione di Ghjesù

³⁵ Ghjesù andava in tutte e cità è tutti i paesi; insignava in e sinagoghe è annunziava u regnu di Diu, guaria tutte e malatie è tutte l'infirmità.

³⁶ Videndu e folle ebbe cumpassione chì eranu stanche è scuragite, cum'è pecure senza pastore.

³⁷ Tandu dice à i so discepuli: «U granu da sigà hè assai, ma i sigatori sò scarsi.

³⁸ Dunque pricate u patrone di a sighera, ch'ellu mandi sigatori da sigà u so granu.»